দুটা পৰ্যায়ত অনুষ্ঠিত হোৱা গুজৰাট বিধানসভা নিৰ্বাচনৰ দ্বিতীয় পৰ্যায়ৰ ভোটগ্ৰহণ কাইলৈ অনুষ্ঠিত হ’ব। দ্বিতীয় পৰ্যায়ৰ এই ভোটগ্ৰহণৰ পূৰ্বে আজি আহমেদাবাদৰ এগৰাকী ধৰ্মগুৰুৱে কৰা বিতৰ্কিত মন্তব্যই দেশজুৰি চাঞ্চল্যৰ সৃষ্টি কৰিছে।
আহমেদাবাদৰ জামা মছজিদৰ মুখ্য ধৰ্মগুৰুগৰাকীয়ে আজি এক চূড়ান্ত নাৰীবিদ্বেষী মনোভাৱ পোষণ কৰি কয় যে যিসকলে মুছলমান মহিলাক নিৰ্বাচনত অৱতীৰ্ণ হ’বলৈ নিৰ্বাচন কৰে তেওঁলোক ইছলামৰ বিৰোধী। এই লোকসকলে লগতে মুছলমান ধৰ্মক দুৰ্বল কৰি তুলিছে বুলিও অভিযোগ কৰে ধৰ্মগুৰু গৰাকীয়ে।
“ইছলাম ধৰ্মত নামাজতকৈ গুৰুত্বপূৰ্ণ একো নাই। ইয়াত কোনো মহিলাই নামাজ পঢ়া দেখিছে নেকি? যদি ইছলাম ধৰ্মৰ মহিলাসকল সকলোৰে সন্মুখলৈ অহা উচিত হ’লহেঁতেন, তেন্তে তেওঁলোকক এনে কৰাত বাধা দিয়া নহ’লহেঁতেন।”- এক ৰাষ্ট্ৰীয় সংবাদ সংস্থাৰ আগত এইদৰে কয় ধৰ্মগুৰু শ্বাব্বিৰ আহমেদ ছিদ্দিকীয়ে।
শ্বাহী ইমামগৰাকীয়ে লগতে কয় যে ইছলামত মহিলাৰ বিশেষ স্থিতি আছে বাবেই মছজিদলৈ আহি নামাজ পঢ়াত বাধা দিয়া হৈছে। “সেইবাবে, যিসকলে মুছলমান মহিলাক নিৰ্বাচনৰ টিকট দিয়ে, তেওঁলোকে ইছলামৰ বিৰুদ্ধে বিদ্ৰোহ কৰিছে।”- ছিদ্দিকীয়ে লগতে কয়।
ছিদ্দিকীয়ে হিজাবৰ দোহাই দি নিজৰ যুক্তিৰ সমৰ্থনত কয় যে, যদি মুছলমান মহিলাসকলক বিধায়িকা আৰু কাউন্সিলাৰ হিচাপে নিৰ্বাচিত কৰা হয়, তেতিয়া মুছলমান সমাজে হিজাবৰ ৰক্ষা কৰিব নোৱাৰিম। ইয়াৰ ফলত ইছলাম ধৰ্ম বিপদত পৰিব বুলি শংকা প্ৰাক্তন কৰে ছিদ্দিকীয়ে।
#WATCH | Those who give election tickets to Muslim women are against Islam, weakening the religion. Are there no men left?: Shabbir Ahmed Siddiqui, Shahi Imam of Jama Masjid in Ahmedabad#Gujarat pic.twitter.com/5RpYLG7gqW
— ANI (@ANI) December 4, 2022
নিজৰ এই নাৰীবিদ্বেষী ৰক্ষণশীল মন্তব্যৰ সমৰ্থনত ছিদ্দিকীয়ে আন এক আজৱ যুক্তিও দিয়ে। “নিৰ্বাচনত যুঁজিবলৈ হ’লে ঘৰে ঘৰে হিন্দু আৰু মুছলমান উভয় ধৰ্মৰে মানুহক লগ কৰিব লাগিব। গতিকে মই ইয়াৰ কঠোৰ বিৰোধী। গতিকে কেৱল পুৰুষক নিৰ্বাচনৰ টিকট দিয়ক।”— ধৰ্মগুৰু ছিদ্দিকীয়ে লগতে কয়।
