২০২৪ চনৰ লোকসভা নিৰ্বাচনৰ পূৰ্বে দেশত বিজেপি বিৰোধী তৃতীয় মৰ্চা গঠনৰ বাবে তৎপৰ হৈ পৰিছে তেলেংগানাৰ মুখ্যমন্ত্ৰী কে চন্দ্ৰশেখৰ ৰাও । ৰাষ্ট্ৰপতি নিৰ্বাচনৰ আগৰে পৰা ৰাৱে মমতা বেনাৰ্জীকে ধৰি বহু ৰাজনীতিকক সাক্ষাৎ কৰি আহিছে। শেহতীয়াকৈ তেওঁ বিহাৰৰ মুখ্যমন্ত্ৰী নীতিশ কুমাৰক সাক্ষাৎ কৰি বিজেপি বিৰোধী ঐক্য গঠনৰ প্ৰক্ৰিয়াক আগুৱাই নিব বিচাৰিছে।
তেওঁ সকলোকে “বিজেপি মুক্ত ভাৰত” সৃষ্টিত অৰিহণা যোগাবলৈ আহ্বান জনায়। দেশখনে সন্মুখীন হোৱা সমস্যাৰ বাবে কেন্দ্ৰৰ গেৰুৱা দলৰ চৰকাৰকে দোষাৰোপ কৰে ৰাৱে।
পাটনাত নীতিশ কুমাৰৰ সৈতে একেলগে অংশগ্ৰহণ কৰা এখন সংবাদমেলত ৰাৱে নীতিশ কুমাৰক “বড়ে ভাই” (ডাঙৰ ভাতৃ) বুলি অভিহিত কৰে। ৰাৱে ঐক্যবদ্ধ বিৰোধীদলৰ নেতৃত্ব কোনে ল’ব আৰু কংগ্ৰেছক লগত লোৱা হ’ব নে নাই সেই সম্পৰ্কীয় প্ৰশ্নৰো উত্তৰ দিয়ে।
সংবাদমেলত ৰাৱে কয়”এই বিষয়বোৰ যথা সময়ত নিৰ্ণয় কৰা হ’ব। আমি কোনো খৰখেদা নকৰোঁ”।
ৰাৱে মোদীৰ চৰকাৰে কোনো বিৰোধী দলৰ সৈতে আলোচনা নকৰাকৈ সশস্ত্ৰ বাহিনীত নিযুক্তিৰ বাবে “অগ্নিপথ” আঁচনি গ্ৰহণ কৰা বুলি আজি পুনৰবাৰ অভিযোগ কৰে।
“কেচিআৰ” নামেৰে জনাজাত টিআৰএছৰ মুৰব্বীগৰাকীয়ে বিহাৰৰ বিশেষ শ্ৰেণীৰ মৰ্যাদাৰ দাবী “প্ৰত্যাখ্যান” কৰাৰ বাবে বিজেপিক সমালোচনা কৰে।চৰকাৰী প্ৰতিষ্ঠানৰ ব্যক্তিগতকৰণৰ বাবে আৰু ৰাজ্যসমূহৰ উদ্বেগৰ প্ৰতি উদাসীনতা দেখুওৱাৰ বাবেও কেন্দ্ৰক তেওঁ সমালোচনা কৰে।
উল্লেখ্য কেচিআৰে বহু বছৰ আগতে আমেৰিকা ভ্ৰমণৰ সময়ত “আব কি বাৰ ট্ৰাম্প চৰকাৰ” উচ্চাৰণ কৰাৰ বাবে মোডীক উপহাস কৰিছিল, ইয়াক “কূটনৈতিক ভুল” বুলি অভিহিত কৰিছিল। সংবাদমেলত ৰাৱে কয়, “নীতিশ কুমাৰ দেশৰ জ্যেষ্ঠতম আৰু শ্ৰেষ্ঠ নেতাসকলৰ ভিতৰৰে এজন।
অৱশ্যে গুৰুত্বপূৰ্ণ বিষয়বোৰ সন্দৰ্ভত পিছত সিদ্ধান্ত লম”। উল্লেখ্য ভাৰতক বিজেপি মুক্ত কৰি তোলাৰ বাবে দেশৰ বহু অনা-বিজেপি দলে একত্ৰিত হোৱাৰ আখৰা চলাই আছে। অৱশ্যে সেয়া এতিয়াও মজবুত হৈ উঠা নাই। ২০২৪ ৰ নিৰ্বাচনৰ পূৰ্বে তৃতীয় মৰ্চা গঠন হ’লে বিহাৰকে ধৰি দেশৰ কেইবা খনো ৰাজ্যত বিজেপি শলঠেকত পৰিব বুলি ধাৰণা কৰা হৈছে।
