মুখ্যমন্ত্ৰীৰ প্ৰদূষণমুক্ত অসম গঢ়াৰ আহ্বানৰ প্ৰতি সঁহাৰি জনাই কলিয়াবৰত আজি পুৱা শুভাৰম্ভ কৰা হ’ল মোমাই তামুলী বৰুৱা সেউজী ধৰণী আচঁনি।
আচঁনিখনৰ জৰিয়তে কলিয়াবৰৰ পূবপূবথীয়া গাঁও পঞ্চায়তৰ সমূহ গাঁৱৰ প্ৰতিঘৰ গৃহস্থৰ পদূলি, বাট-পথত আৰু কুঁৱৰীটোলৰ পৰা শান্তিপুৰ, চামধৰা ,শিলঘাট, সোণাৰি গাঁও হৈ জখলাবন্ধা হস্পিতাল চাৰিআলিলৈ প্ৰায় পোন্ধৰ কিলোমিটাৰ পথৰ দুয়োকাষে স্থানীয় ফল- মূল, অশোক ফুলৰ গছ ৰোপণেৰে এটা সেউজী পৰিৱেশ গঢ়ি তোলাৰ প্ৰয়াস কৰা হ’ব ।
উল্লেখযোগ্য যে এটা সপ্তাহৰ ভিতৰত এই আঁচনিখন সম্পূৰ্ণ কৰি তোলাৰ লক্ষ্য নিৰ্ধাৰণ কৰা হৈছে।
এই উপলক্ষে তেলিয়াগাঁৱত এখন সভা অনুষ্ঠিত কৰি বৃক্ষৰোপণেৰে আচঁনিখনৰ শুভাৰম্ভ কৰে জলসম্পদ মন্ত্ৰী কেশৱ মহন্তই।
আনহাতে এই আঁচনিৰ অধীনত নগাঁও আৰক্ষীয়ে পৰিৱেশ সংৰক্ষণৰ বাবে গ্ৰহণ কৰে গ্ৰীন নগাঁও পুলিচ নামেৰে এখন আচঁনি। সোমবাৰে কলিয়াবৰ আৰক্ষী নিৱেশত গছপুলি ৰোপণ কৰি আৰম্ভ কৰা হয় ‘গ্ৰীণ নগাঁও পুলিচ’ আঁচনিখনৰ।
উল্লেখযোগ্য যে ‘গ্ৰীণ নগাঁও পুলিচ’ আচঁনিৰ জৰিয়তে সামৰি লোৱা হ’ব নগাঁও জিলাৰ ৪৬ খন আৰক্ষী নিৱেশ আৰু আউট পোষ্টক।
সোমবাৰৰ দুয়োটা অনুষ্ঠানতে জলসম্পদ মন্ত্ৰী কেশৱ মহন্তৰ লগতে অসমৰ মুখ্য বন সংৰক্ষক, নগাঁৱৰ আৰক্ষী অধীক্ষক, মহকুমাধিপতি আৰু বন বিভাগৰ উচ্চপদস্থ বিষয়াসকলে অংশগ্ৰহণ কৰে।
