বিপদে লগ নেৰা হৈছে পাকিস্তানৰ ভূতপূৰ্ব প্ৰধানমন্ত্ৰী ইমৰান খানক। খাটুনৰ ন্যায়াধীশ জেবা চৌধুৰীক ভাবুকি দিয়াৰ গোচৰত আজি খানৰ বিৰুদ্ধে জামিনবিহীন গ্ৰেপ্তাৰৰ পৰোৱানা জাৰি কৰিছে অসামৰিক ন্যায়াধীশ জিলা অধিবেশন আদালতে।
পাকিস্তান তেহৰিক-ই-ইনছাফৰ অধ্যক্ষ ইমৰান খান আজি আদালতত হাজিৰ হোৱাৰ কথা আছিল। কিন্তু নিৰাপত্তাজনিত সন্দেহৰ দোহাই দি আদালতত উপস্থিতিৰ পৰা ৰেহাই বিচাৰি আবেদন দাখিল কৰে ইমৰান খানে।
প্ৰকাশ খবৰ অনুসৰি, আদালতে ইমৰান খানৰ আবেদন নাকচ কৰি গ্ৰেপ্তাৰৰ পৰোৱানা জাৰি কৰে। আদালতৰ নিৰ্দেশত ইমৰান খানক ২৯ মাৰ্চত আদালতত হাজিৰ হ’বলৈ কোৱা হৈছে।
উল্লেখ্য যে, বিগত বৰ্ষৰ আগষ্ট মাহত ইমৰান খানে এক ৰাজনৈতিক সমাৱেশ অনুষ্ঠিত কৰি সমাৱেশত ভাষণৰ সময়ত ন্যায়াধীশ জেবা চৌধুৰীক ভাবুকি প্ৰদান কৰিছিল। ইয়াৰ পাছতে খানৰ বিৰুদ্ধে ন্যায়াধীশক ভাবুকি দিয়াৰ অভিযোগত অভিযোগ দাখিল কৰা হৈছিল।
ইয়াৰ পিছত ইছলামবাদ উচ্চ ন্যায়ালয়ত ইমৰান খানে নিজ শপতনামাত ন্যায়াধীশ জেবা চৌধুৰীৰ ওচৰত ক্ষমা খুজিবলৈ ইচ্ছা প্ৰকাশ কৰিছিল। আজি এই গোচৰত খানক আদালতত হাজিৰ হ’বলৈ কোৱা হৈছিল যদিও তেওঁৰ অনুপস্থিতিৰ পিছত আদালতে জামিনহীন গ্ৰেপ্তাৰৰ পৰোৱানাৰ নিৰ্দেশ দিয়ে।
