সুৰা নীতি কেলেংকাৰীৰ গোচৰত গ্ৰেপ্তাৰ হোৱা দিল্লীৰ প্ৰাক্তন উপ-মুখ্যমন্ত্ৰী মনীষ চিছ’দিয়াৰ জিম্মাৰ ম্যাদ বৃদ্ধি কৰা হৈছে। আজি আদালতে চিছ’দিয়া পুনৰ দুদিনৰ বাবে চিবিআইৰ জিম্মাত থাকিব বুলি ৰায় দিয়ে।
আনহাতে আম আদমী পাৰ্টিৰ শীৰ্ষস্থানীয় নেতাগৰাকী জামিনৰ বাবে আবেদন জনাইছে। আদালতে অহা ১০ মাৰ্চৰ বিয়লি ২ বজাত চিছ’দিয়াৰ জামিন আবেদনৰ শুনানি গ্ৰহণ কৰিব বুলি উল্লেখ কৰে।
জামিনৰ আবেদন জনাই মনীষ চিছ’দিয়াই কয় যে তেওঁক এইদৰে জিম্মাত ৰখাৱাৰ ফলত কোনো ধৰণৰ ফলপ্ৰসূ উদ্দেশ্য সাধন নকৰে, কিয়নো গোচৰটোৰ সন্দৰ্ভত সকলো তথ্য তেওঁ ইতিমধ্যে চিবিআইৰ ওচৰত আদায় দিছে।
লগতে যেতিয়াই তদন্তকাৰী সংস্থাটোৱে তেওঁক চমন জাৰি কৰিব, তেওঁ হাজিৰ হ’ব বুলিও জামিন আবেদনত চিছ’দিয়াই উল্লেখ কৰিছিল।
উল্লেখ্য যে, ২০২১-২২ বৰ্ষত দিল্লী চৰকাৰৰ সুৰা নীতি প্ৰণয়ন আৰু ৰূপায়ণৰ ক্ষেত্ৰত দুৰ্নীতি সংঘটিত হোৱাৰ অভিযোগত দেওবাৰে সন্ধিয়া চিবিআইয়ে গ্ৰেপ্তাৰ কৰিছিল চিছ’দিয়াক।
গ্ৰেপ্তাৰৰ এদিন পিছতে চিছ’ডিয়াই চিবিআইৰ এই পদক্ষেপক উচ্চতম ন্যায়ালয়ত প্ৰত্যাহ্বান জনাইছিল। আদালতে অৱশ্যে তেওঁৰ আবেদন নাকচ কৰি উচ্চ ন্যায়ালয়ৰ দ্বাৰস্থ হ’বলৈ পৰামৰ্শ দিছিল।
ইয়াৰ পিছতে তেওঁ মঙলবাৰে দিল্লী কেবিনেটৰ পৰা পদত্যাগ কৰিছিল।
