দেশৰ ৰাজধানী চহৰ দিল্লীত সংঘটিত এই নৃশংস হত্যাকাণ্ডই তীব্ৰ চাঞ্চল্যৰ সৃষ্টি কৰিছে। নিজ ভগ্নীক দুই কিশোৰে কৰা হাৰাশাস্তিৰ বিৰুদ্ধাচৰণ কৰাৰ বাবেই নৃশংস হত্যাৰ বলি হ’বলগীয়া হৈছে এজন কিশোৰ।
ঘটনা সন্দৰ্ভত আৰক্ষীয়ে জানিবলৈ দিয়া মতে, দিল্লীৰ পেটেল নগৰত দুই কিশোৰে এগৰাকী কিশোৰীক দুই কিশোৰে অশালীন আচৰণ কৰে। কিশোৰীগৰাকীৰ ভাতৃয়ে এই কথাত প্ৰতিবাদ কৰি অভিযুক্ত কিশোৰ দুগৰাকীৰ সৈতে তৰ্কত লিপ্ত হয়।
ইয়াতে ক্ষুণ্ণ হৈ দুই কিশোৰে কিশোৰগৰাকীক উপৰ্যুপুৰি ছুৰীকাঘাত কৰি হত্যা কৰে। শুকুৰবাৰে সংঘটিত হোৱা এই নৃশংস হত্যাকাণ্ডৰ সমগ্ৰ দৃশ্য ঘটনাস্থলীত থকা নিৰাপত্তা কেমেৰাত বন্দী হয়।
এই ভিডিঅ’টোত অভিযুক্ত দুই কিশোৰৰ এগৰাকীয়ে বাৰে বাৰে তেওঁলোকৰ বিৰুদ্ধাচৰণ কৰা কিশোৰটিক ছুৰীৰে আঘাত কৰিবলৈ চেষ্টা কৰাৰ পাছত এবাৰ পিছফালৰ পৰা ছুৰীকাঘাত কৰা দেখিবলৈ পোৱা গৈছে।
কিশোৰগৰাকীৰ পিঠিত ঠিক মেৰুদণ্ডৰ ওচৰত ছুৰীৰে আঘাত কৰাৰ পাছত আঘাতপ্ৰাপ্ত অৱস্থাতে কিশোৰগৰাকীয়ে সহায়ৰ বাবে কাৰোবাক ফোন কৰিবলৈ ফোনটো উলিওৱাৰ চেষ্টা কৰে যদিও বিফল হয়।
আঘাতপ্ৰাপ্ত কিশোৰগৰাকীক ততাতৈয়াকৈ এখন চিকিৎসালয়লৈ লৈ যোৱা হৈছিল যদিও চিকিৎসকে তেওঁক মৃত ঘোষণা কৰে।
ইফালে আৰক্ষীয়ে জানিবলৈ দিয়া মতে ইতিমধ্যে ভিডিঅ’ ফুটেজৰ আধাৰত দুই অভিযুক্ত কিশোৰক গ্ৰেপ্তাৰ কৰা হৈছে আৰু অভিযুক্তৰ বিৰুদ্ধে গোচৰ ৰুজু কৰা হৈছে।
