স্কটলেণ্ডৰ ৰাজধানী এডিনবাৰ্গৰ এগৰাকী ৰেস্তোঁৰাৰ মালিকে সকলোকে এমাহৰ বাবে বিনামূলীয়াকৈ পিজ্জা খুৱাব বুলি ঘোষণা কৰিছে। মূলতঃ জনসাধাৰণৰ অৰ্থনৈতিক মণ্ডাৱস্থাৰ বাবেই তেওঁ উদাৰতা বা দয়া হিচাপে কৰিবলৈ এই সিদ্ধান্ত লৈছে।
জানিব পৰা মতে, এমাহৰ বাবে সকলোকে বিনামূলীয়াকৈ পিজ্জা খুৱাবলৈ ঘোষণা কৰা ব্যক্তিজনৰ নাম মাৰ্ক উইলকিনছন। এডিনবাৰ্গৰ দক্ষিণৰ মৰ্নিংছাইডত থকা পিউৰ পিজ্জা নামৰ ৰেস্তোঁৰাখনৰ মালিক মাৰ্ক উইলকিনছন।
মাৰ্ক উইলকিনছনে কয় যে জীৱন-যাপনৰ খৰচৰ সংকটৰ সৈতে যুঁজি থকা লোকসকলক সহায় কৰাৰ পৰিকল্পনা কৰিছে। তেওঁ কয় যে এই পৰিকল্পনাৰ জৰিয়তে তেওঁৰ অংশকালীন কৰ্মীসকলে অধিক কামৰ সুযোগ লাভ কৰিব।
৫৫ বছৰীয়া মাৰ্ক উইলকিনছনে কয় যে ‘মোৰ পৰিকল্পনাত মই অতি সুখী কাৰণ ইয়াৰ দ্বাৰা গ্ৰাহকসকল উপকৃত হ’ব, যোগানকাৰীসকল উপকৃত হ’ব আৰু মোৰ চেফৰ দলটোও লাভৱান হ’ব।’
মাৰ্কে লগতে কয় যে জীৱন-যাপনৰ অত্যধিক খৰচে বহুতক কেনেদৰে যন্ত্ৰণা দিছে সেই বিষয়ে মই বহু শুনিছোঁ। ‘সহায়’ হৈছে এনেকুৱা এটা বস্তু যিয়ে মোক সঁচাকৈয়ে আকৰ্ষণ কৰে আৰু মই এনেকুৱা কিবা এটা কৰিবলৈ চেষ্টা কৰিব বিচাৰিছিলো।’
মাৰ্কে অনুমান কৰিছে যে এমাহৰ বাবে সকলোকে বিনামূলীয়াকৈ পিজ্জা খুৱাব বুলি ঘোষণা কৰিলে তেওঁৰ প্ৰায় ১২ হাজাৰ পাউণ্ড খৰচ হ’ব। ২০২০ চনৰ মাৰ্চ মাহত লকডাউনৰ আৰম্ভণিতে পিজ্জা ব্যৱসায় আৰম্ভ কৰিছিল উইলকিনছনে। তেওঁ কয় যে তেওঁৰ অভেনত প্ৰতি ছয় মিনিটৰ মূৰে মূৰে ১৮টা পিজ্জা বনাব পৰা ক্ষমতা আছে।
বিবিচিয়ে জনোৱা মতে, জানুৱাৰী মাহত এডিনবাৰ্গৰ মৰ্নিংছাইড ড্ৰাইভত থকা ইয়াৰ ষ্ট’ৰলৈ অহা লোকসকলক বিনামূলীয়াকৈ পিজ্জা প্ৰদান কৰা হ’ব।
উল্লেখ্য যে পিউৰ পিজ্জাৰ পৰা বিনামূলীয়া পিজ্জা পাবলৈ হ’লে সংশ্লিষ্ট ব্যক্তিয়ে কেৱল এটা বৈধ মোবাইল নম্বৰ দিব লাগিব।
