দেশৰ প্ৰধানমন্ত্ৰী নৰেন্দ্ৰ মোডী আৰু গৃহমন্ত্ৰী অমিত শ্বাহৰ গৃহৰাজ্য গুজৰাটত আছে পাকিস্তানৰ চোৰাংচোৱা সংস্থা আই.এছ.আইৰ এজেণ্ট! আই.এছ.আইৰ হৈ কাম কৰা এগৰাকী ব্যক্তিক ইতিমধ্যে গ্ৰেপ্তাৰো কৰিছে গুজৰাট আৰক্ষীয়ে। খোদ চৰকাৰী সূত্ৰই সংবাদ মাধ্যমৰ আগত অৱগত কৰিছে এই কথা।
চৰকাৰী সূত্ৰই জানিবলৈ দিয়া মতে মঙলবাৰে গুজৰাট আৰক্ষীয়ে চুৰাটৰ এগৰাকী ৩৩ বছৰীয়া যুৱকক চোৰাংচোৱাগিৰি আৰু পাকিস্তানী চোৰাংচোৱা সংস্থা আই.এছ.আইত কাম কৰাৰ অভিযোগত গ্ৰেপ্তাৰ কৰিছে।
সূত্ৰ অনুসৰি, পুনেস্থিত দক্ষিণ সেনাবাহিনীৰ কমাণ্ডৰ পৰা সামৰিক চোৰাংচোৱাই প্ৰদান কৰা তথ্যৰ আধাৰত অনুসন্ধান চলাই হীৰাৰ চহৰ খ্যাত চুৰাটৰ পৰা ক্ৰাইম ব্ৰাঞ্চৰ চোৰাংচোৱা দলে গ্ৰেপ্তাৰ কৰে দীপক কিশোৰ ভাই ছালুনখে নামৰ যুৱকগৰাকীক।
চুৰাটৰ ভুৱনেশ্বৰী নগৰৰ বাসিন্দা এই লোকজনে পূৰ্বে ‘ছাই ফেশ্বনছ’ নামৰ এখন দোকান চলাইছিল বুলি জানিব পৰা গৈছে
সূত্ৰ অনুসৰি ছালুনখেই এক বিত্তীয় কেন্দ্ৰ হিচাপে কাম কৰি আছিল। তেওঁ সেৱা আগবঢ়োৱা বিষয়াসকলৰ লগতে সাধাৰণ নাগৰিকলৈ গুৰুত্বপূৰ্ণ তথ্যৰ বিনিময়ত ধন হস্তান্তৰ কৰিছিল।
প্ৰকাশিত খবৰ অনুসৰি ছালুনখেই হামিদ আৰু কাছিফ নামৰ পাকিস্তানস্থিত দুগৰাকী এজেণ্টৰ সৈতে যোগাযোগ কৰিছিল আৰু তেওঁলোকৰ সৈতে স্পৰ্শকাতৰ তথ্যৰ ভাগ-বতৰা কৰিছিল।
ৰাষ্ট্ৰীয় সংবাদ সংস্থা প্ৰেছ ট্ৰাষ্ট অৱ ইণ্ডিয়াৰ এক সূত্ৰই প্ৰকাশ কৰা অনুসৰি, ধৃত আই.এছ.আই এজেণ্টগৰাকীক অধিক তদন্তৰ বাবে গুজৰাট আৰক্ষীৰ বিশেষ অভিযান গোট (SOG)ক গতাই দিয়া হৈছে।
