দেশত কোভিডৰ চতুৰ্থ ঢৌ আৰম্ভ হোৱাৰ সময়তে আজি বিভিন্ন ৰাজ্যৰ মুখ্যমন্ত্ৰীসকলৰ সৈতে প্ৰধানমন্ত্ৰী নৰেন্দ্ৰ মোদীয়ে এক বৈঠকত মিলিত হয়।
ভাৰ্চুৱেল বৈঠকৰ সময়তে প্ৰধানমন্ত্ৰী মোদীয়ে কোভিডৰ আতংকৰ পৰা দেশ এতিয়াও মুক্ত হোৱা নাই বুলি সকলোকে পুনৰবাৰ সতৰ্ক কৰি দিয়ে।
তেওঁ লগতে কয় যে অতি সোনকালে শিশুসকলকো কোভিডৰ ভেকচিন দয়িাৰ ব্যৱস্থা কৰি তেওঁলোকক সুৰক্ষিত কৰাৰ বিষয়ত গুৰুত্ব দিয়ে।
অগ্ৰাধিকাৰ ভিত্তিত বিদ্যালয়সমূহত ইয়াৰ বাবে বিশেষ কাৰ্যসূচী অনুষ্ঠিত কৰিবলৈ তেওঁ সংশ্লিষ্ট সকলোকে নিৰ্দেশ দিয়ে।
বৈঠকত মোদীয়ে কয়—” আমাৰ বিজ্ঞানী আৰু বিশেষজ্ঞসকলে কোভডি সম্পৰ্কীয় ৰাষ্ট্ৰীয় আৰু গোলকীয় পৰিস্থিতি নিৰন্তৰ নিৰীক্ষণ কৰি আছে। আমি তেওঁলোকৰ পৰামৰ্শবোৰৰ ওপৰত ভিত্তি কৰি সামূহিক দৃষ্টিভংগীৰে কাম কৰিব লাগিব”।
কোভডি ৰোগীৰ পৰীক্ষা, চিনাক্তকৰণ আৰু চিকিৎসা প্ৰদান খৰতকীয়া কৰিব লাগিব বুলিও মোদীয়ে কয়।
কৰোনাভাইৰাছৰ সাম্প্ৰতিক পৰিস্থিতিত ইনফ্লুৱেঞ্জাত আক্ৰান্ত ৰোগীসকলকো আৰটি-পিচিআৰ পৰীক্ষা কৰাটো প্ৰয়োজনীয় বুলি মোদীয়ে কয়।
তেওঁ লগতে কয় যে দেশৰ প্ৰাপ্তবয়স্ক জনসংখ্যাৰ ৯৬ শতাংশ লোকক ভেকচিনৰ প্ৰথম পালি আৰু ১৫ বছৰৰ অধিক বয়সৰ যোগ্য জনসংখ্যাৰ ৮৫ শতাংশক ভেকচিনৰ দ্বিতীয় পালি প্ৰদান কৰা হৈছে।
উল্লেখ্য দিল্লীৰ মুখ্যমন্ত্ৰী অৰবিন্দ কেজৰিৱাল, পশ্চিম বংগৰ মুখ্যমন্ত্ৰী মমতা বেনাৰ্জী, ছত্তীশগড়ৰ মুখ্যমন্ত্ৰী ভূপেশ বাঘেল আৰু পঞ্জাৱৰ মুখ্যমন্ত্ৰী ভগৱন্ত মানকে ধৰি কেইবাজনো মুখ্যমন্ত্ৰীয়ে এই বৈঠকত অংশগ্ৰহণ কৰে।
উল্লেখ্য কেন্দ্ৰীয় স্বাস্থ্য মন্ত্ৰালয়ৰ তথ্য অনুসৰি ভাৰতত বিগত ২৪ ঘণ্টাত ২,৯২৭ গৰাকী লোক কোভিডত নতুনকৈ আক্ৰান্ত হৈছে।
দেশত এতিয়া সক্ৰিয় কোভিড ৰোগীৰ সংখ্যা ১৬,২৭৯ লৈ বৃদ্ধি পাইছে৷ বিগত ২৪ ঘণ্টাত কোভিডত আক্ৰান্ত হৈ ৩২ গৰাকী লোক মৃত্যুক সাৱটি লৈছে।
ফলত দেশত কোভিডে প্ৰাণ কাঢ়ি নিয়া মুঠ লোকৰ সংখ্যা ৫,২৩,৬৫৪ গৰাকীলৈ বৃদ্ধি পাইছে।
