অব্যাহত আছে কংগ্ৰ্ছৰ ভাৰত জোড়ো যাত্ৰা। বৰ্তমান জন্মু কাশ্মীৰৰ মাজেৰে চলি থকা ভাৰত জোড়ো যাত্ৰা অহা ৩০ জানুৱাৰীত সামৰণি পৰিব। ব্যাপক জনসমৰ্থনৰ মাজেৰে আগবাঢ়ি যোৱা কংগ্ৰেছৰ এই ভাৰত জোড়ো যাত্ৰাত আজি অংশ গ্ৰহণ কৰে জম্মু-কাশ্মীৰ ৰাষ্ট্ৰীয় সন্মিলনৰ নেতা তথা প্ৰাক্তন মুখ্যমন্ত্ৰী ওমৰ আব্দুল্লাই।
ৰামবন জিলাৰ বানিহালৰ পৰা ভাৰত জোড়ো যাত্ৰাৰ নেতৃত্ব বহন কৰা কংগ্ৰেছ সাংসদ ৰাহুল গান্ধীক সংগ দিয়ে ওমৰ আব্দুল্লাই। ৰাহুল গান্ধীৰ সৈতে এই যাত্ৰাত প্ৰায় দুই কিলোমিটাৰ পদযাত্ৰা কৰে জম্মু-কাশ্মীৰৰ প্ৰাক্তন মুখ্যমন্ত্ৰীগৰাকীয়ে।
যাত্ৰাত অংশ লৈ আব্দুল্লাই কয়, “দিল্লীয়ে আমাৰ কথা শুনা নাপায়। কাশ্মীৰী পণ্ডিতৰ পৰিয়ালৰ সন্তানৰ বাবে ৰাহুল গান্ধী আজি ইয়ালৈ আহিছে আৰু আমি তেওঁক আদৰণি জনাইছো।”
শ্ৰীনগৰৰ পৰা ১২০ কিলোমিটাৰ দূৰত্বত অৱস্থিত চহৰখনত ৰাহুল গান্ধী উপস্থিত হোৱাৰ পিছতে ৰাষ্ট্ৰীয় সন্মিলনৰ নেতাগৰাকীয়ে সাংবাদিকৰ আগত কয় যে ভাৰত জোড়ো যাত্ৰাৰ লক্ষ্য ৰাহুল গান্ধীৰ ভাবমূৰ্তি উজ্জ্বল কৰা নহয় বৰঞ্চ দেশৰ পৰিস্থিতি উন্নত কৰাহে।
আব্দুল্লাই লগতে কয় যে তেওঁ দেশৰ অৱস্থাক লৈ অধিক চিন্তিত হোৱাৰ বাবেই এই যাত্ৰাত যোগদান কৰিছে। জম্মু-কাশ্মীৰ ৰাষ্ট্ৰীয় সন্মিলনৰ নেতাগৰাকীয়ে লগতে কেন্দ্ৰৰ বিজেপি চৰকাৰৰ বিৰুদ্ধে আন এক গুৰুতৰ অভিযোগো উত্থাপন কৰিছে।
আব্দুল্লাৰ অভিযোগ মতে, কেন্দ্ৰীয় চৰকাৰে হয়তো আৰব দেশৰ সৈতে বন্ধুত্ব গঢ়ি তুলিছে কিন্তু বাস্তৱ পৰিস্থিতিত এই চৰকাৰত দেশৰ সৰ্ববৃহৎ সংখ্যালঘুৰ কোনো প্ৰতিনিধি নাই।
দেশে স্বাধীনতা লাভ কৰাৰ পিছত প্ৰথমবাৰৰ বাবে লোকসভা বা ৰাজ্যসভাত মুছলমানক প্ৰতিনিধিত্ব কৰিব পৰা শাসকীয় দলৰ কোনো সাংসদ নাই বুলি মন্তব্য কৰি আব্দুল্লাই এই দিশটোৱে চৰকাৰৰ মনোভাৱ ফুটাই তুলিছে বুলি অভিযোগ কৰে।