বিশ্বত্ৰাস ইছলামিক সন্ত্ৰাসবাদী সংগঠন আল কাইদা আৰু আফগানিস্তানৰ ক্ষমতা অধিগ্ৰহণ কৰা সন্ত্ৰাসবাদী সংগঠন তালিবানৰ দৰেই কাম কৰিছে মোদী চৰকাৰে! এই সন্ত্ৰাসবাদী সংগঠন দুটাই বিৰোধীৰ বিৰুদ্ধে অস্ত্ৰ চলোৱাৰ দৰেই মোদী চৰকাৰে বিৰোধী দলসমূহৰ বিৰুদ্ধে তদন্তকাৰী সংস্থাসমূহৰ ৰূপত চলাইছে অস্ত্ৰ!
এই বিস্ফোৰক মন্তব্য কৰিছে শিৱসেনাৰ উদ্ধৱ থাকৰে গোটৰ নেতা সঞ্জয় ৰাউটে। সাংবাদিকৰ সৈতে হোৱা এক বাৰ্তালাপত ৰাউট বিৰোধী দলৰ নেতাসকলৰ ওপৰত কেন্দ্ৰীয় তদন্তকাৰী সংস্থাসমূহৰ অভিযানক লৈ মোদী চৰকাৰৰ সমালোচনাত সোচ্চাৰ হৈ পৰে।
তেওঁ কয় যে তালিবান আৰু আল কায়দাই নিজৰ বিৰোধীক নিৰ্মূল কৰিবলৈ যিদৰে হাতত অস্ত্ৰ লৈছে, একেদৰেই এই চৰকাৰে বিৰোধীক নিৰ্মূল কৰিবলৈ ইডি-চিবিআইৰ দৰে অস্ত্ৰ ব্যৱহাৰ কৰিছে।
কেন্দ্ৰীয় চৰকাৰে বিৰোধীৰ বিৰুদ্ধে ইডি-চিবিআইৰ অভিযান ব্যৱহাৰ কৰি বিৰোধীক আতংকিত কৰিছে সেয়া ফেচিবাদতকৈও অধিক ভয়াৱহ আৰু এয়া গণতান্ত্ৰিক নহয় বুলি মন্তব্য কৰে ৰাউটে।
সেইবাবেই দেওবাৰে মূল বিৰোধী দলৰ ৯ গৰাকী বিশিষ্ট নেতাই প্ৰধানমন্ত্ৰী মোদীলৈ পত্ৰ প্ৰেৰণ কৰি এই বিষয়টো তেওঁৰ সন্মুখত উপস্থাপন কৰিছে বুলি ৰাউটে লগতে কয়। অৱশ্যে এই সকলোবোৰৰ বিষয়ে প্ৰধানমন্ত্ৰী মোদী ইতিমধ্যে অৱগত হোৱাৰ বাবে চিঠিখনৰ প্ৰয়োজন নাই বুলিও তেওঁ মন্তব্য কৰে।
তদুপৰি ৰাউটে এই সকলো কাৰ্য প্ৰধানমন্ত্ৰী মোদীৰ নিৰ্দেশতে সংঘটিত হৈছে বুলিও অভিযোগ কৰে।
উল্লেখ্য যে, দেওবাৰে আঠটা ৰাজনৈতিক দলৰ ৯ গৰাকী নেতাই আবকাৰী নীতিৰ গোচৰত দিল্লীৰ প্ৰাক্তন উপ-মুখ্যমন্ত্ৰী মনীষ চিছ’দিয়াৰ গ্ৰেপ্তাৰ সন্দৰ্ভত প্ৰধানমন্ত্ৰী মোদীলৈ পত্ৰ প্ৰেৰণ কৰিছিল।
এই পত্ৰত বিৰোধী নেতাসকলে কেন্দ্ৰীয় সংস্থাসমূহৰ অপব্যৱহাৰৰ দ্বাৰা ভাৰত এখন গণতন্ত্ৰৰ পৰা এক স্বৈৰাচাৰী শাসনলৈ পৰিৱৰ্তন হোৱাকে সূচায় বুলি অভিযোগ কৰিছিল।
বিৰোধী দলৰ নেতাসকলৰ বিৰুদ্ধে গোচৰ ৰুজু কৰা বা গ্ৰেপ্তাৰ কৰাৰ সময় নিৰ্বাচনৰ সৈতে মিলি যোৱাৰ পৰাই এই পদক্ষেপ যে ৰাজনৈতিক ষড়যন্ত্ৰমূলক, সেয়া স্পষ্ট হৈ পৰিছে বুলি তেওঁলোকে পত্ৰখনত অভিযোগ কৰিছিল।
বিৰোধী নেতা ক্ৰমে কে চন্দ্ৰশেখৰ ৰাও, ফাৰুক আব্দুল্লা, মমতা বেনাৰ্জী, শাৰদ পাৱাৰ, উদ্ধৱ থাকৰে, অৰবিন্দ কেজৰিৱাল, ভগৱন্ত মান, তেজস্বী যাদৱ আৰু অখিলেশ যাদৱে এই পত্ৰখনত স্বাক্ষৰ কৰিছিল।
অৱশ্যে পত্ৰখনত কংগ্ৰেছ, জেডিএছ, জেডি (ইউ), চিপিএমৰ কোনো প্ৰতিনিধিৰ স্বাক্ষৰ নাছিল।
