কংগ্ৰেছৰ শাসনকালত দেশৰ বহু অনুষ্ঠান-প্ৰতিষ্ঠানৰ নাম গান্ধী পৰিয়ালৰ নামেৰে নামাকৰণ কৰাক লৈ সৰৱ হৈ অহা বিজেপিয়ে শাসনলৈ আহি পিছে নিজাধৰণে একেটা পথকে অনুকৰণ কৰিছিল। প্ৰধানমন্ত্ৰী নৰেন্দ্ৰ মোদীক কাণ্ডাৰী ৰূপত তুলি ধৰা দলটোৱে গুজৰাটস্থিত পূৰ্বৰ চৰ্দাৰ পেটেল ষ্টেডিয়ামৰ নাম সলনি কৰি নতুনকৈ মোদীৰ নামেৰে নামাকৰণ কৰিছিল।
পিছে এইবাৰ নৰেন্দ্ৰ মোডী ষ্টেডিয়ামৰ নাম পুনৰ পূৰ্বৰ দৰে চৰ্দাৰ পেটেল ষ্টেডিয়াম কৰিবলৈ অংগীকাৰ কৰিছে কংগ্ৰেছে। আগন্তুক গুজৰাট বিধানসভা নিৰ্বাচনত জয়ী হৈ ক্ষমতালৈ আহিলেই নৰেন্দ্ৰ মোদী ষ্টেডিয়ামৰ নাম চৰ্দাৰ পেটেল ষ্টেডিয়াম কৰিব বুলি আজি প্ৰকাশ কৰা নিৰ্বাচনী ইস্তাহাৰত প্ৰতিশ্ৰুতি দিছে কংগ্ৰেছে।
অহা ১ আৰু ৫ ডিচেম্বৰত অনুষ্ঠিত হ’বলগীয়া নিৰ্বাচনৰ বাবে দলৰ ইস্তাহাৰ মুকলি কৰি জ্যেষ্ঠ কংগ্ৰেছ নেতা তথা ৰাজস্থানৰ মুখ্যমন্ত্ৰী অশোক গেহলটে কয় যে যদি দলটোৱে চৰকাৰ গঠন কৰে, তেন্তে কংগ্ৰেছে প্ৰথম কেবিনেট বৈঠকতে নিৰ্বাচনী ইস্তাহাৰক চৰকাৰী নথি হিচাপে গ্ৰহণ কৰিব।
এই প্ৰতিশ্ৰুতিৰ উপৰিও বিগত ২৭ বছৰ ধৰি গুজৰাটত ক্ষমতাহীন হৈ থকা কংগ্ৰেছে ভোটাৰক আকৰ্ষণ কৰিবলৈ ইস্তাহাৰত বহুকেইটা আকৰ্ষণীয় প্ৰতিশ্ৰুতি দিছে। মাহিলী ৩০০ ইউনিট বিনামূলীয়া বিদ্যুতৰ পৰা আৰম্ভ কৰি ১০ লাখ চাকৰিৰ প্ৰদান কৰালৈকে কংগ্ৰেছে বহুকেইটা প্ৰতিশ্ৰুতি প্ৰদান কৰিছে।
গুজৰাটৰ ১০ লাখ যুৱকক চাকৰি প্ৰদান কৰাৰ প্ৰতিশ্ৰুতি দিছে কংগ্ৰেছে। কংগ্ৰেছে কয় যে গুজৰাটৰ সকলো চৰকাৰী পদ অতি সোনকালে পূৰণ কৰা হ’ব। মহিলাৰ বাবে ৫০ শতাংশ সংৰক্ষণো ইয়াত অন্তৰ্ভুক্ত কৰা হ’ব।
উল্লেখ্য যে ৰাজ্যখনত ১৮ৰ পৰা ৪৯ বছৰৰ ভিতৰৰ ভোটাৰ সংখ্যা হৈছে ৩.২৬ কোটি। ইয়াৰে ১.১২ লাখ ভোটাৰ ১৮ৰ পৰা ১৯ বছৰ বয়সৰ। ১০ লাখ চাকৰিৰ পূৰণৰ প্ৰতিশ্ৰুতিৰে কংগ্ৰছে এই যুৱ ভোটাৰসকলক আকৰ্ষণ কৰিবলৈ চেষ্টা কৰিছে।
