সুৰা নীতিৰ কেলেংকাৰীৰ গোচৰত ন্যায়িক জিম্মাৰ আধাৰত তিহাৰ কাৰাগাৰত কাৰাৰুদ্ধ হৈ থকা দিল্লীৰ প্ৰাক্তন উপ-মুখ্যমন্ত্ৰী মনীষ চিছ’দিয়াই বৃহস্পতিবাৰে বন্ধ কুঠৰীৰ পৰাই লিখিছে এখন মুকলি চিঠি। ‘শিক্ষা ৰাজনীতি’ বনাম ‘কাৰাগাৰৰ ৰাজনীতি’ শীৰ্ষক এই মুকলি পত্ৰখনত চিছ’দিয়াই শাসনাধিষ্ঠ বিজেপি চৰকাৰক ক্ষুৰধাৰ সমালোচনা কৰে।
চিছ’দিয়াই অভিযোগ কৰে যে, শিক্ষাৰ ৰাজনীতি গ্ৰহণৰ ক্ষেত্ৰত বিজেপিৰ সমস্যা আছে। তেওঁৰ মতে শিক্ষাৰ ৰাজনীতিয়ে নেতা নহয়, জাতি গঢ়ি তোলে। বিজেপিৰ বাবে শিক্ষাৰ ৰাজনীতিৰ ক্ষেত্ৰত এয়া প্ৰধান সমস্যা বুলি চিছ’দিয়াই দাবী কৰে।
পত্ৰখনত তেওঁ লিখিছে, “শিশুক গুণগত শিক্ষা দিয়াতকৈ ৰাজনৈতিক বিৰোধীক কাৰাগাৰলৈ নিক্ষেপ কৰাটো বহু সহজ। শিক্ষাৰ ৰাজনীতিৰ ক্ষেত্ৰত বিজেপিৰ প্ৰকৃত সমস্যা হ’ল যে, এই ৰাজনীতিয়ে নেতা নহয়, জাতি গঠন কৰে।”
তেওঁ লগতে লিখিছে, “শিক্ষাৰ ৰাজনীতি সহজ কাম নহয় আৰু নিশ্চিতভাৱে ৰাজনৈতিক সফলতাৰ ৰেচিপিও নহয়। আজি বিজেপিৰ শাসনত কাৰগাৰৰ ৰাজনীতি হয়তো জয়ী হ’ব পাৰে, কিন্তু ভৱিষ্যত শিক্ষাৰ ৰাজনীতিত।”
উল্লেখ্য যে, যোৱা মাহৰ শেষৰফালে কেন্দ্ৰীয় তদন্তকাৰী সংস্থা চিবিআই- এ চিছ’দিয়াক গ্ৰেপ্তাৰ কৰাৰ পিছত প্ৰথম অৱস্থাত সংস্থাটোৰ জিম্মাত থকা আপ নেতাগৰাকীক শেহতীয়াকৈ ন্যায়িক জিম্মালৈ প্ৰেৰণ কৰা হৈছে।
ইয়াৰ পিছতে তেওঁক তিহাৰ কাৰাগাৰলৈ স্থানান্তৰ কৰা হৈছিল। ইফালে সুৰা নীতিত বিত্তীয় অনিয়মৰ তদন্ত চলাই থকা এনফৰ্চমেণ্ট ডাইৰেক্টৰেটে শেহতীয়া দুদিন তিহাৰ কাৰাগাৰতে চিছ’দিয়াক জেৰা কৰাৰ পিছত বৃহস্পতিবাৰ সন্ধিয়া তেওঁক গ্ৰেপ্তাৰ কৰিছিল।
লক্ষণীয়ভাৱে আজি চিছ’দিয়াই চিবিআইৰ গোচৰত জামিনৰ বাবে দাখিল কৰা আবেদনৰ শুনানি গ্ৰহণ কৰিব আদালতে। কিন্তু এনফৰ্চমেণ্ট ডাইৰেক্টৰেটে আপ নেতাগৰাকীক পুনৰ গ্ৰেপ্তাৰ কৰাৰ ফলস্বৰূপে চিছ’দিয়াৰ কাৰাগাৰৰ পৰা বাহিৰ ওলোৱাৰ সম্ভাৱনা প্ৰায় ক্ষীণ হৈ পৰিছে।
