ভাৰতীয় মূল আমেৰিকান তথা ৰিপাব্লিকান দলৰ নেতা তথা ব্যৱসায়ী বিবেক ৰামাস্বামীয়ে ২০২৪ চনৰ ৰাষ্ট্ৰপতি পদৰ নিৰ্বাচনত প্ৰতিদ্বন্দ্বিতা কৰাৰ পৰিকল্পনা কৰিছে। যদি বিবেক ৰামাস্বামীয়ে প্ৰতিদ্বন্দ্বিতা কৰাটো নিশ্চিত হয় তেনে তেওঁ হ’ব ভাৰতীয় মূলৰ দ্বিতীয়গৰাকী ব্যক্তি যিয়ে নিকি হেলীৰ পিছত আমেৰিকাৰ ৰাষ্ট্ৰপতি পদৰ বাবে প্ৰতিদ্বন্দ্বিতা কৰিব।
৩৭ বছৰীয়া বিবেক ৰামাস্বামী হৈছে এজন কোটিপতি ব্যৱসায়ী। নিউয়ৰ্কাৰ আলোচনীৰ এক প্ৰতিবেদনত তেওঁক ‘এণ্টি-ভক ইনকৰ্পৰেশ্যনৰ চিইঅ’ বুলি বৰ্ণনা কৰা হৈছে। কিছুদিনৰ পৰা প্ৰত্ৰিকাখনে আমেৰিকাৰ আগন্তুক ৰাষ্ট্ৰপতি নিৰ্বাচনৰ প্ৰতিদ্বন্দ্বীৰ তথ্য সন্ধান অভিযান হাতত লৈছে।
ইফালে সংবাদ মাধ্যমৰ বাতৰি অনুসৰি ৰামাস্বামীয়ে আমেৰিকাৰ আইঅ’ৱা চহৰত কেইবাটাও অনুষ্ঠানত ভাষণ দিছে। সোমবাৰে পলিটিকো আলোচনীয়ে প্ৰকাশ কৰা অনুসৰি ৰামাস্বামীয়ে আইঅ’ৱা ভ্ৰমণৰ ওপৰত জোৰ দি সম্ভাৱ্য ৰাষ্ট্ৰপতি নিৰ্বাচনৰ বাবে নিজকে প্ৰৱল দাবীদাৰ হিচাপে প্ৰস্তুত কৰি তুলিছে।
প্ৰতিবেদনত আৰু কোৱা হৈছে যে তেওঁ ৰাষ্ট্ৰপতি পদৰ বাবে প্ৰতিদ্বন্দ্বিতা কৰিব বিচাৰিছে আৰু তেওঁ আমেৰিকাৰ বহু বিষয় জনসাধাৰণৰ মাজলৈ লৈ গৈছে। একে সময়তে টিভি চেনেলৰ বিতৰ্কত সক্ৰিয়ভাৱে অংশগ্ৰহণ কৰিছে।
ৰামাস্বামীয়ে এইদৰে নিৰ্বাচনী প্ৰচাৰ আৰম্ভ কৰিব পাৰে বুলি দাবী কৰি পলিটিকো আলোচনীয়ে কৈছে যে “বিবেক ৰামাস্বামীয়ে নিজৰ ব্যৱসায়ী ট্ৰেক ৰেকৰ্ড অনুসৰণ কৰিব নিবিচাৰে। বৰঞ্চ তেওঁ আমেৰিকাৰ মনোভাৱক পুনৰুজ্জীৱিত কৰা আৰু সমাজত মেৰিট’ক্ৰেচিৰ সংস্কৃতি ঘূৰাই অনাৰ ওপৰত কেন্দ্ৰীভূত প্ৰচাৰ আৰম্ভ কৰিব বিচাৰে।”
বিবেক ৰামাস্বামী ভাৰতীয় মূলৰ মাৰ্কিন নাগৰিক আৰু তেওঁৰ পিতৃ ইলেক্ট্ৰিক অভিযন্তা আৰু মাতৃ মানসিক চিকিৎসক। ৰামাস্বামীৰ জন্ম হৈছিল চিনচিনাটিত। হাৰ্ভাৰ্ড আৰু ইয়েল বিশ্ববিদ্যালয়ত অধ্যয়ন কৰা তেওঁৰ সম্পত্তিৰ পৰিমাণ ৫০ কোটি মাৰ্কিন ডলাৰৰ ওপৰত বুলি জানিব পৰা গৈছে, যাৰ সহায়ত তেওঁ নিজৰ অভিযান আৰম্ভ কৰিব পাৰে।
তেওঁ এজন সফল জৈৱ প্ৰযুক্তি উদ্যোগী হিচাপে পৰিগণিত হৈছে আৰু এফ ডি এৰ অনুমোদিত পাঁচটা ঔষধ প্ৰস্তুত কৰিছে আৰু সেই ঔষধসমূহ প্ৰথমে নিৰ্মাণো কৰিছিল।
অৱশ্যে ৰামাস্বামীৰ বাবে এই পথ বৰ সহজ নহ’ব। কাৰণ তেওঁৰ নিজৰ দলৰে পূৰ্বৰ মাৰ্কিন ৰাষ্ট্ৰপতি ডুনাল্ড ট্ৰাম্প প্ৰত্যাহ্বান ওফৰাব পাৰিব লাগিব আৰু তাৰপাছত মূল যুঁজত বৰ্তমানৰ ৰাষ্ট্ৰপতি জ’ বিডেনক পৰাস্ত কৰিব লাগিব।