কংগ্ৰেছে লগতে নিৰ্বাচনী ইস্তাহাৰত উল্লেখ কৰিছে যে ৰাজ্যখনত চৰকাৰ গঠন কৰিলে সকলোকে ৩০০ ইউনিট বিনামূলীয়া বিদ্যুৎ প্ৰদান কৰা হ’ব। একে সময়তে কৃষকসকলে প্ৰতিদিনে ১০ ঘন্টা বিনামূলীয়া বিদ্যুতৰ সুবিধা লাভ কৰিব।
২০১১ চনৰ লোকপিয়ল অনুসৰি গুজৰাটত ৫৫ লাখৰো অধিক কৃষক আছে। তাৰ ভিতৰত প্ৰায় ২০ লাখ ক্ষুদ্ৰ কৃষক আছে। এনে পৰিস্থিতিত কংগ্ৰেছৰ এই প্ৰতিশ্ৰুতিৰে কৃষকক নিজৰ প্ৰতি আকৰ্ষিত কৰিবলৈ চেষ্টা কৰা দেখা গৈছে। পুৰণি বিদ্যুতৰ বিলো ৰেহাই দিয়া হ’ব।
ইয়াৰ উপৰিও গুজৰাটৰ যুৱক-যুৱতীসকলক আন এক ডাঙৰ প্ৰতিশ্ৰুতি দিছে কংগ্ৰেছে। ক্ষমতালৈ অহাৰ পিছত কংগ্ৰেছে নিবনুৱাক প্ৰতিমাহে ৩০০০ টকা ভাট্টা দিয়াৰ প্ৰতিশ্ৰুতি দিছে। ইয়াৰ উপৰিও সেনা নিযুক্তিৰ প্ৰস্তুতিৰ বাবে ‘ছেম মানকেছা মিলিটাৰী একাডেমী’ স্থাপন কৰাৰ প্ৰতিশ্ৰুতি দিয়া হৈছে।
দক্ষতা বিকাশৰ বাবে ‘বিশ্বকৰ্মা হুনাৰ নিৰ্মাণ যোজনা’ আৰম্ভ কৰাৰ প্ৰতিশ্ৰুতিও দিছে। দুখীয়া ছাত্ৰ-ছাত্ৰীক বিনামূলীয়া এণ্ড্ৰইড মোবাইল দিয়াৰ প্ৰতিশ্ৰুতিও আছে নিৰ্বাচনী ইস্তাহাৰত।
কংগ্ৰেছে ক্ষমতালৈ আহিলে ৩ লাখ টকা পৰ্যন্ত কৃষকৰ ঋণ ৰেহাই দিয়া হ’ব বুলি কোৱা হৈছে। আনহাতে, গাখীৰ উৎপাদকসকলক প্ৰতি লিটাৰ গাখীৰত ৫ টকা ৰাজসাহায্য প্ৰদানৰ প্ৰতিশ্ৰুতি দিয়া হৈছে।
গৃহিনীসকলক আকৰ্ষিত কৰিবলৈ ইস্তাহাৰত প্ৰতিশ্ৰুতি দি কৈছে যে কংগ্ৰেছে ক্ষমতালৈ আহিলে গুজৰাটত ৰন্ধন গেছৰ চিলিণ্ডাৰ মাত্ৰ ৫০০ টকাতে উপলব্ধ হ’ব। ২০ লাখৰো অধিক চৰকাৰী চাকৰিয়ালক লক্ষ্য কৰি কংগ্ৰেছে পুৰণি পেন্সন ব্যৱস্থা পুনৰ ঘূৰাই অনাৰো প্ৰতিশ্ৰুতি প্ৰদান কৰিছে।
তদুপৰি প্ৰতিজন গুজৰাটীকে ১০ লাখ টকা পৰ্যন্ত বিনামূলীয়া চিকিৎসা প্ৰদান কৰাৰো প্ৰতিশ্ৰুতি দিয়া হৈছে। ইফালে প্ৰতিবন্ধী, বিধৱা, দৰিদ্ৰসকলক প্ৰতিমাহে দুহাজাৰ টকাকৈ দিয়া হ’ব বুলিও প্ৰতিশ্ৰুতি দিছে দলটোৱে।
উল্লেখ্য যে, গুজৰাটত দুটা পৰ্যায়ত নিৰ্বাচন অনুষ্ঠিত হ’ব। ১ আৰু ৫ ডিচেম্বৰত অনুষ্ঠিত হ’ব ভোটগ্ৰহণ। ইয়াৰ পিছতে ৮ ডিচেম্বৰত প্ৰকাশ কৰা হ’ব নিৰ্বাচনী ফলাফল।
