Wipro fires 300 employees for moonlighting উইপ্ৰোৱে একে সময়তে ইয়াৰ ৩০০ জন কৰ্মচাৰীক চাকৰিৰ পৰা ছাটাই কৰিছে। সেই কৰ্মচাৰীসকলৰ অপৰাধ তেওঁলোকে ‘মুনলাইটিং’ কৰি আছিল। উইপ্ৰোৰ অধ্যক্ষ ৰিশাদ প্ৰেমজীয়ে কয় যে ৩০০ কৰ্মচাৰীয়ে মুনলাইটিং আৰু আনকি প্ৰতিদ্বন্দী কোম্পানীৰ বাবেও কাম কৰি থকাটো কোম্পানীটোৱে চিনাক্ত কৰিবলৈ সক্ষম হৈছে। এনে কৰ্মচাৰীসকলৰ বাবে কোম্পানীত কোনো স্থান নাই।
দৰাচলতে মুনলাইটিং মানেনো কি? যেতিয়া এটা কোম্পানীত কাম কৰা কৰ্মচাৰী এজনে একে সময়তে আন এটা কোম্পানীৰ বাবে কাম কৰে তাকেই মুনলাইটিং বুলি কোৱা হয়।
এই ক্ষেত্ৰত মুখ্য কোম্পানীটোৰ কৰ্তৃপক্ষক সম্পূৰ্ণ অন্ধকাৰত ৰাখি এই কাম কৰা হয়। এনে কাৰ্যকলাপ ডাঙৰ কোম্পানীবোৰে গ্ৰহণ নকৰে কিয়নো তেওঁলোকৰ দাবী যে ই ‘উৎপাদনশীলতা’ প্ৰভাৱিত কৰে।
মহামাৰীৰ সময়ত ব্যাপকভাৱে চৰ্চালৈ আহিছিল মুনলাইটিং। কিয়নো সেই সময়ত তথ্য প্ৰযুক্তি কোম্পানীবোৰে তেওঁলোকৰ কৰ্মচাৰীসকলক ঘৰৰ পৰা কাম কৰাৰ স্বাধীনতা দিছিল (ৱৰ্ক ফ্ৰম হ’ম)। ইয়াত মূল কোম্পানীক ফাঁকি দি আন ঠাইত অংশকালীন কাম কৰি উপাৰ্জনৰ পথ প্ৰশস্ত কৰিছিল।
There is a lot of chatter about people moonlighting in the tech industry. This is cheating – plain and simple.
— Rishad Premji (@RishadPremji) August 20, 2022
উইপ্ৰোৰ দৰে মুনলাইটিং-ত আন এটা প্ৰযুক্তি প্ৰতিষ্ঠান ইনফোচিছেও কঠোৰ স্থিতি গ্ৰহণ কৰিছিল। কৰ্মচাৰীসকলক ই-মেইলযোগে জনোৱা হৈছিল যে তেওঁলোকে কোম্পানীক অৱগত নকৰাকৈ আন কোনো চাকৰিত সোমাব নোৱাৰিব। যদি এই নিয়ম উলংঘা কৰা হয় তেন্তে চাকৰি হেৰুৱাব লাগিব।
