দেশত এতিয়া মুঠেই সুৰক্ষিত নহয় নাৰী। কেৱল প্ৰাপ্তবয়স্ক মহিলাই নহয়, দুৰ্বৃত্তৰ বিকৃত যৌন মানসিকতাৰ পৰা সুৰক্ষা নাই কন্যা শিশুৰো। দেশৰ ৰাজধানী দিল্লীতে নিৰাপত্তাৰ আশংকাত ভুগিবলগীয়া হৈছে শিশুৰ পৰা বৃদ্ধা মহিলালৈকে। ৰাজধানী চহৰখনত ইটোৰ পিছত সিটোকৈ ধৰ্ষণৰ ঘটনাই উদ্বেগৰ সৃষ্টি কৰাৰ সময়তে শেহতীয়াকৈ এটি চাৰি বছৰীয়া কন্যা শিশুৰ ধৰ্ষণৰ ঘটনা।
যোৱা সপ্তাহৰ বুধবাৰে এক দুৰ্বৃত্তৰ কামনাৰ বলি হ’বলগীয়া হৈছে চাৰি বছৰীয়া শিশুটি। কেৱল সিমানেই নহয়, এই পাশৱিক আতিশয্য চলোৱাৰ পাছত অভিযুক্তই ওৰে ৰাতিটো এখন উদ্যানৰ কাষত পেলাই থৈ যায় শিশুটিক।
দিল্লী আৰক্ষীয়ে ঘটনা সন্দৰ্ভত জানিবলৈ দিয়া মতে, যোৱা সপ্তাহত নিৰাপত্তাৰক্ষীৰ কেমেৰাৰ ফুটেজত বন্দী হৈছিল অভিযুক্ত ব্যক্তিগৰাকীয়ে শিশুটিক লৈ যোৱাৰ দৃশ্য বন্দী হৈছিল। এই ফুটেজৰ আধাৰত আৰক্ষীয়ে সোমবাৰে নিশা গ্ৰেপ্তাৰ কৰে অভিযুক্তক।
ধৃত অভিযুক্তগৰাকীক অনিল পাঠক বুলি চিনাক্ত কৰা হৈছে। আৰক্ষীয়ে ধৃত পাঠকক ঘটনা সন্দৰ্ভত জেৰা অব্যাহত ৰাখিছে বুলি জানিবলৈ দিছে। ইফালে এই বৰ্বৰ আতিশয্যৰ বলি হোৱা শিশুটিয়ে সম্প্ৰতি চিকিৎসালয়ত মৃত্যুৰ সৈতে যুঁজি আছে বুলি জানিব পৰা গৈছে।
ঘটনা সন্দৰ্ভত আৰক্ষীয়ে জানিবলৈ দিয়া মতে, দৈনিক মজুৰি কৰা এগৰাকী শ্ৰমিকৰ সন্তান শিশুটিয়ে ঘৰৰ বাহিৰত খেলি থকাৰ পৰাই অপহৰণ কৰে অনিল পাঠকে। ইফালে নিৰুদিষ্ট হোৱা সন্তানক বিচাৰি পিতৃ-মাতৃয়ে কাষৰীয়া অঞ্চলত চলাথ কৰে যদিও নিশা পৰ্যন্ত ঘৰলৈ উভতি নহাত আৰক্ষীৰ কাষ চাপে।
আৰক্ষীয়ে শিশুটিৰ সন্ধান উলিওৱাৰ বাবে তিনিটা দল গঠন কৰে আৰু শিশুটিৰ ফটো আন আৰক্ষী থানালৈও প্ৰেৰণ কৰে। গোটেই নিশা অনুসন্ধান অব্যাহত থকাৰ পাছত বৃহস্পতিবাৰে পুৱা ৭ বজাত এখন উদ্যানৰ সমীপত শিশুটিক উদ্ধাৰ কৰা হয়।
শিশুটিক উদ্ধাৰ কৰাৰ পাছতে ততাতৈয়াকৈ চিকিৎসা পৰীক্ষাৰ বাবে স্থানীয় চিকিৎসালয়লৈ লৈ যোৱা হয়। প্ৰাথমিক স্বাস্থ্য পৰীক্ষাৰ পিছত চিকিৎসকে শিশুটিক ধৰ্ষণ কৰা বুলি নিশ্চিত কৰে।
ইতিমধ্যে আৰক্ষীয়ে ধৰ্ষণ আৰু অপহৰণৰ গোচৰত অভিযুক্তৰ বিৰুদ্ধে যৌন অপৰাধৰ পৰা শিশু সুৰক্ষা আইন (POCSO)ৰ অধীনত গোচৰ ৰুজু কৰিছে। দিল্লী মহিলা আয়োগেও ঘটনা সন্দৰ্ভত দিল্লী আৰক্ষীক প্ৰতিবেদন দাখিল কৰিবলৈ নিৰ্দেশ দিছে।
