হিন্দু ধৰ্মালৱম্বী লোকৰ পবিত্ৰ মহালয়া উদযাপনৰ উপলক্ষে যাত্ৰাৰ সময়তে দেওবাৰে বাংলাদেশৰ পঞ্চগড় জিলাৰ কৰটৱা নদীত সংঘটিত ভয়াৱহ নাও দুৰ্ঘটনাত নিহতৰ সংখ্যা সোমবাৰে সন্ধিয়ালৈ ৫১ গৰাকীলৈ বৃদ্ধি পাইছে।
এই শোকাৱহ নাও দুৰ্ঘটনাৰ তদন্তৰ বাবে জিলা প্ৰশাসনে গঠন কৰি দিয়া তদন্ত সমিতিৰ নেতৃত্ব প্ৰদান কৰা পঞ্চগড়ৰ অতিৰিক্ত উপায়ুক্ত (ৰাজহ) দীপাংকৰ ৰয়ে সন্ধিয়া ৫ বজালৈকে ৪৩ টা মৃতদেহ উদ্ধাৰ কৰা হৈছে বুলি জানিবলৈ দিছিল যদিও ইয়াৰ পিছতে পুনৰ আন আঠটা মৃতদেহ নদীৰ পৰা উদ্ধাৰ হয়।
বৰ্তমানলৈকে দুৰ্ঘটনাত প্ৰাণ হেৰুওৱা ১৪ টি শিশু, ২৪ গৰাকী মহিলা আৰু ১২ গৰাকী পুৰুষৰ মৃতদেহ উদ্ধাৰ কৰা হৈছে বুলি বিষয়াগৰাকীয়ে লগতে উল্লেখ কৰে। ইতিমধ্যে উদ্ধাৰ হোৱা মৃতদেহসমূহ মৃতকৰ পৰিয়ালক হস্তান্তৰ কৰা হৈছে বুলি ৰয়ে লগতে কয়।
আনহাতে দুৰ্ঘটনাত পতিত নাওখনত থকা ৪১ গৰাকী লোক এতিয়াও সন্ধানহীন হৈ আছে বুলি ৰয়ে সংবাদ মাধ্যমৰ আগত উল্লেখ কৰিছিল যদিও যাত্ৰীসকলৰ আত্মীয়ই দিয়া হিচাপ মতে ৫৮ যাত্ৰী সন্ধানহীন হৈ আছে বুলিও সংবাদ মাধ্যমত প্ৰকাশ পাইছে।
উল্লেখ্য যে দুৰ্ঘটনাস্থলীৰ পৰা উদ্ধাৰ কৰা যাত্ৰী আৰু স্থানীয় লোকসকলে জানিবলৈ দিয়া মতে হিন্দু কেলেণ্ডাৰৰ এক পবিত্ৰ অনুষ্ঠান মহালয়া উপলক্ষে প্ৰাৰ্থনাৰ উদ্দেশ্যে স্থানীয় অঞ্চলসমূহৰ হিন্দু সম্প্ৰদায়ৰ লোকসকল আউলিয়া ঘাটৰ পৰা বধেশ্বৰ মন্দিৰ অভিমুখে যাত্ৰা কৰিছিল।
নাওখনত বহন ক্ষমতাতকৈ অধিক যাত্ৰী কঢ়িওৱাৰ ফলত কৰটৱা নদীৰ মাজতে নাওখন ডুব যায়। দুৰ্ঘটনাত পতিত নাওখনৰ কেইবাগৰাকীও যাত্ৰীয়ে সাঁতুৰি পাৰলৈ উঠিবলৈ সক্ষম হৈছিল।
স্থানীয় বোদা আৰক্ষী থানাৰ ভাৰপ্ৰাপ্ত বিষয়াই উল্লেখ কৰা মতে সন্ধানহীন লোকসকলৰ উদ্ধাৰৰ বাবে উদ্ধাৰ অভিযান চলাই থকা হৈছে। দুৰ্ঘটনাটোৰ তদন্তৰ বাবে জিলা প্ৰশাসনে তাৎক্ষণিকভাৱে পাঁচ জনীয়া এটা তদন্ত দল গঠন কৰি দিছিল।
