শ্ৰীলংকাৰ তামিলৰ বিদ্ৰোহৰ সূচনাকাৰী তথা বিদ্ৰোহী গোট এল টি টি ইৰ মুৰব্বী ভেলুপিল্লাই প্ৰভাকৰণ জীয়াই আছে। চৈধ্য বছৰ পূৰ্বেই শ্ৰীলংকা চৰকাৰে মৃত ঘোষণা কৰা প্ৰভাকৰণে শীঘ্ৰেই সোঁশৰীৰে ৰাজহুৱাভাৱে আত্মপ্ৰকাশ কৰিব। এই দাবী কৰিছে তামিলনাডুৰ প্ৰবীণ তথা প্ৰাক্তন ৰাজনীতিবিদ পাঝা নেডুমৰাণে। সময়ে সময়ে তামিল বিদ্ৰোহীগৰাকীৰ জীৱিত অৱস্থাক লৈ চলি থকা গুজৱৰ মাজতে নেডুমৰণৰ এই দাবীয়ে এতিয়া ব্যাপক চৰ্চা লাভ কৰিছে।
লিবাৰেচন টাইগাৰছ অৱ তামিল ইলাম (এলটিটিই) প্ৰতিষ্ঠা কৰি দ্বীপ ৰাষ্ট্ৰখনত তামিলসকলৰ বাবে পৃথক গৃহভূমিৰ দাবীৰে গেৰিলা অভিযানৰ নেতৃত্ব দিয়া প্ৰভাকৰণক ২০০৯ চনৰ ১৮ মে’ত মুলভাইকালত শ্ৰীলংকা সেনাই চলোৱা অভিযানৰ পিছত মৃত ঘোষণা কৰা হয়। সেইসময়ত ৰাষ্ট্ৰপতি হিচাপে লংকা চৰকাৰৰ নেতৃত্বত আছিল মহিন্দ ৰাজাপাক্ষে।
কিন্তু নেডুমৰণৰ দাবী মতে প্ৰভাকৰণ এতিয়াও জীৱিত আৰু সুস্থ অৱস্থাত আছে। বিশ্ব তামিল কনফেডাৰেচনৰ সভাপতি নেডুমৰণে থাঞ্জাভুৰত সাংবাদিকৰ সৈতে বাৰ্তালাপত কয়, “এলটিটিইৰ মুৰব্বী প্ৰভাকৰণ জীয়াই আছে আৰু অতি সোনকালে আত্মপ্ৰকাশ কৰিব। আমি এই কথা বিশ্ববাসীৰ আগত ঘোষণা কৰি সুখী। তেওঁ তামিল ইলামৰ বাবে নিজৰ পৰিকল্পনা ঘোষণা কৰিব।”
তেওঁ লগতে শ্ৰীলংকাত সিংহলী বিদ্ৰোহৰ পিছত ৰাজাপাক্ষে চৰকাৰৰ পতনে এক অনুকূল পৰিস্থিতিৰ সৃষ্টি কৰিছে বুলি মন্তব্য কৰি প্ৰভাকৰণৰ আত্মপ্ৰকাশৰ বাবে এয়া উপযুক্ত সময় বুলি ইঙ্গিত দিয়ে। প্ৰভাকৰণ জীয়াই থকা বুলি দাবী কৰিলেও অৱশ্যে লিটিটিই নেতাগৰাকীৰ বৰ্তমানৰ স্থান সন্দৰ্ভত কোনো সবিশেষ তথ্য শ্বেয়াৰ কৰা নাই পাঝা নেডুমৰণে।
লক্ষণীয়ভাৱে ২০০৯ চনত শ্ৰীলংকা চৰকাৰে প্ৰভাকৰণৰ মৃত্যুৰ কথা ঘোষণা কৰাৰ পিছতে এটা মৃতদেহৰ কেইবাখনো ফটো আৰু ভিডিঅ’ শ্বেয়াৰ কৰিছিল। কিন্তু এই ফটো তথা ভিডিঅ’সমূহক একাংশই ভুৱা বুলি দাবী কৰিছিল। অৱশ্যে আন একাংশই লিটিটিইৰ নেতাগৰাকীয়ে চুক্তিৰ অধীনত আত্মসমৰ্পণ কৰিবলৈ অহাৰ সময়ত আন্তঃৰাষ্ট্ৰীয় চুক্তি উলংঘা কৰি তেওঁক গুলীয়াই হত্যা কৰা হৈছিল বুলিও অভিযোগ কৰিছিল। সেই সময়ত প্ৰভাকৰণৰ বয়স আছিল ৫৪ বছৰ।
১৯৯১ চনত শ্ৰীপেৰুম্বুদুৰত আত্মঘাতী বোমা বিস্ফোৰণেৰে ভাৰতৰ প্ৰাক্তন প্ৰধানমন্ত্ৰী ৰাজীৱ গান্ধীক হত্যা কৰাৰ প্ৰধান অভিযুক্ত আছিল প্ৰভাকৰণ আৰু তাৰ পিছত তেওঁক অপৰাধী হিচাপে ঘোষণা কৰা হৈছিল। শ্ৰীলংকাত আন কিছুমান হত্যাকাণ্ডৰ গোচৰতো তেওঁৰ বিৰুদ্ধে অভিযোগ উত্থাপন হৈছিল আৰু এল টি টি ইক নিষিদ্ধ সন্ত্ৰাসবাদী সংগঠন হিচাপে ঘোষণা কৰা হৈছিল।
শ্ৰীলংকাত তামিলৰ বিৰুদ্ধে দশক দশক ধৰি চলি থকা বৈষম্যৰ বিৰোধিতা কৰি প্ৰভাকৰণে এলটিটিই গঠন কৰে আৰু সমভাৱাপন্ন আন কিছুমান গোটৰ সৈতে তামিলৰ মুক্তি আন্দোলন আৰম্ভ কৰে। এই আন্দোলনক পিছলৈ প্ৰভাকৰণে পিছলৈ পৰাক্ৰমী গেৰিলা যুদ্ধ আৰু আত্মঘাতী আক্ৰমণৰ এক প্ৰবল শক্তিশালী সশস্ত্ৰ সংগ্ৰামলৈ ৰূপান্তৰিত কৰে। উল্লেখ্য যে এলটিটিই বায়ুসেনা থকা প্ৰথমটো সন্ত্ৰাসবাদী গোট হিচাপেও পৰিগণিত হৈছিল।
এলটিটিইৰ বিৰুদ্ধে যুদ্ধৰ নামত শ্ৰীলংকাৰ চৰকাৰী বাহিনীৰ বিৰুদ্ধে বিশ্বজুৰি অবাধ হাৰত মানৱ অধিকাৰ উলংঘাৰ অভিযোগ উত্থাপন হৈছিল। বিদ্ৰোহ দমনৰ নামত এক লাখৰো অধিক তামিল সাধাৰণ নাগৰিকক হত্যা কৰাৰ অভিযোগ উঠিছিল শ্ৰীলংকা চৰকাৰৰ বিৰুদ্ধে।
