দেশত ক্ৰমাৎ ভয়াৱহভাৱে বৃদ্ধি পাইছে নাৰী নিগ্ৰহৰ ঘটনা। ক্ৰমশ: নাৰীজনিত অপৰাধ তথা ধৰ্ষণৰ ঘটনা দ্ৰুতগতিত বৃদ্ধি পাইছে দেশৰ বিভিন্ন প্ৰান্তত। শনিবাৰে নিশা ঝাৰখণ্ডৰ পালামুৰ সতবাৰৱা অঞ্চলত সংঘটিত হয় এনে এক নৃশংস ধৰ্ষণকাণ্ড। অঞ্চলটোৰ বাকোৰিয়া-ভালৱাহি নামৰ এখন গাঁৱৰ ওচৰত দলবদ্ধ ধৰ্ষণৰ বলি হৈছে এগৰাকী ২২ বছৰীয়া মহিলা।
প্ৰকাশিত খবৰ অনুসৰি, ছয় দুৰ্বৃত্তই তেওঁৰ স্বামীৰ সন্মুখতে প্ৰায় চাৰি ঘণ্টা ধৰি মহিলাগৰাকীক উপৰ্যুপুৰি ধৰ্ষণ কৰে। ঘটনা সন্দৰ্ভত জানিব পৰা মতে শনিবাৰে নিশা মহিলাগৰাকীয়ে পাৰিবাৰিক বিবাদৰ ফলশ্ৰুতিত স্বামীগৃহ এৰি নিজৰ মাতৃগৃহলৈ ৰাওনা হৈছিল।
মহিলাগৰাকীৰ স্বামীয়ে সুৰক্ষিতভাৱে পত্নীক মাতৃগৃহত থোৱাৰ উদ্দেশ্যে তেওঁৰ সৈতেই যাত্ৰা কৰিছিল। আনহাতে উভতি অহাৰ পথত সহায় হোৱাকৈ তেওঁ নিজ ভাতৃকো লগত লৈ ঘৰৰ পৰা ওলাই গৈছিল।
কিন্তু যাত্ৰাপথতে ছয়গৰাকী লোকে তেওঁলোকক আগভেটি ধৰি তেওঁলোকৰ লগত থকা মোবাইল ফোন কাঢ়ি লোৱাৰ লগতে শাৰীৰিকভাৱেও আক্ৰমণ কৰে। ইয়াতে ক্ষান্ত নাথাকি দুৰ্বৃত্ত কেইগৰাকীয়ে দুয়োগৰাকী ব্যক্তিত মাটিত পেলাই হেঁচি ধৰি মহিলাগৰাকীক তেওঁলোকৰ সন্মুখতে প্ৰায় চাৰি ঘণ্টা ধৰি দলবদ্ধ ভাৱে বলাৎকাৰ কৰে।
বলাৎকাৰ পিছতে দুৰ্বৃত্ত কেইজনে মহিলাগৰাকী আৰু তেওঁৰ স্বামীৰ ভাতৃক বাইকত উঠাই আন কোনো ঠাইলৈ লৈ যায় আৰু মহিলাগৰাকীৰ স্বামীক ঘটনাস্থলীতে পেলাই থৈ যায়। আনহাতে মহিলাগৰাকীয়ে। কিছুদূৰ যোৱাৰ পাছতে পথৰ কাষত এখন বাহন ৰখাই থোৱা দেখি চিঞৰিবলৈ আৰম্ভ কৰে।
এনে পৰিস্থিতিত তেওঁক বাইকত উঠাই অনা দুৰ্বৃত্ত চালকগৰাকীয়ে ভাৰসাম্য হেৰুৱাই পেলায় আৰু মাটিত বাগৰি পৰে। ইফালে মহিলাগৰাকীৰ চিঞৰ শুনি স্থানীয় লোকসকল সেই স্থানত উপস্থিত হয় আৰু দুৰ্বৃত্ত কেইগৰাকীক আগুৰি ধৰে।
অৱশ্যে বাকী কেইগৰাকী দুৰ্বৃত্ত পৰাই সাৰিবলৈ সক্ষম হয় যদিও মহিলাগৰাকীক বাইকত উঠাই অনা ব্যক্তিগৰাকী ৰাইজৰ হাতত পৰে আৰু তেওঁক উত্তেজিত ৰাইজে গণপ্ৰহাৰ কৰে। আনহাতে মহিলাগৰাকীৰ স্বামীয়ে শনিবাৰে নিশা মণিকা আৰক্ষী চকীত উপস্থিত হৈ ঘটনাৰ বিষয়ে আৰক্ষীক অৱগত কৰে।
ঘটনা সন্দৰ্ভত আৰক্ষীয়ে ভোলা ৰাম আৰু ধৰ্মেন্দ্ৰ ৰাম নামৰ দুগৰাকী অভিযুক্তক আটক কৰিছে। ঘটনাৰ সময়ত অভিযুক্ত কেইগৰাকীয়ে ব্যৱহাৰ কৰা এখন বাইকো স্থানীয় সতবৰৱা আৰক্ষীয়ে উদ্ধাৰ কৰিছে।
গোচৰটোৰ সৈতে জড়িত আন কেইগৰাকীক অভিযুক্তৰ সন্ধানত অভিযান আৰম্ভ কৰা হৈছে বুলি আৰক্ষীয়ে জানিবলৈ দিছে। আনহাতে আৰক্ষীৰ তত্বাৱধানত মহিলাগৰাকীৰ স্বাস্থ পৰীক্ষা সম্পন্ন কৰাৰ পিছত তেওঁক নিজৰ খুৰাকৰ ঘৰত থোৱাৰ ব্যৱস্থা কৰে আৰক্ষীয়ে।
