গুজৰাটৰ বটাড জিলাত সংঘটিত বিষাক্ত সুৰা ট্ৰেজেডীয়ে ভাৰতত এনে সুৰা সেৱন কৰাৰ ফলত হোৱা মৃত্যুৰ ভয়াৱহ ছবি খন পুনৰ ফুটাই তুলিছে। গুজৰাটত বিষাক্ত সুৰা পান কৰি মৃত্যুৰ সংখ্যা এতিয়ালৈকে ৪০ জনৰো অধিক লোকৰ মৃত্যু ঘটিছে। বহুতে চিকিৎসালয়ত মৃত্যুৰ সৈতে যুঁজি আছে।
পশ্চিম বংগৰ হাওৰা জিলাতো কিছুদিন পূৰ্বে একেধৰণৰ দুৰ্ঘটনাই এক ডজন লোকৰ প্ৰাণ হৰি নিছিল। এই বছৰৰ আৰম্ভণিতে, হোলী উদযাপনৰ সময়ত বিষাক্ত সুৰা সেৱন কৰাৰ ফলত সমগ্ৰ বিহাৰত প্ৰায় ৪০ জন লোকৰ মৃত্যু হৈছিল। অথচ বিহাৰত সুৰা নিষিদ্ধ কৰা হৈছে। এনে সুৰা তৈয়াৰ কৰিবলৈ সস্তীয়া ডিষ্টিলড সুৰা (দেশী দাৰু) ঔদ্যোগিক এলকহল বা মিথানলৰ দ্বাৰা ভেজাল কৰা হয় ,যাতে ইয়াৰ নিচাযুক্ত শক্তি বৃদ্ধি কৰিব পাৰি। ৰাষ্ট্ৰীয় অপৰাধ ৰেকৰ্ড ব্যুৰো (এনচিআৰবি)ৰ তথ্যই দেখুৱাইছে যে ২০১৬ ৰ পৰা ২০২০ চনৰ ভিতৰতদেশত বিষাক্ত সুৰা পান কৰি ৬,১৭২ জন লোকৰ মৃত্যু হৈছিল। ইয়াৰ অৰ্থ হৈছে প্ৰতিদিনে তিনিদনৰো অধিক লোকৰ বিষাক্ত সুৰা পান কৰি মৃত্যু হয়।
কেৱল মধ্য প্ৰদেশতে ভাৰতৰ বিষাক্ত সুৰা পান কৰি হোৱা মৃত্যুৰ এক পঞ্চমাংশ ঘটনা ঘটিছে।ৰাজ্য খনত অতি কম দিনৰ ভিতৰতে বিষাক্ত সুৰা পান কৰি ১,২১৪ জন লোকৰ মৃত্যু ঘটিছে। মধ্য প্ৰদেশৰ পিছত আছে কৰ্ণাটক (৯০৯), পঞ্জাৱ (৭২৫), ছত্তীশগড় (৫০৫), আৰু হাৰিয়ানা (৪৭৬)। একে সময়তে দিল্লীত ৯৪ জন, গুজৰাটত ৫০ জন আৰু বিহাৰত ২১ জন লোকৰ বিষাক্ত সুৰা পানৰ ফলত অতি শেহতীয়াকৈ মৃত্যু হৈছে। ২০০৯ চনত সুৰাৰ বিষক্ৰিয়াৰ ফলত গুজৰাটত ১৩৬ জন লোকে প্ৰাণ হেৰুৱাইছিল। অনুসন্ধানত প্ৰকাশ পাইছে যে বোটাড জিলাৰ বিভিন্ন গাঁৱৰ লোকে বুটলেগাৰে মিথাইল এলকহল বা মিথানলৰ সৈতে পানী মিহলি কৰি নকল সুৰা প্ৰস্তুত কৰি আহিছে আৰু ইয়াক প্ৰতি পাউচত ২০ টকাত গাওঁবাসীক বিক্ৰী কৰি আহিছে।
মহাৰাষ্ট্ৰ, গোৱা, লাডাখ, লাক্ষদ্বীপত নকল সুৰাৰ ফলত এতিয়ালৈকে কোনো লোকৰ মৃত্যু হোৱাৰ খবৰ পোৱা হোৱা নাই। এনচিআৰবিৰ তথ্য অনুসৰি, মহাৰাষ্ট্ৰ, গোৱা, লাডাখ আৰু লক্ষদ্বীপ হৈছে ৰাজ্য আৰু কেন্দ্ৰীয় শাসিত অঞ্চল য’ত নকল সুৰা সেৱনৰ ফলত হোৱা মৃত্যুৰ সংখ্যা শূন্য।
উত্তৰ-পূবৰ কেইবাখনো ৰাজ্যই এই ক্ষেত্ৰত ভাল প্ৰদৰ্শন কৰিছে। অৰুণাচল প্ৰদেশ, মণিপুৰ আৰু নাগালেণ্ডত এতিয়ালৈকে বিষাক্ত সুৰা পান কৰি এজনকৈ লোকৰ মৃত্যুৰ তথ্য আছে। পৰিসংখ্যাই দেখুৱাইছেযে ভাৰতত ২০১৭ চনত ১,১৫০ জন লোকৰ মৃত্যু বিষাক্ত সুৰা পান কৰাৰ ফলত হৈছিল।এই সংখ্যা ২০১৮ চনত ১,৩৬৫; ২০১৯ চনত ১,২৯৬ আছিল।২০২০ চনৰ তথ্যই দেখুৱাইছে যে ৮৯৫ জন পুৰুষ আৰু ৫২ গৰাকী মহিলাই বিষাক্ত সুৰা সেৱন কৰাৰ পিছত মৃত্যু বৰণ কৰিছিল।
মুম্বাইত ২০১৫ চনৰ জুন মাহত বিষাক্ত সুৰা সেৱন কৰাৰ পিছত মালৱানীৰ এটা বস্তিত ১০৬ জন লোকৰ মৃত্যু হৈছিল, যাৰ ভিতৰত বেছিভাগ আছিল নিৰ্মাণ শ্ৰমিক, নৰ্দমা পৰিষ্কাৰ কৰা লোক আৰু চুইপাৰ । ২০১১ চনত পশ্চিম বংগৰ দক্ষিণ ২৪ পৰগণা জিলাৰ সংগ্ৰামপুৰত আন বিষাক্ত সুৰাৰ ট্ৰেজেডীত ১৭২ জন লোকৰ প্ৰাণ হেৰুৱাইছিল। ২০০৮ চনৰ মে মাহত কৰ্ণাটক আৰু তামিলনাডুত অবৈধ দোকানৰ পৰা নকল সুৰা সেৱন কৰি প্ৰায় ১৮০ জন লোকৰ মৃত্যু হয়।
