উচ্চতম ন্যায়ালয়ৰ পৰ্যৱেক্ষণক লৈ প্ৰতিবাদত উত্তাল হৈ পৰিছে উত্তৰ-পূবৰ পাহাৰীয়া ৰাজ্য ছিকিম। শেহতীয়াকৈ উচ্চতম ন্যায়ালয়ে ইয়াৰ পৰ্যবেক্ষণত মন্তব্য কৰিছিল যে ছিকিমৰ নেপালীসকল “বিদেশী মূলৰ”। তাৰেই পৰিপ্ৰেক্ষিতত ৰাজ্যখনৰ পৰিস্থিতি যোৱা কেইদিনমানৰ পৰা উত্তপ্ত হৈ পৰিছে। ৰাজ্য চৰকাৰে এইস পৰ্যৱেক্ষণৰ সংশোধন বিচাৰি শীৰ্ষ ন্যায়ালয়ত আবেদন কৰিছে।
ৰাজ্যখনৰ প্ৰাক্তন মুখ্যমন্ত্ৰী পৱন কুমাৰ চামলিঙে শনিবাৰৰ পৰা ৪৮ ঘণ্টীয়া বন্ধৰ আহ্বান জনাইছে। প্ৰতিবাদ আৰু বন্ধৰ দ্বাৰা ক্ষতিগ্ৰস্ত হৈছে ছিকিমৰ পৰ্যটন। ছিকিমৰ মুখ্যমন্ত্ৰী প্ৰেম সিং তামাঙে ৯ ফেব্ৰুৱাৰীত বিধানসভাৰ জৰুৰী কালীন অধিৱেশনৰ আহ্বান জনাইছে।
ছিকিমৰ মুখ্য বিৰোধী দল ছিকিম ডেম’ক্ৰেটিক ফ্ৰণ্টে শনিবাৰৰ পৰা ৪৮ ঘণ্টীয়া বন্ধৰ আহ্বান জনাইছে। যোৱা কেইদিনমানত ছিকিমৰ নেপালীসকলক ‘প্ৰব্ৰজনকাৰী’ বুলি কৰা মন্তব্যৰ বাবে সৃষ্টি হোৱা প্ৰতিবাদৰ ফলত ৰাজ্যখনত অস্থিৰতাই দেখা দিছে। প্ৰতিবাদত বহুতো মানুহ পথত নামি পৰিছে।
শনিবাৰে গেংটকৰ ইন্দিৰা বাইপাছৰ এছডিএফ ভৱনত শিলাবৰ্ষণৰ ঘটনা ঘটে। দলৰ মুৰব্বী পৱন চামলিঙৰ বাসগৃহতো আক্ৰমণ চলোৱা হয়। খিৰিকীৰ গ্লাছবোৰ ভাঙিছে। এছডিএফে দাবী কৰিছিল যে ঘটনাটো ৰাজ্যখনৰ শাসনাধিষ্ঠ ছিকিম ক্ৰান্তিকাৰী মৰ্চাৰ সমৰ্থকসকলে সংঘটিত কৰিছে।
ইপিনে, দক্ষিণ ছিকিমৰ জোৰথাঙত এছ কে এম সমৰ্থকৰ বিৰুদ্ধে এজন এছডিএফ সমৰ্থকক হাৰাশাস্তি কৰাৰ অভিযোগ উঠিছে। আৰক্ষীয়ে ঘটনা দুটাৰ তদন্ত আৰম্ভ কৰিছে। পৰিস্থিতি নিয়ন্ত্ৰণত কৰিবলৈ ৰাজ্যৰ বিভিন্ন প্ৰান্তত অতিৰিক্ত আৰক্ষী বাহিনী মোতায়েন কৰা হৈছে।
ছিকিমৰ এই পৰিস্থিতিৰ বাবে ৰাজ্যখনৰ পৰ্যটন ব্যাপক ক্ষতিগ্ৰস্ত হৈছে। এই পৰিস্থিতিত বহুতো পৰ্যটকে ছিকিম ভ্ৰমণ বাতিল কৰিছে। যিসকলে ইতিমধ্যে ছিকিম ভ্ৰমণ কৰি আছে তেওঁলোকো বন্ধৰ বাবে সমস্যাত পৰিছে।
প্ৰতিবাদৰ পৰিপ্ৰেক্ষিতত ছিকিমৰ স্বাস্থ্য মন্ত্ৰী মণিকুমাৰ শৰ্মাই পদত্যাগ কৰিছে। মুখ্যমন্ত্ৰী প্ৰেম সিং তামাঙলৈ লিখা পদত্যাগ পত্ৰত মণিয়ে কয়, “ৰাজ্য চৰকাৰে ছিকিমৰ জনসাধাৰণৰ আৱেগক গুৰুত্ব সহকাৰে লোৱা নাই।‘’
মণিকুমাৰে লগতে কয়, ‘’মই অনুভৱ কৰোঁ যে এই চৰকাৰত আৰু থকাৰ কোনো প্ৰয়োজন নাই।‘’ আনহাতে, অতিৰিক্ত এডভোকেট জেনেৰেল সুদেশ যোশীয়েও পদত্যাগ কৰিছে।
