বিশ্বৰে এগৰাকী আগশাৰীৰ অৰ্থনীতিবিদ তথা দেশৰ প্ৰাক্তন প্ৰধানমন্ত্ৰী ড০ মনমোহন সিঙক অৰ্থনৈতিক আৰু ৰাজনৈতিক জীৱনলৈ আগবঢ়োৱা অৱদানৰ বাবে শেহতীয়াকৈ লণ্ডনত অনুষ্ঠিত ভাৰত-ব্ৰিটেইন এচিভাৰ্ছ অনাৰ্ছে ‘জীৱনজোৰা সাধনাৰ সন্মান’– এৰে সন্মানিত কৰিছে।
যোৱা সপ্তাহত ঘোষণা কৰা এই সন্মান পৰৱৰ্তী সময়ত ৰাষ্ট্ৰীয় ভাৰতীয় ছাত্ৰ আৰু প্ৰাক্তন ছাত্ৰ সংঘ (NISAU), ব্ৰিটেইনে নতুন দিল্লীত ড০ মনমোহন সিঙক প্ৰদান কৰিব। অক্সফৰ্ড আৰু কেম্ব্ৰিজ বিশ্ববিদ্যালয়ত শৈক্ষিক সফলতাৰ বাবে ড° মনমোহন সিঙলৈ এই ‘লাইফটাইম এচিভমেণ্ট অনাৰ্ছ’ আগবঢ়োৱা হৈছে।
ভাৰতৰ ব্ৰিটিছ কাউন্সিল আৰু ব্ৰিটেইনৰ আন্তঃৰাষ্ট্ৰীয় বাণিজ্য বিভাগৰ (DIT) সহযোগত ‘NISAU UK’ ৰ এই ‘ইণ্ডিয়া-ইউ কে এচিভাৰ্ছ অনাৰ্ছ’ত ব্ৰিটিছ বিশ্ববিদ্যালয়ত অধ্যয়ন কৰা ভাৰতীয় ছাত্ৰ-ছাত্ৰীৰ সফলতাক উদযাপন কৰা হয়।
এই সন্মানেৰে সন্মানিত হোৱাৰ পাছতে ড০ সিঙে এক লিখিত বাৰ্তাযোগে কয় যে এই সন্মানে তেওঁক যথেষ্ট আনন্দিত কৰিছে। “আমাৰ দেশৰ ভৱিষ্যত যুৱক-যুৱতীসকলৰ পৰা অহা আৰু আমাৰ দুয়োখন দেশৰ মাজৰ সম্পৰ্কৰ পৰা অহা এই অৰ্থপূৰ্ণ আপ্যায়নে মোক বাৰুকৈয়ে সুখী কৰি তুলিছে।”– মনমোহন সিঙে কয়।
“ভাৰত-ব্ৰিটেইনৰ সম্পৰ্ক সঁচাকৈয়ে আমাৰ শৈক্ষিক সহযোগিতাৰ দ্বাৰা বিশেষভাৱে সংজ্ঞায়িত কৰা হৈছে। আমাৰ জাতিৰ প্ৰতিষ্ঠাপক পিতৃ মহাত্মা গান্ধী, জৱাহৰলাল নেহৰু, ড° বি.আৰ আম্বেদকাৰ, চৰ্দাৰ পেটেল আৰু বছৰ বছৰ ধৰি অগণন ভাৰতীয় ছাত্ৰ-ছাত্ৰীয়ে ব্ৰিটেইনত অধ্যয়ন কৰিছে আৰু ভাৰত তথা বিশ্বক অনুপ্ৰাণিত কৰা মহান নেতা হিচাপে পৰিগণিত হৈছে।”– বয়োজ্যেষ্ঠ ৰাজনীতিবিদ তথা অৰ্থনীতিবিদ গৰাকীয়ে লগতে কয়।
ভাৰতৰ স্বাধীনতাৰ ৭৫ বছৰ সম্পূৰ্ণ হোৱাৰ উপলক্ষে প্ৰথমবাৰৰ বাবে ‘ইণ্ডিয়া-ব্ৰিটেইন এচিভাৰ্ছ অনাৰ্ছ’– এ বিভিন্ন ক্ষেত্ৰত সাফল্য লাভ কৰা ৭৫ গৰাকী ব্যক্তি আৰু ভাৰত-ব্ৰিটেইন সম্পৰ্কক শক্তিশালী কৰা কেইগৰাকীমান বিশিষ্ট লোকক সন্মানিত কৰিছে।
