উত্তৰাখণ্ডৰ দ্ৰৌপদীৰ দণ্ডা-২ পৰ্বত শৃংগত সংঘটিত হিমস্খলনস্থলীত অব্যাহত আছে উদ্ধাৰ অভিযান। আজি উদ্ধাৰ অভিযানত অংশ লোৱা অভিযানকাৰী দলে ঘটনাস্থলীৰ পৰা পুনৰ ছয়টা মৃতদেহ উদ্ধাৰ কৰে। ইয়াৰ সৈতে এতিয়ালৈকে হিমস্খলনত নিহত ১৬ গৰাকী পৰ্বতাৰোহীৰ মৃতদেহ উদ্ধাৰ হৈছে।
এতিয়ালৈকে উদ্ধাৰ হোৱা ১৬ টা মৃতদেহৰ ভিতৰত ১৪ গৰাকী প্ৰশিক্ষাৰ্থী পৰ্বতাৰোহী আৰু ২ গৰাকী প্ৰশিক্ষণ প্ৰতিষ্ঠানটোৰ প্ৰশিক্ষক বুলি জানিব পৰা গৈছে। উল্লেখ্য যে কালি নিশালৈকে হিমস্খলনত আৱদ্ধ হৈ পৰা প্ৰশিক্ষাৰ্থীসকলৰে ১০ গৰাকীৰ মৃতদেহ উদ্ধাৰ হৈছিল।
মঙলবাৰে পুৱা ৮.৪৫ বজাত হোৱা হিমস্খলনৰ ফলত পৰ্বতমালাত ২৯ গৰাকী পৰ্বতাৰোহী আৱদ্ধ হৈ পৰিছিল। ইয়াৰে ২৭ গৰাকী প্ৰশিক্ষাৰ্থী আৰু আন দুগৰাকী প্ৰশিক্ষক আছিল বুলি জানিব পৰা গৈছিল।
হিমস্খলনত আৱদ্ধ পৰ্বতাৰোহীসকল উত্তৰ কাশীৰ নেহৰু মাউন্টেনিয়াৰিং ইনষ্টিটিউটৰ পৰা পৰ্বতাৰোহণৰ বাবে দণ্ডা-২ পৰ্বত শৃংগত উপস্থিত হৈছিল।
এতিয়ালৈকে ১৬ গৰাকী সদস্যৰ মৃতদেহ উদ্ধাৰ হোৱাৰ পিছত সন্ধানহীন আন ১৩ গৰাকী প্ৰশিক্ষাৰ্থী পৰ্বতাৰোহীৰ সন্ধানত উদ্ধাৰ অভিযান অব্যাহত ৰাখিছে অভিযানকাৰীসকলে। উদ্ধাৰ হোৱা পৰ্বতাৰোহীসকলৰ মৃতদেহৰ পৰিচয় এতিয়াও প্ৰকাশ হোৱা নাই।
উল্লেখ্য যে এই হিমস্খলনৰ পিছত সন্ধানহীন হোৱা পৰ্বতাৰোহীসকলৰ ভিতৰত অসমৰ এগৰাকী যুৱতীসহ উত্তৰ-পূবৰ দুগৰাকী পৰ্বতাৰোহী আছে। সন্ধানহীন হৈ থকা গুৱাহাটীৰ দীপশিখা হাজৰিকা সন্দৰ্ভত এই পৰ্যন্ত কোনো তথ্য জানিব পৰা হোৱা নাই।
আনহাতে, মেঘালয়ৰ ৩৫ বছৰীয়া টিক্লু জিৰৱা নামৰ এগৰাকী যুৱকো এই পৰ্যন্ত সন্ধানহীন হৈ আছে। টিক্লু জিৰৱা মেঘালয় স্পোৰ্ট ক্লাইম্বিং এণ্ড মাউন্টেনিয়াৰিং এছ’চিয়েচন (মেচচিএমএ)ৰ সদস্য।
