উত্তৰ-পূবৰ ৰাজ্যকেইখনৰ মুখ্যমন্ত্ৰীসকলক তিনিদিনীয়া ভ্ৰমণৰ বাবে আমন্ত্ৰণ জনাইছে চুবুৰীয়া ৰাষ্ট্ৰ বাংলাদেশে। বাংলাদেশ আৰু উত্তৰ-পূব অঞ্চলটোৰ মাজৰ সম্পৰ্ক অধিক শক্তিশালী কৰাৰ উদ্দেশ্যে এই আমন্ত্ৰণ আগবঢ়াইছে দেশখনে।
বাংলাদেশৰ বৈদেশিক পৰিক্ৰমা মন্ত্ৰী চহৰিয়াৰ আলমে এই বিষয়ে সদৰী কৰিছে। উল্লেখ্য যে শেহতীয়াকৈ বাংলাদেশৰ প্ৰধানমন্ত্ৰী শ্বেখ হাছিনাই ভাৰত ভ্ৰমণ সমাপ্ত কৰিছে।
প্ৰধানমন্ত্ৰী গৰাকীৰ এই ভ্ৰমণৰ পাছতে দেশখনে সীমান্তৱৰ্তী অঞ্চলটোৰ মুখ্যমন্ত্ৰী কেইগৰাকীলৈ এই নিমন্ত্ৰণ আগবঢ়াইছে।
বাংলাদেশ আৰু উত্তৰ-পূব ভাৰতৰ মাজত ১৮৭৯ কিলোমিটাৰজুৰি বিস্তৃত হৈ থকা আন্তঃৰাষ্ট্ৰীয় সীমান্ত আছে। সেয়েহে অঞ্চলটোৰ সৈতে এক উন্নত সম্পৰ্ক ৰক্ষা কৰাটো দেশখনৰ বাবে যথেষ্ট গুৰুত্বপূর্ণ বিবেচিত হয়।
বাংলাদেশ আৰু উত্তৰ-পূৰ্বাঞ্চলৰ কেইখনমান ৰাজ্যই ইতিমধ্যে বাংলাদেশৰ সৈতে বাণিজ্য আৰু সংযোগৰ ক্ষেত্ৰত সম্পৰ্ক স্থাপন কৰিছে।
বিগত এপ্ৰিল মাহত বাংলাদেশে ভাৰতক দেশখনৰ দুটা গুৰুত্বপূৰ্ণ জাহাজ বন্দৰ, ক্ৰমে মংলা আৰু চিটাগং বন্দৰ ব্যৱহাৰ কৰিবলৈ অনুমতি দিছিল।
ভাৰতে বাংলাদেশৰ চিটাগং বন্দৰৰ মাজেৰে পূব ভাৰতৰ ৰাজ্যসমূহৰ পৰা উত্তৰ-পূৰ্বাঞ্চললৈ পৰীক্ষামূলকভাৱে সফলতাৰে কাৰ্গো ৰপ্তানি কৰিছিল।
