এক ভয়ংকৰ অগ্নিকাণ্ডৰ ঘটনাই আজি জোকাৰি যায় বাংলাদেশক। দেশ খনৰ বন্দৰ নগৰী হিচাবে জনাজাত
চট্টগ্ৰামৰ সীতাকুণ্ডাত ঘটে এই অগ্নিকাণ্ডৰ ঘটনা।
শনিবাৰে নিশা সীতাকুণ্ডা উপজিলাৰ কাদামৰাছুল অঞ্চলৰ বিএম কণ্টেইনাৰ ডিপোত এই অগ্নিকাণ্ড সংঘটিত হয় বুলি সীতাকুণ্ডা আৰক্ষী চকীৰ উপ-পৰিদৰ্শক নুৰুল আলমে জনায়। অগ্নিকাণ্ডৰ ফলত বিস্ফোৰণ হয় আৰু জুই বিয়পি পৰে।
এই ঘটনাত এতিয়ালৈকে ৪৩ জন লোকৰ মৃত্যু ঘটাৰ বাতৰি পোৱা গৈছে। ঘটনাটোত ৬০০ ৰো অধিক লোক গুৰুতৰ ভাবে আহত হৈছে। আৰক্ষী বিষয়াগৰাকীয়ে প্ৰকাশ কৰা মতে নিহতৰ সংখ্যা আৰু বৃদ্ধি পাব পাৰে।
আহতসকলক চট্টগ্ৰাম মেডিকেল কলেজ চিকিৎসালয়ত ভৰ্তি কৰোৱা হৈছে। কি কাৰণত ডিপোটোত অগ্নিকাণ্ডৰ সূত্ৰপাত ঘটিল সেয়া এতিয়ালৈকে জানিব পৰা হোৱা নাই।
উল্লেখ্য কণ্টেইনাৰ ডিপ’টো ২০১১ চনৰ পৰাই চলি আহিছে।
বংলাদেশৰ চৰকাৰে সমগ্ৰ ঘটনাটোৰ এক তদন্তৰ নিৰ্দেশ দিছে। অগ্নিকাণ্ডত নিহতসকলৰ পৰিয়ালক উপযুক্ত সাহায্য প্ৰদান কৰিবলৈ দাবী জনাইছে বিভিন্ন দল-সংগঠনে।
