মণিপুৰৰ ইম্ফলৰ পৰা ৪০ বছৰ আগতেই নিৰুদ্দেশ হোৱা খমদ্ৰাম গম্ভীৰ নামৰ লোকজনক যোৱা ৰবিবাৰে মুম্বাইৰ ৰাজপথৰ পৰা মুম্বাই আৰক্ষীয়ে উদ্ধাৰ কৰাৰ পাছত আজি বৃহস্পতিবাৰে নিজ গৃহ চহৰ ইম্ফললৈ লৈ অনা হয়।
আজি বিয়লি প্ৰায় ৩ বজাত ইম্ফল আন্তঃৰাষ্ট্ৰীয় বিমান বন্দৰত অৱতৰণ কৰাৰ মূহুৰ্তত খমদ্ৰম অঞ্চলৰ স্থানীয় লোকৰ লগতে লোকসভাৰ সাংসদ ড০ টিএইচ মেইনিয়া আৰু স্থানীয় বিধায়ক চপন ৰঞ্জনে ‘থেঙ্ক য়ু য়ু টিউব’, ‘থেঙ্ক য়ু হাৱাটছএপ’, ‘থেঙ্ক য়ু মুম্বাই পুলিচ’, ‘থেঙ্ক য়ু মণিপুৰ পুলিচ’ আদি সম্বলিত বেনাৰ পোষ্টাৰেৰে উষ্ম আদৰণি জনায় গম্ভীৰক।
উল্লেখ্য যে সাত বছৰ মণিপুৰ ৰাইফলছত চাকৰি কৰা পশ্চিম ইম্ফল জিলাৰ খুমবং মামাং লেইকায় গাঁৱৰ নিবাসী গম্ভীৰে (৬৫) ১৯৭৮ চনত পৰিয়ালৰ লোকক কোনো খবৰ নিদিয়াকৈয়ে ঘৰ এৰি পলায়ন কৰিছিল।
মনকৰিবলগীয়া যে ইমান বছৰে নিখোজ হৈ থকা গম্ভীৰৰ এটা ভিডিঅ’ য়ু টিউব যোগে সম্প্ৰচাৰিত হোৱাৰ পাছতে পৰিয়ালৰ লোকে ভিডিঅ’টো দেখে আৰু সেই ভিডিঅ’টোত হিন্দী গীত পৰিৱেশন কৰি থকা লোকজন খমদ্ৰাম গম্ভীৰ বুলি নিশ্চিত কৰে। উল্লখ্য যে এই ভিডিঅ’টো ৰোমেন লেইছমবাম নামৰ এজন ব্যক্তিয়ে হোৱাটছ এপ যোগে খুমবং অঞ্চলৰ কিছু লোকক প্ৰেৰণ কৰিছিল আৰু তাৰ পাছতেই নিৰুদ্দেশ হৈ থকা লোকজনৰ সম্ভেদ ওলায়।
জানিব পৰা মতে এই ভিডিঅ’টো যোৱা বছৰৰ অক্টোবৰ মাহতে মুম্বাইৰ এজন ফটোগ্ৰাফাৰে য়ু টিউবৰ মাধ্যমেৰে সম্প্ৰচাৰিত কৰিছিল।
ইফালে পৰিয়ালৰ লোক, পশ্চিম ইম্ফল ষ্টুডেণ্টছ ক্লাবে ভিডি’টো দেখি মণিপুৰ আৰক্ষীৰ সহায় বিচাৰে। তেওঁলোকৰ অনুৰোধত মণিপুৰ আৰক্ষীয়ে মুম্বাই আৰক্ষীৰ সৈতে যোগাযোগ স্থাপন কৰে আৰু অৱশেষত আজি ৪০ বছৰ পূৰ্বে নিৰুদ্দেশ হোৱা গম্ভীৰক নিজ গৃহলৈ ওভতায় আনিবলৈ সক্ষম হয়।
