তদন্তকাৰী সংস্থা ইডিয়ে তেলেংগানাৰ মুখ্যমন্ত্ৰী কে চন্দ্ৰশেখৰ ৰাওৰ কন্যা কে. কবিতাক দিল্লী আবকাৰী নীতিৰ অনিয়মৰ সৈতে জড়িত ধন সৰবৰাহৰ গোচৰত চমন জাৰি কৰিছে। ভাৰত ৰাষ্ট্ৰ সমিতিৰ দলৰ এম এল চি ৪৪ বছৰীয়া কবিতাক অহা ৯ মাৰ্চত ৰাষ্ট্ৰীয় ৰাজধানীৰ ইডিৰ কাৰ্যালয়ত জেৰাৰ বাবে হাজিৰ হ’বলৈ কোৱা হৈছে। এই গোচৰত ইতিমধ্যে ইডিয়ে কবিতাৰ ঘনিষ্ঠ অৰুণ ৰামচন্দ্ৰ পিল্লাই আৰু চি এ বুচি বাবুক গ্ৰেপ্তাৰ কৰিছে।
দিল্লীৰ আম আদমী পাৰ্টিক ১০০ কোটি টকাৰ উৎকোচ দিবলৈ ‘দক্ষিণ গ্ৰুপ’ৰ সৈতে ‘গোপন বুজাবুজি’ কৰাৰ অভিযোগত পিল্লাইক গ্ৰেপ্তাৰ কৰে ইডিয়ে। সোমবাৰে নিশা ইডিয়ে গ্ৰেপ্তাৰ কৰা পিল্লাইক মঙলবাৰে আদালতত হাজিৰ কৰোৱা হয়। আদালতে পিল্লাইক ১৩ মাৰ্চলৈকে ইডিৰ জিম্মালৈ প্ৰেৰণ কৰে।
ইডিয়ে দাবী কৰে যে তেওঁ তেলেংগানাৰ মুখ্যমন্ত্ৰী কে চন্দ্ৰশেখৰ ৰাওৰ কন্যা আৰু বিধান পৰিষদৰ সদস্য কে কবিতা আৰু অন্যান্যৰ সৈতে জড়িত থকাৰ সম্ভাৱনা আছে। উল্লেখ্য যে বিগত বৰ্ষৰ ডিচেম্বৰ মাহত কবিতাক চিবিআইয়ে এই সন্দৰ্ভত জেৰা কৰিছিল।
কেন্দ্ৰীয় তদন্তকাৰী সংস্থাই এই গোচৰত দিল্লীৰ প্ৰাক্তন উপ-মুখ্যমন্ত্ৰী তথা আম আদমি পাৰ্টিৰ জ্যেষ্ঠ নেতা মনীষ ছিছ’দিয়াক গ্ৰেপ্তাৰ কৰাৰ পিছতে কে কবিতালৈ এই চমন জাৰি কৰিছে। আবকাৰী নীতি প্ৰণয়ন আৰু কাৰ্যকৰীকৰণত অনিয়ম সংঘটিত কৰাৰ অভিযোগত যোৱা ২৬ ফেব্ৰুৱাৰীত গ্ৰেপ্তাৰ কৰা হৈছিল ছিছ’ডিয়াক। দিল্লীৰ ৰাউছ এভিনিউ আদালতে তেওঁক ২০ মাৰ্চলৈকে ন্যায়িক জিম্মালৈ প্ৰেৰণ কৰিছে।
অভিযোগ অনুসৰি, সুৰা ব্যৱসায়ীক অনুজ্ঞাপত্ৰ প্ৰদানৰ বাবে দিল্লী চৰকাৰৰ ২০২১-২২ চনৰ আবকাৰী নীতিয়ে উদ্যোগীসকলক গোপন বুজাবুজিৰ সুযোগ দিছিল। অৱশ্যে আম আদমী পাৰ্টিয়ে এই অভিযোগ দৃঢ়তাৰে অস্বীকাৰ কৰি আহিছে। পিছত এই নীতি বাতিল কৰা হয় আৰু দিল্লীৰ লেফটেনেণ্ট গৱৰ্ণৰে চিবিআইৰ তদন্তৰ পৰামৰ্শ দিয়ে। ইয়াৰ পিছত ইডিয়ে পিএমএলএৰ অধীনত অভিযুক্তৰ বিৰুদ্ধে গোচৰ ৰুজু কৰে।
