ট্ৰাক আৰু বাছৰ ভয়ংকৰ সংঘৰ্ষ; জীৱন্তে অগ্নিদগ্ধ হৈ কমেও ১১ জন নিহত, আহত ৩৮ জন

Eleven people were killed and 38 injured after a bus caught fire মহাৰাষ্ট্ৰত নাছিকত এক ভয়ংকৰ পথ দুৰ্ঘটনা সংঘটিত হৈছে। শনিবাৰে পুৱতি নিশা নাছিকত এখন বাছ আৰু ট্ৰাকৰ মাজত ঘটা সংঘৰ্ষত কমেও ১১ জন লোক নিহত হৈছে। এই ঘটনাত ৩৮জন লোক আহত হয়। আহতসকলক ততাতৈয়াকৈ চিকিৎসালয়লৈ লৈ যোৱা হৈছে। বহুতৰে আঘাত গুৰুতৰ হোৱালৈ চাই নিহতৰ সংখ্যা আৰু বৃদ্ধি হ’ব পাৰে বুলি আশংকা কৰা হৈছে।

বাতৰি অনুসৰি, ইয়াৱতমালৰ পৰা মুম্বাইলৈ যোৱা এখন বিলাসী বাছৰ নাছিকৰ পৰা পুনেলৈ গৈ থকা এখন ট্ৰাকৰ সৈতে মুখামুখি সংঘৰ্ষ হয়।

আৰক্ষীৰ সূত্ৰই জানিবলৈ দিয়া মতে সংঘৰ্ষটো ইমানেই তীব্ৰ আছিল যে সংঘৰ্ষৰ পিছত বাছখন প্ৰায় ৫০ ফুট দ খাৱৈত পৰি যায়। তাৰ পিছত বাছখনত জুই লাগে। বাছখনত আৱদ্ধ হৈ থকা যাত্ৰীসকলে তেওঁলোকৰ জীৱন বচাবলৈ আপ্ৰাণ চেষ্টা চলায়। এনেদৰে বহুলোক গুৰুতৰভাৱে আহত হয়।  

মহাৰাষ্ট্ৰৰ মন্ত্ৰী দাদা ভুছে কয়, “এখন ট্ৰাক নাছিকৰ পৰা পুনেলৈ গৈ থকাৰ সময়তে এখন বাছৰ সৈতে সংঘৰ্ষত লিপ্ত হয়। ঘটনাটোত ১০জন লোকে প্ৰাণ হেৰুৱাইছে। আহতসকলক নাছিকৰ এখন চিকিৎসালয়লৈ লৈ যোৱা হৈছে। চৰকাৰে তেওঁলোকৰ চিকিৎসাৰ সকলো খৰচ বহন কৰিব।‘’

তেওঁ লগতে কয় যে চৰকাৰে মৃতকৰ পৰিয়ালৰ কাষত থিয় দিছে। মুখ্যমন্ত্ৰী একনাথ চিন্দেই মৃতকৰ আত্মীয়সকলক ৫ লাখ টকাৰ অনুদান ঘোষণা কৰিছে।

ইপিনে, নাছিক আৰক্ষীয়ে জনোৱা মতে চিকিৎসালয়ত চিকিৎসাধীন অৱস্থাত আৰু এজন লোকৰ মৃত্যু হয়, যাৰ ফলত মুঠ মৃত্যুৰ সংখ্যা ১১ জনলৈ বৃদ্ধি পায়।

এজন প্ৰত্যক্ষদৰ্শীয়ে ভয়ংকৰ দুৰ্ঘটনাটোৰ বৰ্ণনা দি কয়, “দুৰ্ঘটনাটো মোৰ ঘৰৰ ওচৰতে সংঘটিত হৈছে। বাছখনত জুই লগাৰ ফলত বহুলোক অগ্নিদগ্ধ হৈ মৃত্যুমুখত পৰিছিল। চেষ্টা কৰিও আমি তেওঁলোকক বচাব নোৱাৰিলোঁ। পিছত আৰক্ষী আৰু অগ্নি নিৰ্বাপক বাহিনী আহি ঘটনাস্থলীত উপস্থিত হয়।”