আমেৰিকা যুক্তৰাষ্ট্ৰৰ মিচিগান ষ্টেট ইউনিভাৰ্চিটি (এমএছইউ)ত এক গুলীচালনাৰ ঘটনা সংঘটিত হৈছে। এই ঘটনাত কমেও তিনিজন লোক নিহত আৰু ৫ জন লোক আহত হৈছে। আহত সকলৰ দুজনমানৰ অৱস্থা সংকটজনক বুলি কোৱা হৈছে।
বিশ্ববিদ্যালয় আৰক্ষীয়ে স্থানীয় সময় অনুসৰি সোমবাৰে নিশা এটা টুইটত কয় যে বিশ্ববিদ্যালয়ৰ বাৰ্কী হল আৰু এথলেটিক ফেচিলিটিৰ পৰা গুলীচালনা কৰা হৈছিল। আক্ৰমণ আৰম্ভ হোৱাৰ তিনি ঘণ্টা পিছত আৰক্ষীয়ে জনায় যে অভিযুক্ত এতিয়াও চিনাক্ত হোৱা নাই।
বিশ্ববিদ্যালয়খনৰ আৰক্ষীয়ে প্ৰথমতে ইষ্ট লেনচিং চৌহদত গুলীচালনা আৰম্ভ হোৱাৰ পিছত ছাত্ৰ-ছাত্ৰীসকলক সুৰক্ষিত স্থানত আশ্ৰয় ল’বলৈ নিৰ্দেশ দিয়ে।
স্থানীয় সময় অনুসৰি সোমবাৰে নিশা প্ৰায় ৮:৩০ বজাত বিশ্ববিদ্যালয় আৰক্ষী বিভাগে শিক্ষাৰ্থীসকলক পলাই যাবলৈ, লুকাই থাকিবলৈ বা যুঁজ দিবলৈ আহ্বান জনাইছিল। আৰক্ষীয়ে কৈছে যে ঘটনাটোত এজন অভিযুক্ত আছিল। অভিযুক্তজন চাপৰ আৰু মাস্ক পিন্ধি আছিল।
মিচিগানৰ গভৰ্ণৰ গ্ৰেচেন হোৱাইটমাৰক গুলীচালনাৰ বিষয়ে অৱগত কৰা হৈছে। তেওঁ জনাইছে যে আৰক্ষীয়ে অঞ্চলটোৰ নিৰাপত্তা নিশ্চিত কৰিবলৈ কাম কৰি আছে।
মিচিগান ষ্টেট ইউনিভাৰ্চিটি আমেৰিকা যুক্তৰাষ্ট্ৰৰ অন্যতম মুখ্য চৰকাৰী বিশ্ববিদ্যালয়। প্ৰায় ৫০ হাজাৰ শিক্ষাৰ্থীয়ে ইষ্ট লেনচিংত অৱস্থিত ইয়াৰ মুখ্য চৌহদত অধ্যয়ন কৰে।
বিশ্ববিদ্যালয় আৰক্ষীয়ে জানিবলৈ দিয়া মতে, মঙলবাৰৰ পৰা আৰম্ভ কৰি ৪৮ ঘণ্টাৰ বাবে বিশ্ববিদ্যালয়খনৰ সকলো শ্ৰেণী আৰু অন্যান্য কাৰ্যসূচী বাতিল কৰা হৈছে।
