কৰ্ণাটকত নিৰ্বাচনৰ ঢৌ আৰম্ভ হৈছে। তাৰ মাজতে বিজেপিৰ প্ৰাক্তন মন্ত্ৰী তথা নেতা ৰমেশ জাৰ্কিহোলি এখন ৰাজহুৱা সভাত তেওঁৰ মুকলি মন্তব্যক লৈ বিতৰ্কত সোমাই পৰিছে। বিজেপিক একপ্ৰকাৰ অস্বস্তিত পেলাই তেওঁ কৈছিল যে যদি সেই ভোট গেৰুৱা শিবিৰৰ সপক্ষে যায় তেন্তে বিজেপিয়ে আগন্তুক নিৰ্বাচনত প্ৰতিটো ভোটৰ বাবদ ৬,০০০ টকা দিব। এই মন্তব্যৰ পিছতে দলটোৱে নেতাজনৰ পৰা দূৰত্ব বৃদ্ধি কৰিছে।
অতীততো কেইবাটাও বিতৰ্কৰ বাবে বিজেপি নেতাজনে শিৰোনাম দখল কৰিছিল। ২০২১ চনত তেওঁৰ বিৰুদ্ধে উত্থাপিত যৌন কেলেংকাৰীৰ গোচৰত তেওঁ পদত্যাগ কৰিবলৈ বাধ্য হৈছিল। সেই সময়ত যৌন কেলেংকাৰীৰ গোচৰৰ পৰিপ্ৰেক্ষিতত ৰমেশ জাৰ্কিহোলিৰ বাবে বিজেপি অস্বস্তিত পৰিছিল।
ইপিনে, দেওবাৰে কৰ্ণাটকৰ বেলাগাভিত তেওঁৰ সমৰ্থকসকলৰ আয়োজিত এখন সভাত ৰমেশ জাৰ্কিহোলীয়ে ভাষণ দিছিল। বাতৰি অনুসৰি, তেওঁ অঞ্চলটোত কংগ্ৰেছ বিধায়ক লক্ষ্মী হেব্বালকাৰক আক্ৰমণ কৰি এই মন্তব্য কৰিছিল।
তেওঁ কৈছিল, “মই শুনিছো যে তেওঁ তেওঁৰ বিধানসভা সমষ্টিৰ ভোটাৰসকলক উপহাৰ দি আছে। এতিয়ালৈকে তেওঁ সম্ভৱতঃ পাকঘৰৰ সামগ্ৰী দিছে, যেনে কুকাৰ, মিক্সাৰ, যাৰ মূল্য সম্ভৱতঃ ১,০০০ টকা। হয়তো তেওঁ আপোনাক আৰু কিছু উপহাৰ দিব। যাৰ মুঠ মূল্য হ’ব পাৰে ৩০০০ টকা। মই আপোনালোকক অনুৰোধ জনাইছো যে যদি আমি প্ৰতিটো ভোটত ৬,০০০ টকা পৰিশোধ নকৰোঁ তেন্তে আমাৰ প্ৰাৰ্থীক ভোট দিব নালাগে।‘’
কৰ্ণাটকৰ গোকাক বিধানসভা সমষ্টিৰ এজন বিধায়ক আৰু নেতা ৰমেশ জাৰ্কিহোলীয়ে মে’ত আগন্তুক কৰ্ণাটক বিধানসভা নিৰ্বাচনৰ পূৰ্বে কানাড়া ৰাজনীতিত এক আলোড়নৰ সৃষ্টি কৰিছে। ইয়াৰ বাবে কংগ্ৰেছে আক্ৰমণৰ কোনো সুযোগ এৰি দিয়া নাই।
আনহাতে, বিজেপি নেতা তথা জলসিঞ্চন মন্ত্ৰী গোবিন্দ কাৰ্জলে এই বিষয়টোত ৰমেশৰ পৰা নিজকে আঁতৰাই ৰাখি এই মন্তব্য খাৰিজ কৰে। তেওঁ কয়, “যদি এজন ব্যক্তিয়ে কোনো মন্তব্য কৰে, এয়া তেওঁৰ নিজৰ মন্তব্য। এয়া তেওঁৰ ব্যক্তিগত বিষয়।‘’
তেওঁ লগতে কয়, “আমাৰ দলত এনে ঘটনাৰ কোনো স্থান নাই। আমাৰ দলৰ এটা আদৰ্শ আছে, যাৰ বাবে নৰেন্দ্ৰ মোদীৰ নেতৃত্বত দলটো দ্বিতীয়বাৰৰ বাবে স্পষ্ট সংখ্যাগৰিষ্ঠতাৰে ক্ষমতালৈ আহিছে।‘’
ইপিনে, কংগ্ৰেছে এই মন্তব্যৰ প্ৰতি লক্ষ্য ৰাখি নিৰ্বাচন আয়োগক উপযুক্ত ব্যৱস্থা গ্ৰহণ কৰিবলৈ দাবী জনাইছে।
