ভগ্নীৰ বিবাহৰ বাবে এসপ্তাহৰ অন্তৱৰ্তীকালীন জামিন লাভ কৰা উত্তৰ-পূব দিল্লীৰ হিংসাত্মক কাণ্ডৰ প্ৰধান অভিযুক্ত ছাত্ৰ নেতা ওমৰ খালিদক কাৰাগাৰৰ পৰা বাহিৰত থকাৰ সময়ত সংবাদ মাধ্যমৰ সৈতে কথা নাপাতিবলৈ বা সাক্ষাৎকাৰ নিদিবলৈ নিৰ্দেশ দিছে আদালতে।
খালিদে ২০ ডিচেম্বৰৰ পৰা ৩ জানুৱাৰীলৈ দুসপ্তাহৰ বাবে অন্তৱৰ্তীকালীন জামিন বিচাৰি আবেদন দাখিল কৰিছিল যদিও আদালতে এসপ্তাহৰ বাবে জামিন মঞ্জুৰ কৰিছিল। সোমবাৰে খালিদৰ জামিনৰ নিৰ্দেশনা দিয়াৰ সময়তে আদালতে কেইবাটাও চৰ্ত আৰোপ কৰে।
“অভিযুক্তৰ কনিষ্ঠ ভগ্নীৰ বিবাহৰ প্ৰতি লক্ষ্য ৰাখি এই আদালতে বিবাহ সম্পৰ্কীয় অনুষ্ঠানত অংশগ্ৰহণ কৰাৰ বাবে অন্তৱৰ্তীকালীন জামিন প্ৰদান কৰিবলৈ সন্মত হৈছে। জামিনত চৰ্তাৱলী সংলগ্ন কৰি গোচৰ সন্দৰ্ভত থকা আশংকাৰ ওপৰত লক্ষ্য ৰাখিব পাৰি।”- মঙলবাৰে প্ৰকাশ পোৱা আদেশত এইদৰে কয় অতিৰিক্ত অধিবেশন ন্যায়াধীশ অমিতাভ ৰাৱাটে।
২৬ ডিচেম্বৰৰ পৰা ২৮ ডিচেম্বৰলৈ বিবাহ সম্পৰ্কীয় কাম-কাজ অনুষ্ঠিত হ’ব বুলি উল্লেখ কৰি ন্যায়াধীশগৰাকীয়ে কয় যে আদালতে নিজৰ বিবেচনা অনুসৰি ২৩ ডিচেম্বৰৰ পৰা তেওঁক সাত দিনৰ বাবে অন্তৱৰ্তীকালীন জামিন প্ৰদান কৰাটো উপযুক্ত বুলি বিবেচনা কৰিছে।
জামিন আদেশ অনুসৰি খালিদে ৩০ ডিচেম্বৰত সংশ্লিষ্ট জেল অধীক্ষকৰ ওচৰত আত্মসমৰ্পণ কৰিব লাগিব। আদালতে লগতে খালিদৰ জামিন বৃদ্ধি কৰা নহ’ব বুলিও স্পষ্ট কৰি দিয়ে।
জাৰি হোৱা নিৰ্দেশনাত আদালতে কয়, “অভিযুক্তই মুক্তিৰ পিছত কোনো সাক্ষীৰ সৈতে যোগাযোগ কৰিব নোৱাৰিব আৰু প্ৰমাণৰ লগতো খেলিমেলি নকৰিব। লগতে অন্তৱৰ্তীকালীন জামিনৰ সময়সীমালৈকে খালিদে তদন্তকাৰী বিষয়াক নিজৰ মোবাইল নম্বৰ দিব লাগিব আৰু নিজৰ মোবাইল ফোন খোলা ৰাখিব লাগিব।”
তদুপৰি আদালতে ওমৰ খালিদক দৈনিক ভিডিঅ’ কলৰ জৰিয়তে তদন্তকাৰী বিষয়াৰ সৈতে যোগাযোগ কৰিবলৈ নিৰ্দেশ দিয়ে। লগতে সামাজিক মাধ্যমকে ধৰি কোনো সংবাদ মাধ্যমৰ সৈতে কথা নাপাতিবলৈ বা কোনো সাক্ষাৎকাৰ নিদিবলৈ নিৰ্দেশ দিছে আদালতে।
বিবাহ অনুষ্ঠানৰ সময়ত খালিদৰ পৰিয়ালৰ সদস্য, আত্মীয়-স্বজন আৰু বন্ধু-বান্ধৱীৰ সৈতে মত বিনিময় কৰাৰ অধিকাৰ থাকিব যদিও অন্তৱৰ্তীকালীন জামিনৰ সমগ্ৰ সময়ছোৱাত তেওঁ ঘৰতে থাকিব লাগিব বুলি আদালতে লগতে কয়।
ইফালে আৰক্ষীয়ে খালিদৰ ঘৰৰ বাহিৰত পহৰা দিব পাৰিব যদিও ঘৰৰ চৌহদৰ ভিতৰলৈ যাব নোৱাৰিব বুলিও আদালতে স্পষ্ট কৰি দিছে।
