ৰাছিয়া-ইউক্ৰেইন যুদ্ধই ১০০ দিন অতিক্ৰম কৰিলে। ৰাছিয়াই ২৪ ফেব্ৰুৱাৰীত ইউক্ৰেইনৰ ওপৰত সামৰিক অভিযান আৰম্ভ কৰিছিল। তেতিয়াৰ পৰা স্থৱিৰ হোৱা নাই যুদ্ধ। অব্যাহত আছে ধ্বংস। বৈছে তেজৰ নদী। আন্তঃৰাষ্ট্ৰীয় পৰ্যায়ত ৰাছিয়াক একাষৰীয়া কৰাৰ চেষ্টা কৰা হৈছে। কিন্তু সি যেন জ্বলা জুইত ঘিউহে ঢালিছে।
দেশখন যুদ্ধৰ ফলত বিধ্বস্ত হৈ পৰাৰ সময়তে ইউক্ৰেইনে বিশ্বকাপৰ যোগ্যতা অৰ্জনৰ ৰাউণ্ডত স্কটলেণ্ডৰ মুখামুখি হৈছিল। জেলেনস্কিৰ দেশখনে মেচখন ৩-১ গ’লত জয়লাভ কৰে। ইউক্ৰেইন মেচখনত জিকি কাটাৰত অনুষ্ঠিত হ’বলগীয়া বিশ্বকাপৰ আৰু ওচৰ চাপে।
দেওবাৰে ইউক্ৰেইনে প্লে অফত ৱেলছৰ সৈতে খেলিব। যদি সেই মেচখন জিকে তেওঁলোকে বিশ্বকাপৰ মূল পৰ্যায়ত উপনীত হ’ব।
ফুটবল সম্ৰাট পেলেই ইউক্ৰেইনৰ বিৰুদ্ধে ৰাছিয়াৰ আক্ৰমণৰ সন্দৰ্ভত ইমানদিনে এটা শব্দও মতা নাছিল। কিন্তু তেওঁৱো নিজকে নিয়ন্ত্ৰণ কৰিব নোৱাৰিলে। ইউক্ৰেইন-স্কটলেণ্ড খেলৰ পূৰ্বে ফুটবল সম্ৰাটগৰাকীয়ে ৰাছিয়াৰ ৰাষ্ট্ৰপতি পুটিনক ইউক্ৰেইনত সামৰিক আক্ৰমণ বন্ধ কৰিবলৈ আহ্বান জনায়।
ইনষ্টাগ্ৰামত পেলেই লিখিছে,”ইউক্ৰেইনে দেশখনৰ ভয়ানক পৰিস্থিতিটো ৯০ মিনিটৰ বাবে পাহৰিবলৈ চেষ্টা কৰিব।”
পেলেই লগতে কয়, “মই ইউক্ৰেইন-স্কটলেণ্ডৰ খেলখন বেলেগ ধৰণে চাইছো। আক্ৰমণ বন্ধ কৰক। এই ভয়ংকৰ আক্ৰমণ অব্যাহত ৰখাৰ কোনো অৰ্থ নাই। এই বিবাদে বেদনা, যন্ত্ৰণা, ভয়, সন্ত্ৰাস বিয়পায়। যুদ্ধই কেৱল ৰাষ্ট্ৰক বিচ্ছিন্ন কৰাই নহয়, মিছাইল নিক্ষেপ কৰি, পৰিয়াল ধ্বংস কৰি আৰু নিৰীহ লোকক হত্যা, শিশুৰ সপোন হত্যা কৰাৰ আঁৰত কোনো আদৰ্শ থাকিবই নোৱাৰে।”
লগতে পঢ়ক: ৯জুনত মন্ত্ৰীসভাৰ সম্প্ৰসাৰণ: কোন থাকিব, কোন যাৱ, কি পৰিকল্পনা মুখ্যমন্ত্ৰী হিমন্ত বিশ্ব শৰ্মাৰ?
পূৰ্বতে পেলেই ৰাছিয়াৰ ৰাষ্ট্ৰপতি পুটিনৰ সৈতে সাক্ষাৎ কৰিছিল। সেই সময়ত ৰাছিয়াৰ ৰাষ্ট্ৰপতিয়েও তেওঁৰ সৈতে হাত মিলাইছিল। পেলেই ইনষ্টাগ্ৰামত লিখিছে, “আপোনাৰ যুদ্ধ বন্ধ কৰাৰ ক্ষমতা আছে। ২০১২ চনত মস্কোত আমাৰ দেখা হৈছিল। সেই সাক্ষাতত আমি কৰমৰ্দন কৰিছিলো।”
