অৱশেষত জল্পনা-কল্পনাৰ অন্ত পেলাই ব্ৰিটেইনৰ প্ৰধানমন্ত্ৰীৰ আসনত অধিস্থিত হৈছে ভাৰতীয় বংশোদ্ভূত ঋষি চুনাক। পেনি মৰ্ডাণ্টে কনজাৰ্ভেটিভ পাৰ্টিৰ নেতৃত্বৰ দৌৰৰ পৰা আঁতৰ হোৱাৰ লগে লগে চুনাকৰ ভাগ্য উদয় হয়।
এইদৰে চুনাক যুক্তৰাজ্যৰ প্ৰথমগৰাকী ব্ৰিটিছ-এছিয়ান প্ৰধানমন্ত্ৰী আৰু প্ৰথমগৰাকী হিন্দু প্ৰধানমন্ত্ৰী হিচাপে পৰিগণিত হয়। ৪২ বৰ্ষীয় নেতাগৰাকী লগতে আধুনিক সময়ত আটাইতকৈ কম বয়সীয়া প্ৰধানমন্ত্ৰী হিচাপেও পৰিগণিত হৈছে।
উল্লেখ্য ক্ষমতাত অধিষ্ঠিত হোৱাৰ মাত্ৰ ৪৫ দিনৰ ভিতৰতে ব্ৰিটেইনৰ প্ৰধানমন্ত্ৰী পদৰ পৰা পদত্যাগ কৰিছিল লিজ ট্ৰাছে। শেহতীয়াকৈ গ্ৰহণ কৰা মিনি বাজেট তথা ‘টেক্স- শ্লেজিং পলিচি’ৰ ফলশ্ৰুতিত সৃষ্টি হোৱা বিতৰ্কৰ ফলস্বৰূপে প্ৰধানমন্ত্ৰী পদ ত্যাগ কৰিছিল ট্ৰাছে।
পূৰ্ব প্ৰধানমন্ত্ৰী বৰিছ জনচনৰ পদত্যাগৰ পিছত শাসনলৈ অহা ট্ৰাছে এইদৰে মাত্ৰ ৪৪ দিনতে পদত্যাগ কৰাৰ পিছত ব্ৰিটিছ ইতিহাসৰ আটাইতকৈ কম সময়ৰ বাবে কাৰ্যনিৰ্বাহ কৰা প্ৰধানমন্ত্ৰী হিচাপে পৰিগণিত হৈছিল।
ট্ৰাছৰ পদত্যাগৰ পিছতে ব্ৰিটেইনৰ নতুন প্ৰধানমন্ত্ৰী হিচাপে চৰ্চালৈ আহিছিল প্ৰাক্তন চেঞ্চেলৰ ঋষি চুনাকৰ নাম। বৰিছ জনচনৰ পদত্যাগৰ পিছতে প্ৰধানমন্ত্ৰী পদৰ বাবে প্ৰবল দাবীদাৰ ৰূপে ঋষি চুনাকৰ নাম শীৰ্ষত আছিল যদিও নিৰ্বাচনত ট্ৰাছৰ বিৰুদ্ধে পৰাজিত হ’বলগীয়া হৈছিল চুনাক।
