চৰিত্ৰহীন! প্ৰধানমন্ত্ৰীৰ অনুষ্ঠানত উপস্থিত থাকিবলৈ বিচৰা হ’ল সাংবাদিকসকলৰ চৰিত্ৰৰ প্ৰমান পত্ৰ

Character certificates for Journalists বাতৰি অনুসৰি বুধবাৰে হিমাচল প্ৰদেশত প্ৰধানমন্ত্ৰী নৰেন্দ্ৰ মোদীৰ দিনজোৰা কাৰ্যসূচীৰ বাতৰি সংগ্ৰহ কৰিবলৈ যাব বিচৰা সকলো সাংবাদিকক প্ৰৱেশ তথা নিৰাপত্তা পাছৰ বাবে এখন চৰিত্ৰৰ প্ৰমাণপত্ৰ দেখুৱাবলৈ কোৱা হৈছে। ৰাষ্ট্ৰীয় সংবাদ মাধ্যমৰ বাতৰিত এইকথা প্ৰকাশ পাইছে।

জিলা প্ৰশাসনে এক বিতৰ্কিত নিৰ্দেশনাত কেৱল ব্যক্তিগত মালিকানাধীন ছপা, ডিজিটেল আৰু নিউজ চেনেলৰ সাংবাদিকসকলকেই নহয়, অল ইণ্ডিয়া ৰেডিঅ’ (AIR) আৰু দূৰদৰ্শনকে ধৰি চৰকাৰী সংবাদ মাধ্যমৰ প্ৰতিনিধিসকলকো “চৰিত্ৰ প্ৰমাণীকৰণ”ৰ প্ৰমাণপত্ৰ আনিবলৈ কৈছে।

যোৱা ২৯ ছেপ্টেম্বৰত এই সন্দৰ্ভত আৰক্ষীয়ে এক আনুষ্ঠানিক জাননীও জাৰি কৰিছিল।

লগতে পঢ়ক: যুদ্ধ বিৰোধী পোষ্টাৰকলৈ চৰ্চালৈ অহা ৰাছিয়াৰ মহিলা সাংবাদিকক পলাতক ঘোষণা

জাননীখনত জিলা জনসংযোগ বিষয়াক (DIPRO) সকলো প্ৰেছ সংবাদদাতা, ফটোগ্ৰাফাৰ, ভিডিঅ’গ্ৰাফাৰ আৰু দূৰদৰ্শন আৰু অল ইণ্ডিয়া ৰেডিঅ’ৰ দলৰ এখন তালিকা “তেওঁলোকৰ চৰিত্ৰ প্ৰমাণীকৰণৰ প্ৰমাণপত্ৰ”ৰ সৈতে দাখিল কৰিবলৈ কোৱা হৈছিল।

“চৰিত্ৰ প্ৰমাণীকৰণৰ প্ৰমাণপত্ৰ ১ অক্টোবৰৰ ভিতৰত বিলাসপুৰৰ চিআইডিৰ উপ আৰক্ষী অধীক্ষকৰ কাৰ্যালয়লৈ প্ৰেৰণ কৰিব লাগিব। সমাৱেশ বা সভাৰ ভিতৰত তেওঁলোকৰ প্ৰৱেশাধিকাৰ বিষয়টো কাৰ্যালয়ে নিৰ্ধাৰণ কৰিব,”-জাননীখনত কোৱা হয়।

আৰক্ষীৰ জাননীৰ সন্দৰ্ভত প্ৰতিক্ৰিয়া ব্যক্ত কৰি আম আদমী পাৰ্টিৰ মুখপাত্ৰ পংকজ পণ্ডিতে কয় যে তেওঁৰ ২২ বছৰৰ সাংবাদিকতাৰ কেৰিয়াৰত প্ৰথমবাৰৰ বাবে তেওঁ এনে এক উদ্ভট দাবীৰ সাক্ষী হৈছে।

লগতে পঢ়ক: কিম জঙৰ কীৰ্তি! এইবাৰ জাপানৰ ওপৰেৰে বেলিষ্টিক মিছাইল নিক্ষেপ কৰিলে উত্তৰ কোৰিয়াই

“মোডীজীয়ে প্ৰথমবাৰৰ বাবে ৰাজ্যখন ভ্ৰমণ কৰা নাই। চৰিত্ৰৰ প্ৰমাণপত্ৰ প্ৰদৰ্শন কৰাৰ দাবী অপমানজনক আৰু এয়া সংবাদ মাধ্যমৰ কাৰ্যকলাপ নিয়ন্ত্ৰণ কৰাৰ প্ৰয়াস,”-পণ্ডিতে কয়।

হিমাচল কংগ্ৰেছ কমিটিৰ মুখ্য মুখপাত্ৰ নৰেশ চৌহানেও প্ৰশাসনৰ এই দাবীক গৰিহণা দিয়ে আৰু কয় যে এই পদক্ষেপ সংবাদ মাধ্যমৰ স্বাধীনতাৰ পৰিপন্থী।

বাতৰি অনুসৰি, বিলাসপুৰৰ জনসংযোগ বিষয়াগৰাকীয়ে নিৰাপত্তা পাছ জাৰী কৰিবলৈ আনুষ্ঠানিক পৰিচয় পত্ৰ গ্ৰহণ কৰিবলৈ অস্বীকাৰ কৰি কয় যে চৰিত্ৰৰ প্ৰমাণপত্ৰ বাধ্যতামূলক।

তেওঁ আনকি সাংবাদিকসকলৰ ডিজিটেল পৰিচয় পত্ৰত এটা আনুষ্ঠানিক মোহৰ থাকিব লাগিব বুলিও দাবী কৰিছিল।

লগতে পঢ়ক: অসম ক্ৰিকেট সন্থাৰ পানী নসৰকা যুক্তি: খেলপথাৰত সাপ সোমাই অতিৰিক্ত মনোৰঞ্জনহে দিছিল দৰ্শকক!

উল্লেখ্য যে প্ৰধানমন্ত্ৰী মোডীয়ে বুধবাৰে হিমাচলৰ বিলাসপুৰত এইমছৰ এটা চৌহদ উদ্বোধন কৰাৰ উপৰিও এখন ৰাজহুৱা সভাত ভাষণ প্ৰদান কৰিব। তেওঁ কুল্লু দশেৰা উদযাপনতো অংশগ্ৰহণ কৰিব।