আকাশমাৰ্গত সহ-পাইলটৰ অতৰ্কিত আক্ৰমণৰ সন্মুখীন হৈও অদম্য সাহসেৰে শ শ যাত্ৰীৰ প্ৰাণ ৰক্ষা কৰা ফ্লায়ডুবাইৰ ভাৰতীয় মূলৰ পাইলট কেপ্তেইন স্মিত মচ্ছৰক প্ৰধানমন্ত্ৰী নৰেন্দ্ৰ মোদীয়ে ‘হিৰ’’ আখ্যা দিছে। ডুবাইৰ পৰা ইজৰাইলৰ তেল আভিভলৈ গৈ থকা ফ্লায়ডুবাইৰ ১০৭৩ নম্বৰ বিমানখনত বুধবাৰে সহ-পাইলটগৰাকীয়ে কেপ্তেইন মচ্ছৰক ছুৰীকাঘাত কৰি বিমানখন দুৰ্ঘটনাত পতিত কৰাৰ চেষ্টা চলোৱাৰ সময়তে তেওঁ নিজৰ জীৱন তুচ্ছ কৰি যাত্ৰীসকলক ৰক্ষা কৰিবলৈ সক্ষম হয়। গুৰুতৰভাৱে আহত হোৱাৰ পাছতো তেওঁ প্ৰদৰ্শন কৰা বীৰত্বৰ বাবে ভাৰতৰ প্ৰধানমন্ত্ৰীৰ লগতে আমেৰিকা যুক্তৰাষ্ট্ৰৰ ৰাষ্ট্ৰপতি ডনাল্ড ট্ৰাম্প আৰু ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱেও পাইলটগৰাকীক ভূয়সী প্ৰশংসা কৰিছে।
প্ৰাপ্ত বাতৰি অনুসৰি, আকাশমাৰ্গত থকা অৱস্থাতে সহ-পাইলটগৰাকীয়ে কেপ্তেইন মচ্ছৰক আক্ৰমণ কৰাৰ ফলত বিমানখনে হঠাতে যথেষ্ট উচ্চতা হেৰুৱাই পেলাইছিল। এই জৰুৰী পৰিস্থিতিত বিমানখনে অপহৰণৰ সংকেত হিচাপে ‘স্কোৱাক ৭৫০০’ প্ৰেৰণ কৰে। লগে লগে ইজৰাইল কৰ্তৃপক্ষই দুখন বায়ুসেনাৰ যুঁজাৰু বিমান সাজু কৰাৰ লগতে জৰুৰী মূল্যায়ন আৰম্ভ কৰে। ইফালে, গুৰুতৰভাৱে আহত কেপ্তেইন মচ্ছৰে আক্ৰমণকাৰীক প্ৰতিহত কৰি ককপিটৰ দুৱাৰ খুলি দিবলৈ সক্ষম হয়, যাৰ ফলত যাত্ৰী আৰু ক্ৰু সদস্যসকলে ভিতৰত প্ৰৱেশ কৰি আক্ৰমণকাৰীজনক কাবু কৰাৰ সুযোগ পায়। পৰৱৰ্তী সময়ত বিমানখন চৌদি আৰৱৰ টাবুক বিমানবন্দৰত নিৰাপদে অৱতৰণ কৰোৱা হয়।
সামাজিক মাধ্যম এক্সযোগে প্ৰধানমন্ত্ৰী মোদীয়ে পাইলটগৰাকীৰ দ্ৰুত আৰোগ্য আৰু সুস্বাস্থ্য কামনা কৰি কয় যে চৰম বিপদৰ সময়তো তেওঁ আনৰ জীৱন ৰক্ষাৰ বাবে যি সাহস আৰু দৃঢ়তা প্ৰদৰ্শন কৰিলে, তাৰ বাবে সমগ্ৰ ভাৰত গৌৰৱান্বিত। ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱেও এক্সত তেওঁক প্ৰকৃত বীৰ আখ্যা দি কয় যে পাইলটগৰাকীৰ সেই মুহূৰ্তৰ সিদ্ধান্তৰ বাবেই এক বৃহৎ দুৰ্যোগৰ পৰা হাত সাৰিব পৰা গ’ল। আনহাতে আমেৰিকাৰ ৰাষ্ট্ৰপতি ডনাল্ড ট্ৰাম্পেও কেপ্তেইন মচ্ছৰক প্ৰশংসা কৰি প্ৰকাশ কৰে যে নেতানিয়াহুৰ সৈতে হোৱা বাৰ্তালাপত তেওঁ জানিব পাৰিছে যে বিমান চলাবলৈ নজনা এজন প্লাম্বাৰেও বিমানখন চৌদি আৰৱত অৱতৰণ কৰোৱাৰ ক্ষেত্ৰত এক নাটকীয় ভূমিকা পালন কৰিছিল।
উল্লেখযোগ্য যে কেপ্তেইন স্মিত মচ্ছৰ বাণিজ্যিক বিমান পৰিবহণ খণ্ডৰ এগৰাকী অতি অভিজ্ঞ পাইলট। বৰ্তমান সংযুক্ত আৰৱ আমিৰশ্বাহীৰ ফ্লায়ডুবাইৰ ডাইৰেক্ট-এণ্ট্ৰি কেপ্তেইন হিচাপে কৰ্মৰত মচ্ছৰৰ ১৩ বছৰতকৈও অধিক সময়ৰ অভিজ্ঞতা থকাৰ লগতে ৯,৭৫০ ঘণ্টাৰো অধিক সময় উৰণৰ অভিলেখ আছে। তেওঁ মূলতঃ বোয়িং ৭৩৭ বিমান চলোৱাত পাৰ্গত। ফ্লায়ডুবাইত যোগদান কৰাৰ পূৰ্বে তেওঁ ভাৰতীয় বিমান প্ৰতিষ্ঠান এটাত এঘাৰ বছৰ ধৰি লাইন ট্ৰেইনিং কেপ্তেইন হিচাপে সেৱা আগবঢ়াইছিল।
এই ভয়ংকৰ ঘটনাটোৰ পাছত চৌদি আৰৱত আৱদ্ধ হৈ থকা যাত্ৰীসকলক ফ্লায়ডুবাইৰ এখন বিকল্প বিমানেৰে ইজৰাইললৈ লৈ যোৱা হয়। সংবাদ মাধ্যম চিএনএনৰ প্ৰতিবেদন অনুসৰি, বিমান প্ৰতিষ্ঠানটোৰ এগৰাকী মুখপাত্ৰই জানিবলৈ দিয়া মতে বুধবাৰৰ এই ঘটনাৰ বিস্তৃত তদন্ত বৰ্তমান অব্যাহত আছে আৰু তদন্ত প্ৰক্ৰিয়া সম্পূৰ্ণ নোহোৱা পৰ্যন্ত ফ্লায়ডুবায়ে সাময়িকভাৱে ইজৰাইললৈ যাতায়াত কৰা সকলো বিমানৰ চলাচল স্থগিত ৰাখিছে।
