কৰ্ণাটকৰ এক নিৰ্বাচনী সভাত ভাষণ দি কেন্দ্ৰীয় গৃহমন্ত্ৰী অমিত শ্বাহে কয় – কংগ্ৰেছ আৰু জেডিএছ হৈছে পৰিয়ালকেন্দ্ৰিক দল। তেওঁলোকে কৰ্ণাটকৰ বাবে একো ভাল কাম কৰিব নোৱাৰে। এফালে আছে মোডীৰ বিজেপি আৰু আনফালে ৰাহুল বাবাৰ টুকডে গেঙৰ কংগ্ৰেছ।ইয়াৰ মাজৰ পৰাই আপোনালোকে এটা বাছি ল’ব লাগিব।
বিজেপিয়ে ৰাজ্যখনত দুৰ্নীতিমুক্ত চৰকাৰ দিব বুলিও কেন্দ্ৰীয় গৃহমন্ত্ৰী গৰাকীয়ে কয়। প্ৰধানমন্ত্ৰী নৰেন্দ্ৰ মোডী আৰু প্ৰাক্তন মুখ্যমন্ত্ৰী বি এছ য়েডুৰাপ্পাৰ ওপৰত বিশ্বাস ৰাখিবলৈ ৰাইজক আহ্বান জনাই শ্বাহে। শ্বাহে কয় যে বিজেপিয়ে অহা পাঁচ বছৰৰ ভিতৰত কৰ্ণাটকক দক্ষিণ ভাৰতৰ এক নম্বৰ ৰাজ্যলৈ উত্তৰণ ঘটাব। কৰ্ণাটকত একক সংখ্যাগৰিষ্ঠতাৰ লাভৰ বাবে মৰণপণ যুঁজ দিছে বিজেপিয়ে।
অমিত শ্বাহে আৰু কয়— আপোনালোকৰ জেডিএছক দিয়া প্ৰতিটো ভোট কংগ্ৰেছ দললৈ যাব। কংগ্ৰেছক দিয়া প্ৰতিটো ভোট সিদ্ধাৰমাইয়া আৰু দিল্লীত নিৰ্মাণ কৰা তেওঁৰ এ টি এম চৰকাৰলৈ যাব।
“মোডী চৰকাৰে পিএফআই নিষিদ্ধ কৰিছে। কিন্তু, কংগ্ৰেছ ক্ষমতাত থকাৰ সময়ত পিএফআইৰ বিৰুদ্ধে ১৭০০টা গোচৰ প্ৰত্যাহাৰ কৰা হৈছিল।” শ্বাহো কয়।
গৃহমন্ত্ৰী শ্বাহে আৰু কয়— ডি কে শিৱকুমাৰ আৰু সিদ্ধাৰমাইয়া দুয়োজনেই মুখ্যমন্ত্ৰী পদৰ বাবে যুঁজি আছে। তেওঁলোকৰ যুঁজৰ দ্বাৰা কৰ্ণাটকৰ কোনো লাভ নহ’ব। যদি কৰ্ণাটকৰ কল্যাণ কৰিব লাগে তেন্তে ৰাজ্যত কেৱল বিজেপি চৰকাৰ গঠন কৰিব লাগিব, তেতিয়াহে ৰাজ্যখনৰ বিকাশ হ’ব।
