নিৰ্বাচনলৈ মাজত আৰু বেছি দিন নাই। এনে সময়তে পাহাৰীয়া ৰাজ্য হিমাচল প্ৰদেশত নিৰ্বাচনী প্ৰচাৰ আৰম্ভ কৰিলে প্ৰধানমন্ত্ৰী নৰেন্দ্ৰ মোদীয়ে।
শেহতীয়াকৈ হিমাচল প্ৰদেশত আম আদমী পাৰ্টীয়ে তীব্ৰ প্ৰচাৰ অভিযান আৰম্ভ কৰিছে। এনে সময়তে প্ৰধানমন্ত্ৰী নৰেন্দ্ৰ মোদীয়ে ৰাজ্য খনত উপস্থিত হৈ নিৰ্বাচনী ৰণশিঙা বজালে। জানিব পৰা মতে নিৰ্বাচন আয়োগে শীঘ্ৰেই ৰাজ্যখনত ভোটগ্ৰহণৰ তাৰিখ ঘোষণা কৰিব।
মোদীয়ে হিমাচল প্ৰদেশৰ বিলাসপুৰত এইমছ চিকিৎসালয় উদ্বোধন কৰিবলৈ অহাৰ সময়ত আক্ষৰিক ভাৱে নিৰ্বাচনৰ ৰণশিঙা বজায়।এইমছৰ আনুষ্ঠানিক উদ্বোধনৰ সময়তে তেওঁ এক সম্পূৰ্ণ নিৰ্বাচনমুখী ভাষণ দিয়ে। প্ৰধানমন্ত্ৰীয়ে ৰাজ্য খনৰ বিলাসপুৰত এইমছ উদ্বোধন কৰাৰ লগতে আন কেইবাটাও প্ৰকল্প উদ্বোধন কৰে।মোদীয়ে কয় “পূৰ্বৰ কংগ্ৰেছ চৰকাৰে কেৱল প্ৰকল্পটো ঘোষণা কৰিহে দায়িত্ব সামৰিছিল , আমি পিছে তেনে কৰা নাই ।
আমাৰ চৰকাৰে প্ৰকল্প ঘোষণা কৰাৰ লগতে ইয়াক সমাপ্তও কৰে। বিলাসপুৰৰ এইমছ তাৰ প্ৰমাণ”। তেওঁ দাবী কৰে যে পূৰ্বৰ চৰকাৰৰ দিনত নিৰ্বাচনৰ আগে আগে বৃহৎ সংখ্যক আধাৰশিলা স্থাপন কৰিছিল। কিন্তু বৰ্তমানৰ কেন্দ্ৰীয় চৰকাৰে প্ৰকল্পসমূহ সময়মতে নিৰ্মাণ কৰি সেয়া উদ্বোধনো কৰে।
কেন্দ্ৰীয় স্বাস্থ্য মন্ত্ৰালয়ৰ মতে হিমাচল প্ৰদেশৰ এইমছ ২৪৭ একৰ ভূমিত স্থাপন কৰা হৈছে। ইয়াত ৭৫০ খন সাধাৰণ বিচনা আৰু ৬৪ খন আইচিইউ বিচনা আছে। চিকিৎসালয়খনৰ নিৰ্মাণৰ ব্যয় হৈছে ১,৪৭০ কোটি টকা। উদ্বোধনৰ পিছত প্ৰধানমন্ত্ৰীয়ে চিকিৎসালয়খনৰ চি ব্লকৰ এটা অংশ পৰিদৰ্শন কৰে।
