দেশে লাভ কৰিলে এগৰাকী মতুন উপ ৰাষ্ট্ৰপতি। আজি অনুষ্ঠিত উপ ৰাষ্ট্ৰপতিৰ নিৰ্বাচনত বিজেপি নেতৃত্বাধীন এনডিএ মিত্ৰজোঁটৰ প্ৰক্ষেপিত প্ৰাৰ্থী জগদ্বীপ ধনখৰ বিৰোধী দলৰ মনোনীত প্ৰাৰ্থী মাৰ্গাৰেট আলভাতকৈ বৃহৎ ভোটৰ ব্যৱধানত জয়ী হয়।
আজি দিনৰ ১০ বজাৰ পৰা উপ-ৰাষ্ট্ৰপতি নিৰ্বাচনৰ বাবে ভোটগ্ৰহণ আৰম্ভ হৈছিল৷ বিজেপি নেতৃত্বাধীন এনডিএ- এই পশ্চিম বংগৰ ৰাজ্যপাল হিচাপে কাৰ্যনিৰ্বাহ কৰি থকা জগদ্বীপ ধনখৰক উপ-ৰাষ্ট্ৰপতি পদৰ বাবে মনোনীত কৰিছিল।
আনহাতে বিৰোধীৰ উমৈহতীয়া প্ৰাৰ্থী হিচাপে জ্যেষ্ঠ কংগ্ৰেছ নেত্ৰী মাৰ্গাৰেট আলভাক নিৰ্বাচনত থিয় কৰোৱা হৈছিল৷
আজি ১০ বজাৰ পৰা আৰম্ভ হোৱা ভোটগ্ৰহণত লোকসভাৰ ৫৪৩ গৰাকী নিৰ্বাচিত আৰু দুগৰাকী মনোনীত সদস্যৰ লগতে ৰাজ্যসভাৰ ২৩৩ গৰাকী নিৰ্বাচিত আৰু ১২ গৰাকী মনোনীত সদস্যই ভোটদান কৰে৷
সন্ধিয়া ৫ বজালৈকে এই ভোটগ্ৰহণ প্ৰক্ৰিয়া অব্যাহত থাকে। ভোটগ্ৰহণ অন্ত পৰাৰ পিছতেই ভোট গণনা অনুষ্ঠিত হয়৷ ধানখাড়ে মুঠ ৫৮২ টা ভোট লাভ কৰাৰ বিপৰীতে আলভাই ১৮২ টা ভোট লাভ কৰে।
নৱ নিৰ্বাচিত উপ-ৰাষ্ট্ৰপতিগৰাকীক ৰাষ্ট্ৰপতি দ্ৰৌপদী মুৰ্মু, প্ৰধানমন্ত্ৰী নৰেন্দ্ৰ মোদীকে ধৰি দেশৰ কেইবাগৰাকীও ৰাজনৈতিক নেতাই শুভেচ্ছা জনাইছে।
উল্লেখ্য যে অহা ১১ আগষ্টত বৰ্তমানৰ উপ ৰাষ্ট্ৰপতি এম ভেংকায়া নাইডুৰ কাৰ্যকাল সমাপ্ত হ’ব৷ একেদিনাই দেশৰ নতুন উপ ৰাষ্ট্ৰপতি হিচাপে ধনখৰে শপত গ্ৰহণ কৰিব।
