মধ্য প্ৰদেশৰ জবলপুৰ জিলাৰ এগৰাকী ৭৭ বছৰীয়া চিকিৎসক। নাম তেওঁৰ ডাঃ এম চি দাৱাৰ। মানৱদৰদী দাৱাৰে আজিৰ দিনতো ৰোগীৰ স্বাস্থ্য পৰীক্ষাৰ নামত মাচুল হিচাপে লয় মাত্ৰ ২০ টকা।
সাধাৰণ জনতাক সেৱা আগবঢ়োৱাৰ স্বাৰ্থত মাত্ৰ ২০ টকা মাচুল লোৱা দাৱাৰ সন্মানিত হৈছে চতুৰ্থ সৰ্বোচ্চ অসামৰিক বঁটা পদ্মশ্ৰী সন্মানেৰে।
বুধবাৰে সন্ধিয়া ৭৪ সংখ্যক গণৰাজ্য দিৱস উপলক্ষে ভাৰত চৰকাৰে ঘোষণা কৰা পদ্ম বঁটা বিজয়ীসকলৰ তালিকাত স্থান দিয়া হয় এই মানৱদৰদী চিকিৎসকগৰাকীকো।
১৯৪৬ চনৰ ১৬ জানুৱাৰীত পাকিস্তানৰ পঞ্জাৱত জন্মগ্ৰহণ কৰা ড° দাৱাৰে বিভাজনৰ পিছত ভাৰতলৈ আহে। ১৯৬৭ চনত জবলপুৰৰ পৰা এম বি বি এছ ডিগ্ৰী সম্পূৰ্ণ কৰে।
১৯৭১ চনত ভাৰত-পাক যুদ্ধৰ সময়ত ভাৰতীয় সেনাবাহিনীতো তেওঁ প্ৰায় এবছৰ ধৰি সেৱা আগবঢ়াইছিল। ইয়াৰ পিছত তেওঁ ১৯৭২ চনৰ পৰাই অতি নামমাত্ৰ মূল্যত জবলপুৰৰ লোকসকলক স্বাস্থ্যসেৱা আগবঢ়াই আহিছে।
প্ৰথমে মাত্ৰ ২ টকা মাচুলত ৰোগীৰ চিকিৎসা আৰম্ভ কৰিছিল ডাঃ এম চি দাৱাৰে। বৰ্তমান তেওঁ ৰোগীৰ পৰা মাচুল হিচাপে লয় মাত্ৰ ২০ টকা।
পদ্মশ্ৰীৰে সন্মানিত হোৱাৰ পিছতে আনন্দ প্ৰকাশ কৰে ড০ দাৱাৰে। সংবাদ মাধ্যমৰ আগত তেওঁ কয়, “যদিও পলম হয়, কঠোৰ শ্ৰমে কেতিয়াবা হ’লেও ফল দিয়ে। শ্ৰমৰ ফল আৰু ৰাইজৰ আশীৰ্বাদত মই এই বঁটা লাভ কৰিছো।”
জীৱনৰ অভিজ্ঞতাৰ কথা ব্যক্ত কৰি তেওঁ কয়, “ইমান কম মাচুল লোৱাৰ কথা ঘৰত নিশ্চিতভাৱে আলোচনা হৈছিল, কিন্তু এই বিষয়ে কোনো বিবাদ হোৱা নাছিল। আমাৰ একমাত্ৰ লক্ষ্য আছিল ৰাইজৰ সেৱা কৰা, গতিকে সেইবাবেই মাচুল বৃদ্ধি কৰা হোৱা নাছিল।”
“সফলতাৰ মূল মন্ত্ৰ হৈছে ধৈৰ্য্যৰে কাম কৰা। যদি ধৈৰ্য্যৰে কাম কৰে, তেতিয়া আপুনি নিশ্চিতভাৱে সফলতা পাব আৰু সফলতাকো সন্মান কৰা হয়।”- মানৱদৰদী চিকিৎসকগৰাকীয়ে লগতে কয়।
আনহাতে ড০ দাৱাৰৰ পুত্ৰই কয়, “আমি আগতে ভাবিছিলো যে বঁটা কেৱল ৰাজনৈতিক প্ৰসাৰতাৰ বাবেহে দিয়া হয়, কিন্তু চৰকাৰে যিদৰে তলৰ পৰ্যায়ত কাম কৰা লোকসকলক বিচাৰি উলিয়াই সন্মান জনাইছে, সেয়া অতি ভাল কথা।”
