তুৰস্ক আৰু ছিৰিয়াত হোৱা প্ৰচণ্ড ভূমিকম্পৰ ফলত হাজাৰ হাজাৰ লোকৰ মৃত্যু হৈছে। অৱশ্যে ইয়াৰ মাজতে এই ভয়ংকৰ দুৰ্যোগৰ পৰা নিৰাপদে বাচি যোৱা কিছু ভাগ্যৱান লোকো আছে। তেনে ভাগ্যৱান লোকৰ ভিতৰত এগৰাকী হৈছে ছিৰিয়াৰ উম কানান। এই উম কানানৰ প্ৰাণৰক্ষা পৰাৰ কাহিনীয়ে এতিয়া সংবাদ মাধ্যমৰ শিৰোণাম দখল কৰিছে।
সংবাদ মাধ্যমত প্ৰকাশ পোৱা অনুসৰি উম কানানে যেতিয়া ভূকম্পনৰ প্ৰাৰম্ভিক কঁপনি অনুভৱ কৰিলে, তেতিয়াই নিজৰ তিনি সন্তানক শোৱাপাতিৰ জগাই দিলে আৰু পৰিয়ালৰ ফ’টো আৰু নথি-পত্ৰসমূহৰ লৈ শোৱা কোঠাৰ সৰু আলমাৰী এটাত খৰধৰকৈ কণিষ্ঠ সন্তানসহ তেওঁ সোমায় পৰে।
ছিৰিয়াৰ ভূমধ্যসাগৰীয় চহৰ জাবলেত থকা এটা এপাৰ্টমেণ্টৰ তেওঁলোকৰ চতুৰ্থ মহলাৰ ফ্লেটটো ভূমিকম্পই ধ্বংস কৰি পেলায়। ইয়াৰ ফলত তেওঁলোকৰ প্ৰায় সকলো ওচৰ-চুবুৰীয়াৰ মৃত্যু হৈছিল যদিও তেওঁলোকৰ চাৰিজনৰ প্ৰাণৰক্ষা পৰাৰ লগতে তেওঁলোকৰ বহুমূলীয়া নথি পত্ৰসমূহ অক্ষত অৱস্থাত সুৰক্ষিত হৈ ৰয়।
অট্টালিকাটো ভাঙি পৰিলেও কোঠাটোৰ এটা কোণত থকা আলমাৰীটোৰ এক মিটাৰতকৈও অধিক ব্যায়াৰ্ধ ঠাইত সুৰক্ষিত হৈ থাকে আৰু তাতে আবদ্ধ হৈ পৰে সন্তানসহ উম কানান। একে সময়তে আলমাৰী আৰু বিচনাৰ মাজৰ এটা চুকত তেওঁৰ দুই জ্যেষ্ঠ পুত্ৰ আৰু কন্যাই সোমাই পৰে।
অট্টালিকাটো ভাঙি যোৱাৰ সময়ত তেওঁলোকে নিজকে বচাবলৈ আঠুৱাও ব্যৱহাৰ কৰিছিল। উম কানানে ভূমিকম্পৰ পিছত সেই কোঠাটোত আবদ্ধ হৈ থকাৰ ভয়ংকৰ অভিজ্ঞতা বৰ্ণনা কৰি কয়, “মই ভাবিবলৈ ধৰিলোঁ, এনেকুৱাও হ’ব পাৰেনে! আমাৰ অট্টালিকাটো সঁচাই ভাঙি গৈছে নেকি? এইটো সপোন নেকি? মই লৰচৰ কৰিবলৈ চেষ্টা কৰিছিলো, কিন্তু কৰিব নোৱাৰিলে।” তেওঁ লগতে ক’লে, “ল’ৰা-ছোৱালীকেইটা আৰু মই অলৌকিক ক্ষমতাৰ বলতে চাগে কোঠাৰ কোণত সোমাই পাৰিছিলোঁ।”
উম কানানৰ সেনা বিষয়া স্বামীও এই প্ৰাকৃতিক দুৰ্যোগত প্ৰাণৰক্ষা পৰে। ৭.৮ প্ৰাবল্যৰ ভূমিকম্পত ছিৰিয়াত ৫ হাজাৰতকৈ অধিক আৰু তুৰস্কত ৩৫ হাজাৰতকৈ অধিক লোকৰ মৃত্যু হোৱাৰ সময়ত উম কানানৰ স্বামী ঘৰত নাছিল। কিন্তু এই দুৰ্যোগৰ মাজতো প্ৰাণৰক্ষা তেওঁৰ পত্নী আৰু সন্তানক উদ্ধাৰকাৰী দলে ধ্বংসাৱশেষৰ তলৰ পৰা নিৰাপদে উদ্ধাৰ কৰাৰ পাছত তেওঁলোকক সাক্ষাৎ কৰে।
উল্লেখ্য যে, কানানহঁতৰ এপাৰ্টমেণ্টটোত কোনো লোকেৰে প্ৰাণ ৰক্ষা পৰা নাই। উম কানানে কয়, “উদ্ধাৰকাৰীয়ে কোঠাটোৰ ওপৰৰ পৰা চালখন আঁতৰাই দিলে আৰু দুয়োটা ল’ৰা-ছোৱালীকে নিৰাপদে উলিয়াই আনিলে। তাৰ পিছত মোক আৰু মোৰ সৰু ল’ৰাটোক উলিয়াই অনা হ’ল। মই মোৰ পেক কৰা বেগটো লগত লৈ আনিলো।”
কিবা এক অস্থিৰ তাড়নাত পৰি উম কানানে ভূমিকম্পৰ আগদিনা বেগটো সাজু কৰি পৰিয়ালৰ সকলোৰে প্ৰমাণ পত্ৰ, আইডি আৰু বিবাহৰ প্ৰমাণ পত্ৰৰ লগতে ফ’টো এলবাম আৰু ভিডিঅ’ কৰি একেলগে থুপ কৰি ৰাখিছিল।
“প্ৰায় আঠ বছৰ ধৰি আমি সেই ঘৰটোত বাস কৰি আছো আৰু মই আগতে কেতিয়াও এনেকুৱা বস্তু মজুত বা থুপ কৰি থোৱাৰ কৰাৰ কথা ভবা নাছিলো।” এইদৰে কৈ উম কানানে নিজকে অত্যন্ত সৌভাগ্যৱতী বুলি অনুভৱ কৰিছে।
