কাৰাগাৰৰ ভিতৰতে অসুস্থ হৈ পৰিল কংগ্ৰেছ নেতা তথা প্ৰাক্তন ক্ৰিকেটাৰ নৱজ্যোত সিং সিদ্ধু। বিগত দুদিন ধৰি সিদ্ধুৱে ঔষধক বাদ দি আন একো বস্তু মুখত দিয়া নাই। কাৰাগাৰ কৰ্তৃপক্ষই যোগান ধৰা শুকান ৰুটি আৰু দাইল দেখি নাক কোচাই দিছে তেওঁ। সেয়ে যোৱা দুদিনে একো নোখোৱাকৈ থকাৰ ফলত সিদ্ধু হৈ পৰিছে অসুস্থ।
সিদ্ধুক দুদিনপূৰ্বে প্ৰেৰণ কৰা হৈছিল পাটিয়ালাৰ কাৰাগাৰলৈ। সোমবাৰে পুৱা তেওঁক পাটিয়ালাৰ ৰাজেন্দ্ৰ চিকিৎসালয়লৈ লৈ যোৱা হয়। কাৰাগাৰৰ সূত্ৰই প্ৰকাশ কৰা মতে তেওঁ চিকিৎসালয়ত শাৰীৰিক পৰীক্ষা কৰাব। এই উদ্দেশ্যৰ বাবে এখন চিকিৎসা পৰিষদও গঠন কৰা হৈছে।
তেওঁলোকে সিদ্ধুৰ ডায়েট চাৰ্ট প্ৰস্তুত কৰিব। কাৰাগাৰৰ এজন বিষয়াই কয়, “যদি চিকিৎসকসকলে সিদ্ধুৰ বাবে বিশেষ খাদ্যৰ পৰামৰ্শ দিয়ে, তেন্তে তেওঁক সেইবোৰ কাৰাগাৰৰ কেণ্টিনৰ পৰা কিনি খাবলৈ অনুমতি দিয়া হ’ব পাৰে।” চিকিৎসা পৰিষদৰ চিকিৎসকসকলে সিদ্ধুৰ ডায়েট চাৰ্ট প্ৰস্তুত কৰিব আৰু পাটিয়ালাৰ স্থানীয় আদালতত অৱগত কৰিব। সেই অনুসৰি, কংগ্ৰেছ নেতাগৰাকীয়ে খাদ্য লাভ কৰিব।
“সিদ্ধুৱে ঘেঁহু, চেনী, ময়দা আদিৰ দৰে চেনী সমৃদ্ধ খাদ্য খাব নোৱাৰে। তেওঁক অমিতা, মধুৰিআম, ডাবল-টোনড গাখীৰ আৰু চেনী নথকা খাদ্য দিব লাগিব।” এই মন্তব্য কৰিছে সিদ্ধুৰ ঘনিষ্ঠ লোকে।
কংগ্ৰেছৰ নেতা তথা প্ৰাক্তন ৰাষ্ট্ৰীয় ক্ৰিকেটাৰজনে চিকিৎসকৰ পৰামৰ্শ অনুসৰি নিয়মীয়াকৈ ঔষধ গ্ৰহণ কৰি আছে। এটা পথ দুৰ্ঘটনাৰ গোচৰত এবছৰৰ কাৰাদণ্ডৰে দণ্ডিত হৈছে সিদ্ধু।
