মঙ্গলবাৰে উত্তৰাখণ্ডৰ কেদাৰনাথৰ ওচৰত সংঘটিত এক ভয়াৱহ হেলিকপ্টাৰ দুৰ্ঘটনাত ছয়গৰাকীকৈ তীৰ্থযাত্ৰীৰ মৃত্যুৰ চাঞ্চল্য মাৰ নৌ-যাওঁতেই আন এক শোকাৱহ দুৰ্ঘটনাই প্ৰাণ ল’লে চাৰি পৰ্যটকৰ।
ঘটনা সন্দৰ্ভত আৰক্ষীয়ে জানিবলৈ দিয়া অনুসৰি, মঙলবাৰে লাডাখৰ লেহত এখন যাত্ৰীবাহী বাহন পথৰ পৰা পিছলি গৈ ১০০ মিটাৰ গভীৰ খাদত বাগৰি পৰে।
এই শোকাৱহ দুৰ্ঘটনাত প্ৰাণ হেৰুওৱা পৰ্যটক কেইগৰাকীক দিল্লীৰ মহম্মদ ফিৰোজ, ৰেয়াজ আহমেদ আৰু আজম খান আৰু উত্তৰ প্ৰদেশৰ জিশান আহমদ বুলি চিনাক্ত কৰা হৈছে।
লেহৰ আৰক্ষী অধীক্ষক গৰাকীয়ে কয় যে, তুষাৰপাতৰ ফলত পথছোৱা পিছল হোৱাৰ বাবে খাৰদুংলা শীৰ্ষত এই দুৰ্ঘটনাটো সংঘটিত হয়।
তেওঁ লগতে দুৰ্যোগ সঁহাৰি বাহিনীৰ লগতে আৰক্ষীৰ দল দুৰ্ঘটনাৰ পিছতে ঘটনাস্থলীত উপস্থিত হয় আৰু উদ্ধাৰ অভিযান আৰম্ভ কৰে বুলি জানিবলৈ দিয়ে।
উদ্ধাৰকাৰী দলটোৱে তিনিগৰাকী আহত লোকক উদ্ধাৰ কৰিবলৈ সক্ষম হয় যদিও চিকিৎসালয়লৈ নিয়াৰ পথতে মৃত্যুবৰণ কৰে। আনহাতে চতুৰ্থগৰাকী ব্যক্তিয়েও কিছুসময়ৰ পিছতে শেষ নিশ্বাস ত্যাগ কৰে বুলি আৰক্ষীয়ে জানিবলৈ দিয়ে।
