মন্দিৰৰ পৰা উভতি অহাৰ পথত কানপুৰত ভয়ংকৰ পথ দুৰ্ঘটনা; ২৭ জন ভক্তৰ মৃত্যু, আহত ২২জন

At least 27 killed as tractor-trolley falls উত্তৰ প্ৰদেশৰ কানপুৰ জিলাত শনিবাৰে এখন ট্ৰেক্টৰ দুৰ্ঘটনাগ্ৰস্ত হৈ উলটি খাই পৰে। ট্ৰেক্টৰ ট্ৰলীখন নিয়ন্ত্ৰণ হেৰুৱাই এটা পুখুৰীত গৈ পৰে। এই ঘটনাত কমেও ২৭ জন লোক নিহত হৈছে। মৃতসকলৰ ভিতৰত সকলো মহিলা বা শিশু আছিল।

ট্ৰেক্টৰখনত মুঠ ৫০ জন লোক আছিল। ট্ৰেক্টৰখন উন্নাওৰ চন্দ্ৰিকা দেৱী মন্দিৰৰ পৰা উভতি আহি আছিল। সেই সময়তে কানপুৰৰ ঘাটামপুৰ অঞ্চলত এই শোকাৱহ দুৰ্ঘটনাটো সংঘটিত হয়।

ঘটনাটোৰ পিছত আৰক্ষী গৈ ঘটনাস্থলীত উপস্থিত হৈ স্থানীয় লোকৰ সহযোগত উদ্ধাৰ অভিযান চলায়। আহতসকলক স্থানীয় চিকিৎসালয়ত ভৰ্তি কৰোৱা হয়।

প্ৰধানমন্ত্ৰীৰ কাৰ্যালয়ে মৃতকৰ নিকটাত্মীয়ক ২ লাখ টকাৰ ক্ষতিপূৰণ ঘোষণা কৰিছে। আনহাতে, আহতসকলৰ বাবে ৫০,০০০ টকাৰ ক্ষতিপূৰণ ঘোষণা কৰিছে।

ইপিনে, ৰাজ্যখনৰ মুখ্যমন্ত্ৰী যোগী আদিত্যনাথেও দুৰ্ঘটনাত প্ৰাণ হেৰুওৱা সকলৰ বাবে শোক প্ৰকাশ কৰিছে। তেওঁ জ্যেষ্ঠ মন্ত্ৰী ৰাকেশ চাচান আৰু অজিত পালক উদ্ধাৰ অভিযানত তদাৰক কৰিবলৈ দুৰ্ঘটনাস্থলীলৈ পঠিয়ায়।

লক্ষ্ণৌত এগৰাকী চৰকাৰী মুখপাত্ৰই জানিবলৈ দিয়ে যে মুখ্যমন্ত্ৰীয়ে ব্যক্তিগতভাৱে উদ্ধাৰ অভিযান নিৰীক্ষণ কৰে।