ৰাছিয়াৰ ৰাষ্ট্ৰপতি ভ্লাদিমিৰ পুটিনে ইউক্ৰেইনৰ বিৰুদ্ধে আক্ৰমণৰ পিছৰে পৰা নিজৰ দেশত তীব্ৰ বিৰোধিতাৰ সন্মুখীন হৈছে। এইবাৰ তেওঁ দেশৰ ভিতৰত বিৰোধীক শক্তিশালী হাতেৰে দমন কৰিবলৈ এটা বাৰ্তা দিছে। তেওঁ স্পষ্ট কৰি দিছে যে যিসকলে ৰাছিয়াৰ সমাজত অস্থিৰতা সৃষ্টি কৰিছে তেওঁলোকৰ বিৰুদ্ধে কঠোৰ ব্যৱস্থা লব লাগিব।
যুদ্ধ আৰম্ভ হোৱাৰ পিছত ৰাছিয়াৰ সেনা প্ৰথমতে সফল হয় যদিও পিছত ৰাছিয়াৰ সেনাই পিছুৱাই যাবলৈ বাধ্য হয়। সাধাৰণ মানুহৰ মাজত যুদ্ধৰ সিদ্ধান্তক লৈ যথেষ্ট অসন্তুষ্টি আছিল। পুটিন প্ৰশাসনে দেশৰ ভিতৰত তীব্ৰ প্ৰতিবাদৰ সন্মুখীন হৈছিল। ৰাষ্ট্ৰপতিৰ বিৰোধী শিবিৰেও ইউক্ৰেইন আক্ৰমণৰ প্ৰতিবাদ কৰিছে। ইয়াৰ বাবে কেইবাটাও ধৰ্মীয় আৰু সআমাজিক সংগঠনক নিষিদ্ধ কৰা হৈছে।
যোৱা কেইদিনমানত, পুটিনে ইউক্ৰেইনত আক্ৰমণৰ তীব্ৰতা বৃদ্ধি কৰা শুনা গৈছে। আন্তৰ্জাতিক বিশেষজ্ঞসকলৰ মতে ইউক্ৰেইনৰ যুদ্ধৰ ফলত ৰাছিয়াৰ অৰ্থনীতি যথেষ্ট ক্ষতিগ্ৰস্ত হৈছে। যুদ্ধৰ ব্যয়ৰ উপৰিও ৰাছিয়াৰ ওপৰত কেইবাটাও নিষেধাজ্ঞা আৰোপ কৰা হৈছে। ফলস্বৰূপে, বাণিজ্য প্ৰায় বন্ধ হৈ গৈছে। সৰ্বোপৰি, ৰাছিয়াৰ ৰাষ্ট্ৰপতি দেশ-বিদেশত যথেষ্ট চাপত আছে।
ইয়াৰ মাজতে প্ৰশাসনিক বিষয়াসকলৰ এখন বৈঠকত পুটিনে স্পষ্ট কৰি দিছে যে যুদ্ধৰ বিৰোধিতা কৰাৰ নামত দেশখনত অৰাজকতা চলি আছে। সমাজৰ স্থিতি ধ্বংস কৰা হৈছে। বৈঠকত পুটিনে কয়, “যিসকলে দেশৰ সমাজ আৰু ৰাজনৈতিক পৰিৱেশ ধ্বংস কৰিবলৈ চেষ্টা কৰি আছে তেওঁলোকৰ বিৰুদ্ধে কঠোৰ ব্যৱস্থা লোৱা উচিত। কট্টৰপন্থীসকলৰ বিৰুদ্ধে দেশৰ প্ৰশাসন অধিক কঠোৰ হ’ব লাগিব।”
উল্লেখ্য যে পুটিনৰ বিৰুদ্ধে বিৰোধী সংগঠনসমূহক কট্টৰপন্থী হিচাপে সূচিত কৰাৰ অভিযোগ উত্থাপিত হৈছে।
