নেচনেল বুক ট্ৰাষ্ট, ইণ্ডিয়াই ১১ ডিচেম্বৰত নতুন দিল্লীত ইয়াৰ মুখ্য কাৰ্যালয়ৰ লগতে সমগ্ৰ দেশৰ সকলো আঞ্চলিক কাৰ্যালয়, গ্ৰন্থ প্ৰচাৰ কেন্দ্ৰ আৰু গ্ৰন্থ বিপনী সমূহত ভাৰতীয় ভাষা দিৱস উদযাপন কৰে।
কাশী তামিল সঙ্গমত “শ্বেয়াৰড্ ন’লেজ– শ্বেয়াৰড্ ট্ৰেডিশ্যনছ” শীৰ্ষক বিষয়ৰ ওপৰত এক ভাষণ প্ৰতিযোগিতাৰ আয়োজন কৰা হয় য’ত হিন্দী আৰু তামিল ভাষাত বহুতো বিদ্যালয় আৰু মহাবিদ্যালয়ৰ শিক্ষাৰ্থীৰ উৎসাহজনক অংশগ্ৰহণ দেখা গৈছিল। শিক্ষাৰ্থীসকলে দেশৰ সকলো প্ৰান্তকে এক সত্তা হিচাপে গ্ৰথিত কৰি সাহিত্য আৰু সংস্কৃতিৰ উমৈহতীয়া সূত্ৰৰ বিষয়ে কয় তথা এক ভাৰত শ্ৰেষ্ঠ ভাৰতৰ ধাৰণা সংজ্ঞায়িত কৰে।
এনবিটি-ইণ্ডিয়াৰ সঞ্চালক যুৱৰাজ মালিকে দিল্লীৰ এনবিটি-ইণ্ডিয়া মুখ্য কাৰ্যালয় পৰিদৰ্শন কৰা যুৱ শিক্ষাৰ্থীসকলক সম্বোধন কৰি ভাৰতীয় ভাষা দিৱস আৰু সুব্ৰমনিয়া ভাৰতীৰ ১৪০ তম জন্ম জয়ন্তীৰ বিষয়ে বিতংভাৱে কয়। তেওঁ দেশৰ উন্নয়নৰ বাবে সহায়ক হিচাপে একাধিক ভাষা জনা, একতা গঢ়ি তোলা আৰু এক ভাৰত শ্ৰেষ্ঠ ভাৰতৰ লক্ষ্য উপলব্ধি কৰাৰ গুৰুত্বৰ কথা উনুকিয়ায়।
তেওঁ শিক্ষাৰ্থীসকলক তেওঁলোকৰ মাতৃভাষাৰ ওপৰত গৌৰৱ কৰিবলৈ আৰু দেশবাসীৰ সৈতে ভালদৰে যোগাযোগ কৰিবলৈ আন ভাৰতীয় ভাষা শিকিবলৈ উৎসাহিত কৰে।
সকলো ভাৰতীয় ভাষাৰ উদযাপন আৰু এটাতকৈ অধিক ভাষা জনাত গুৰুত্ব আৰোপ কৰি মুম্বাই, কলকাতা আৰু বেংগালুৰুত অৱস্থিত এনবিটি-ইণ্ডিয়াৰ আঞ্চলিক কাৰ্যালয়ৰ লগতে চেন্নাই, লক্ষ্ণৌ, গুৱাহাটী, ইম্ফল, আগৰতলা, কটক, ডেৰাডুন, পাটনা, ভূপাল, হায়দৰাবাদ, চেন্নাই, আৰু কোচিৰ সকলো গ্ৰন্থ প্ৰচাৰ কেন্দ্ৰ আৰু গ্ৰন্থ বিপনীত একেসময়তে বিভিন্ন অনুষ্ঠানৰ আয়োজন কৰা হয়। শিশুসকলে তেওঁলোকৰ মাতৃভাষা আৰু চৰকাৰী ৰাজ্যিক ভাষাত কিতাপ পঢ়ে, আৰু কাহিনী কোৱা আৰু কাহিনী লিখা প্ৰতিযোগিতাত অংশগ্ৰহণ কৰে।
সংগঠিত কাৰ্যকলাপৰ জৰিয়তে শিক্ষাৰ্থীসকলে বিভিন্ন অঞ্চলত কথিত ভাষা, জনজাতীয় ভাষাৰ প্ৰকৃতি আৰু গাঁথনিৰ বিষয়ে, ভাৰতৰ প্ৰতিটো মুখ্য ভাষাত সচৰাচৰ কথিত বাক্যাংশ আৰু বাক্য ক’বলৈ, আৰু লগতে এই ভাষাবোৰৰ সমৃদ্ধ সাহিত্যৰ বিষয়ে শিকিছিল।
এক ভাৰত শ্ৰেষ্ঠ ভাৰত কাৰ্যসূচীৰ অধীনত বিভিন্ন ৰাজ্যৰ লোকসকলৰ মাজত পাৰস্পৰিক বুজাবুজি, ভাৱ বিনিময় বৃদ্ধি কৰাৰ বাবে বিভিন্ন ৰাজ্যৰ এনবিটি-ইণ্ডিয়াৰ সকলো কেন্দ্ৰই ইটোৱে সিটোৰ সৈতে সংযোজিত হৈছিল। শিক্ষাৰ্থীসকলে ভিডিঅ’ কলৰ জৰিয়তে ইজনে সিজনৰ সৈতে বাৰ্তালাপ কৰিছিল আৰু তেওঁলোকৰ নিজ নিজ ভাষাত ইজনে সিজনক শব্দবোৰ শিকাইছিল।
