‘ইডি’ এ এগৰাকী মহিলাক কাৰ্যালয়লৈ মাতিব পাৰেনে? এই প্ৰশ্নৰ সন্দৰ্ভত ভাৰত ৰাষ্ট্ৰ সমিতিৰ নেতা তথা তেলেংগানাৰ মুখ্যমন্ত্ৰী কে চন্দ্ৰশেখৰ ৰাওৰ কন্যা কে কবিতাই উচ্চতম ন্যায়ালয়ৰ কাষ চাপিছিল। কিয়নো দুৰ্নীতিৰ গোচৰত ১৬ মাৰ্চত পুনৰ কবিতাক চমন জাৰি কৰিছিল ইডিয়ে।
ইডিৰ চমনক প্ৰত্যাহ্বান জনাই কে কবিতাই গ্ৰেপ্তাৰৰ পৰা ৰেহাই বিচাৰি উচ্চতম ন্যায়ালয়ত আবেদন দাখিল কৰে। মুখ্য ন্যায়াধীশ ডি ৱাই চন্দ্ৰচুদ আৰু ন্যায়াধীশ পি এছ নৰসিংহই কে কবিতাৰ এই আবেদনক অনুমতি দিয়ে। এই গোচৰৰ শুনানি অহা ২৪ মাৰ্চত হ’ব।
জৰুৰী ভিত্তিত শুনানিৰ বাবে অনুৰোধ দাখিল কৰাৰ পিছত কবিতাৰ অধিবক্তাই কয় যে আদালতত তেওঁলোকৰ মূল প্ৰশ্ন হ‘ল– “ইডিয়ে এগৰাকী মহিলাক তেওঁলোকৰ কাৰ্যালয়লৈ মাতিব পাৰেনে? ” অধিবক্তাই দাবী কৰে যে সেয়া সম্পূৰ্ণ অবৈধ।
যোৱা ১১ মাৰ্চত দিল্লী আবকাৰী দুৰ্নীতিৰ গোচৰত বি আৰ এছ নেতাগৰাকীক প্ৰায় ৯ ঘণ্টা ধৰি ইডিয়ে জেৰা কৰিছিল। ইয়াৰ পিছত ইডিয়ে ১৬ মাৰ্চত তেওঁক পুনৰ মাতিছিল। তাৰ মাত্ৰ এদিন পূৰ্বে বুধবাৰে উচ্চতম ন্যায়ালয়ৰ কাষ চাপে কে কবিতাই।
দিল্লী আবকাৰী দুৰ্নীতিৰ গোচৰত প্ৰথমে চিবিআইয়ে গ্ৰেপ্তাৰ কৰিছিল দিল্লীৰ উপ–মুখ্যমন্ত্ৰী মনীষ ছিছ’দিয়াক। তিহাৰ কাৰাগাৰত থকাৰ সময়তে ইডিঅ’ই গ্ৰেপ্তাৰ কৰে তেওঁক।
বিৰোধীয়ে অভিযোগ উত্থাপন কৰিছে যে বিজেপিয়ে কেন্দ্ৰীয় এজেন্সীসমূহ ব্যৱহাৰ কৰি বিৰোধীক নীৰৱ কৰিবলৈ চেষ্টা কৰিছে। ইয়াৰ মাজতে কবিতাক ইডিয়ে মাতি আনে।
তেওঁলোকৰ প্ৰশ্ন হ’ল দুৰ্নীতিৰ অভিযোগত অভিযুক্ত ৰাজনৈতিক নেতাই যদি দল এৰি বিজেপিত যোগদান কৰে তেন্তে তেওঁ দুৰ্নীতিমুক্ত হৈ পৰে। বি আৰ এছে কেন্দ্ৰীয় সংস্থাটোক বিজেপিৰ সৈতে ৱাশ্বিং মেচিনৰ তুলনা কৰি হায়দৰাবাদৰ সুবেন্দু অধিকাৰী আৰু হিমন্ত বিশ্ব শৰ্মাৰ ছবিৰ সৈতে সংযোগ কৰা এখন পোষ্টাৰো ইতিমধ্যে ভাইৰেল হৈ পৰিছে।
