নাম তেওঁৰ মাগনভাই চোলাঙ্কি। বয়স ৫৭ বছৰ। গুজৰাটৰ বাসিন্দা এগৰাকী প্ৰাক্তন সেনাকৰ্মী। তেওঁ এইবাৰ গুজৰাট বিধানসভা নিৰ্বাচনত প্ৰতিদ্বন্দিতা কৰিছে। কিন্তু ভোটৰ বাবে নহয়, তেওঁৰ দৰ্শনীয় গোঁফৰ বাবেহে বাতৰি কাকতৰ শিৰোনাম দখল কৰিছে। তেওঁৰ গোঁফৰ দৈৰ্ঘ্য ২.৫ ফুট।
চোলাঙ্কিয়ে কয়,”মই বহুজন সমাজ পাৰ্টিৰ হৈ ২০১৯ৰ লোকসভা নিৰ্বাচনত প্ৰতিদ্বন্দিতা কৰিছিলো। মই জিকিব পৰা নাছিলো, কিন্তু মই হাৰ মনা নাই। মই এগৰাকী স্বাধীন প্ৰাৰ্থী হিচাপে প্ৰতিদ্বন্দিতা কৰিছিলো আৰু এইবাৰো মই সেইটোকে কৰিছো।‘’
তেওঁ কেনেকৈ গোঁফক নিৰ্বাচনৰ কৌশল হিচাপে ব্যৱহাৰ কৰিছে বুলি সোধাত তেওঁ কয় যে তেওঁ গোঁফেৰেই সকলোকে আকৰ্ষণ কৰিছে।
তেওঁ কয়, “যেতিয়া মই সেনাত আছিলো, মোৰ গোঁফে জ্যেষ্ঠ বিষয়াসকলৰ দৃষ্টি আকৰ্ষণ কৰিছিল, তেওঁলোকে সন্মান কৰিছিল। আৰু আনকি নিৰ্বাচনতো মোৰ গোঁফে মানুহক আনন্দিত কৰি তুলিছে। শিশুবোৰ মোৰ ওচৰলৈ আহিছে, মোক ধৰিবলৈ চেষ্টা কৰিছে। আৰু যুৱকসকলে মোৰ পৰা ডাঙৰ গোঁফ বনোৱাৰ পৰামৰ্শ বিচাৰিছে।‘’
লগতে পঢ়ক: ইতিহাস গঢ়াৰ পথত কাটাৰ বিশ্বকাপ! ২২পুৰুষ ফুটবলাৰৰ মেচ পৰিচালনাত ৩ মহিলা ৰেফাৰী
প্ৰাৰ্থীগৰাকী নিৰ্বাচিত হ’লে যুৱকসকলক গোঁফ ৰাখিবলৈ উৎসাহিত কৰিবলৈ চৰকাৰক আহ্বান জনোৱাৰ প্ৰতিশ্ৰুতি দিছে। প্ৰাক্তন সেনা কৰ্মীগৰাকীয়ে গোঁফ ৰাখিলে তাৰ ৰক্ষণাবেক্ষণৰ বাবে বিত্তীয় উদগনি দিয়াৰো আহ্বান জনাইছে।
