বিশ্বৰ আটাইতকৈ ব্যয়বহুল ক্ৰিকেট টুৰ্ণামেণ্ট ইণ্ডিয়ান প্ৰিমিয়াৰ লীগ, চমুকৈ আই পি এলৰ সম্পূৰ্ণ সূচী আজি ঘোষণা কৰিছে ভাৰতীয় ক্ৰিকেট নিয়ন্ত্ৰণ ব’ৰ্ডে। ঘোষিত সূচী অনুসৰি আইপিএল- ৰ এই ১৬ সংখ্যক সংস্কৰণ অহা ৩১ মাৰ্চৰ পৰা আৰম্ভ হ’ব।
আহমেদাবাদত ডিফেণ্ডিং চেম্পিয়ন গুজৰাট টাইটানছ আৰু চেন্নাই ছুপাৰ কিংছৰ মেচেৰে আৰম্ভ হ’ব নৱ সংস্কৰণ। উল্লেখ্য যে, উদ্বোধনী বৰ্ষৰ ৱ’মেন প্ৰিমিয়াৰ লীগ (WPL)ৰ অন্ত পৰাৰ পাঁচ দিনৰ পাছতে আৰম্ভ হ’ব আইপিএল ২০২৩।
মুঠ ৫২ দিন ধৰি চলিবলগীয়া টুৰ্ণামেণ্টখনত ১০ টা দলে ৭০ খন লীগ মেচত অংশগ্ৰহণ কৰিব। লক্ষণীয়ভাৱে এইবাৰ সম্পূৰ্ণ হ’ব আই পি এলৰ ইতিহাসৰ ১০০০ সংখ্যক মেচ।
৬ মে’ত চেপাউকত অনুষ্ঠিত হ’বলগীয়া এই মেচখনত টুৰ্ণামেণ্টৰ ইতিহাসৰ আটাইতকৈ সফল দুই দল চেন্নাই ছুপাৰ কিংছ আৰু মুম্বাই ইণ্ডিয়ানছে প্ৰতিদ্বন্দিতা আগবঢ়াব। মুঠ ১২ টা অনুষ্ঠিত হ’ব ২০২৩ ৰ ইণ্ডিয়ান প্ৰিমিয়াৰ লীগ।
ঘোষিত সূচী অনুসৰি ২১ মে’ত লীগ পৰ্যায়ৰ মেচসমূহৰ সমাপ্তি ঘটিব। লীগৰ অন্তিম মেচত গুজৰাট টাইটানছৰ সন্মুখীন হ’ব ৰয়েল চেলেঞ্জাৰ্চ বাংগালুৰু। আনহাতে ২৮ মে’ত অনুষ্ঠিত হ’ব টুৰ্ণামেণ্টৰ ফাইনেল মেচ।
ইফালে, অসমৰ ক্ৰিকেট প্ৰেমীৰ বাবে আজিৰ ঘোষিত সূচীয়ে আশাৰ খবৰ কঢ়িয়াই আনিছে। প্ৰথমবাৰৰ বাবে ৰাজ্যৰ ক্ৰিকেটপ্ৰেমীসকলে গৃহৰাজ্যতে আইপিএল মেচ উপভোগৰ সুবিধা লাভ কৰিব। গুৱাহাটীত অনুষ্ঠিত হ’ব এইবাৰৰ আইপিএলৰ দুখন লীগ পৰ্যায়ৰ মেচ।
পাঁচ এপ্ৰিলত ৰাজস্থান ৰয়েলছ আৰু পাঞ্জাৱ কিংছৰ মাজত এখন মেচ অনুষ্ঠিত হোৱাৰ পিছত ৮ এপ্ৰিলত পুনৰ ৰাজস্থান ৰয়েলছ দিল্লী কেপিটেলছৰ বিপক্ষে অৱতীৰ্ণ হ’ব।
চাওক সম্পূৰ্ণ সূচী: https://documents.bcci.tv/bcci/documents/1676632383158_TATA%20IPL%202023%20-%20Match%20Schedule.pdf
