কাশ্মীৰত বিজেপি বিৰোধী শক্তি হিচাবে পৰগণিত হোৱা গুপকাৰ মিত্ৰজোঁটত আৰম্ভ হৈছে বিসম্বাদ। ফলত মিত্ৰজোঁটৰ পৰা ওলাই অহাৰ সিদ্ধান্ত লৈছে নেচনেল কনফাৰেন্স দলে। দলটোৰ তৰফৰ পৰাই এই কথা আনুষ্ঠানিকভাবে ঘোষণা কৰা হৈছে।
চলিত বৰ্ষতে কাশ্মীৰত বিধানসভা নিৰ্বাচন অনুষ্ঠিত হোৱাৰ সম্ভাৱনা আছে। ইয়াৰ মাজতে নেচনেল কনফাৰেন্সে জম্মু-কাশ্মীৰত পিপলছ এলায়েন্স ফৰ গুপকাৰ ডিক্লেৰেচন (পিএজিডি)ৰ পৰা আঁতৰি যোৱাৰ সিদ্ধান্ত ঘোষণা কৰাত স্বাভাৱিকতে উৎফুল্লিত হৈ পৰিছে বিজেপি।
শেহতীয়াকৈ নেচনেল কনফাৰেন্সৰ প্ৰাদেশিক সমিতিৰ বৈঠকত শীঘ্ৰে অনুষ্ঠিত হ’বলগীয়া বিধানসভা নিৰ্বাচনত দলটোৱে নিজাববীয়াকৈ ৯০ খন আসনত প্ৰতিদ্বন্দিতা কৰাৰ সিদ্ধান্ত লৈছে। পিডিপি নেতা মেহবুবা মুফতি আৰু নেচনেল কনফাৰেন্সৰ সভাপতি ফাৰুক আব্দুল্লাই গুপকাৰ মিত্ৰজোঁটৰ দলসমূহে ঐক্যবদ্ধভাৱে নিৰ্বাচনত যুঁজিব বুলি কৈ আহিছিল যদিও এতিয়া নেচনেল কনফাৰেন্সে মিত্ৰজোঁটৰ পৰা ওলাই অহাত মিত্ৰজোঁটৰ ৰাজনৈতিক অংকত আউল লাগিছে।
উল্লেখ্য কাশ্মীৰৰ পৰা সংবিধানৰ ৩৭০ অনুচ্ছেদ বাতিলৰ পিছত বিধানসভাৰ নিৰ্বাচন অনুষ্ঠিত হোৱা নাই।বিশেষকৈ ২০১৮ চনত বিজেপিয়ে মেহবুবা মুফটিৰ চৰকাৰৰ পৰা সমৰ্থন প্ৰত্যাহাৰ কৰাৰ পিছৰে পৰা কাশ্মীৰত নিৰ্বাচন অনুষ্ঠিত হোৱা নাই। কিন্তু এইবাৰ উপত্যকাটোত নিৰ্বাচন অনুষ্ঠিত কৰাৰ বাবে চৰকাৰে ইতিবাচক ইংগিত দি আহিছে। উল্লেখ্য ২০২১ চনত কাশ্মীৰত জিলা উন্নয়ন পৰিষদৰ নিৰ্বাচনত গুপকাৰ মিত্ৰজোঁটে ১০০ খনৰো অধিক আসন লাভ কৰাৰ লগতে বিজেপিয়ে লাভ কৰিছিল ৭৪ খন আসন।
ইপিনে দিল্লীৰ সৈতে এঘৰী যুঁজাৰ বাবে সাজু হোৱা কাশ্মীৰ উপত্যকাৰ ছটাকৈ বিৰোধী ৰাজনৈতিক দলৰ মাজত ভাঙন আৰম্ভ হোৱাত উপত্যকাটোৰ ৰাজনীতিয়ে নতুন পাক লৈছে।
২০১৯ চনৰ ৫ আগষ্টৰ দিনা কেন্দ্ৰীয় চৰকাৰে কাশ্মীৰৰ পৰা সংবিধানৰ ৩৭০ অনুচ্ছেদৰ লগতে ৩৫(ক) অনুচ্ছেদ বাতিলৰ পিছতে গুপকাৰ মিত্ৰোঁট গঠন কৰা হৈছিল।
মিত্ৰজোঁটত ৬ টা দলৰ ভিতৰত দুটা সৰ্বভাৰতীয় দল ক্ৰমে কংগ্ৰেছ আৰু চিপিএমো আছে।
আন দল কেইটা আছিল ক্ৰমে নেচনেল কনফাৰেন্স,পিপ’লছ ডেম’ক্ৰেটিক পাৰ্টী,আৱামী নেচনেল কনফাৰেন্স আৰু জম্মু-কাশ্মীৰ পিপ’লছ কনফাৰেন্স। পিছে নেচনেল কনফাৰেন্সে মিত্ৰজোঁট ত্যাগ কৰাত মিত্ৰজোঁটৰ শক্তি ভালেখিনি হ্ৰাস পাব বুলি ধাৰণা কৰা হৈছে।
