ভাৰতক পলিঅ’ মুক্ত কৰি তোলাৰ বাবে চৰকাৰে শিশুক পলিঅ’ খুওৱাৰ অভিযান তীব্ৰতৰ কৰি তোলাৰ সময়তে
১০ বছৰৰো অধিক সময়ৰ পিছত দেশত পুনৰ পলিঅ’ৰ ভাইৰাছ ধৰা পৰিছে।
কলকাতাত ধৰা পৰিছে এই পলিঅ’ ভাইৰাছ। মেটিয়াবুৰুজ অঞ্চলত পলিঅ’ ভাইৰাছ টো ধৰা পৰাৰ কথা নিশ্চিত কৰিছে ইউনিচেফে।
ইউনিচেফৰ সহযোগত শেহতীয়াকৈ কলকাতাৰ বিভিন্ন বস্তি অঞ্চলত ধৰণৰ জৰীপ চলোৱা হৈছিল।সেই জৰীপৰ সময়তে পলিঅ’ ভাইৰাছৰ উপস্থিতি ধৰা পৰে।
উল্লেখ্য ২০১১ চনত হাওৰাত এটি শিশুৰ শৰীৰত শেষবাৰৰ বাবে পলিঅ’ ধৰা পৰিছিল। ইয়াৰ পিছত ২০১৪ চনত বিশ্ব স্বাস্থ্য সংস্থাই ভাৰতক পলিঅ’মুক্ত দেশ হিচাপে ঘোষণা কৰিছিল।
কিন্তু আঠ বছৰৰ পিছত স্বাস্থ্য বিভাগৰ উদ্বেগ বৃদ্ধি কৰি কলকাতাত পলিঅ’ ভাইৰাছৰ উপস্থিতি ধৰা পৰে। স্বাস্থ্য বিভাগৰ সূত্ৰ অনুসৰি মেটিয়াবুৰুজ অঞ্চলৰ নৰ্দমা পানীত পলিঅ’ৰ বীজাণু ধৰা পৰিছে, যাৰ ফলত স্বাস্থ্য বিভাগে মেটিয়াবুৰুজ অঞ্চলত নিৰীক্ষণ বৃদ্ধি কৰিছে।
এই বিষয়ত ৰাজ্যখনৰ সকলো চিকিৎসা মহাবিদ্যালয় আৰু চৰকাৰী চিকিৎসালয়ক সতৰ্ক কৰি দিয়া হৈছে। নৰ্দমাৰ পানীত পলিঅ’ ভাইৰাছ ধৰা পৰাৰ পিছতে ৰোগ প্ৰতিৰোধ ক্ষমতা কম থকা শিশুৰ ওপৰত বিশেষ সতৰ্ক দৃষ্টি ৰাখিবলৈ ৰাজ্য খনৰ স্বাস্থ্য বিভাগে নিৰ্দেশ দিছে।
স্বাস্থ্য বিভাগে পলিঅ’ ভাইৰাছ পোৱা স্থানৰ কাষতে বাস কৰা বহু শিশুৰ শৌচৰ নমুনা পৰীক্ষা কৰিবলৈও নিৰ্দেশ দিছে।ইয়াৰ উপৰিও, টিকাকৰণৰ ওপৰত গুৰুত্ব দিয়া হৈছে।
২০১১ চনত হাওৰাৰ এগৰাকী ১২ বছৰীয়া কিশোৰী পলিঅ’ত আক্ৰান্ত বুলি ধৰা পৰিছিল। ২৭ মাৰ্চ, ২০১৪ তাৰিখে ভাৰতক পলিঅ’মুক্ত দেশ হিচাপে স্বীকৃতি দিয়া হৈছিল।
